ഭുവനേശ്വര്: ഐഎസ്എല്ലില് മുന് ചാംപ്യന്മാരായ ബെംഗളൂരു എഫ്സിയെ വീഴ്ത്തി ഒഡീഷ എഫ്സി. സ്വന്തം കാണികള്ക്കു മുന്നില് ഏകപക്ഷീയമായ ഒരു ഗോളിനാണ് ബെംഗളൂരുവിനെ ഒഡീഷ മറികടന്നത്. 33ാം മിനിറ്റില് നന്ദകുമാര് ശേഖര് നേടിയ ഗോളാണ് മല്സരവിധി നിര്ണയിച്ചത്. ഈ വിജയത്തോടെ നിലവിലെ ചാംപ്യന്മാരായ ഹൈദരാബാദ് എഫ്സിയെ പിന്തള്ളി ലീഗില് തലപ്പത്തേക്കും കയറിയിരിക്കുകയാണ് ഒഡീഷ.
Also Read: T20 World Cup 2022: രോഹിത് എന്താണ് ചെയ്യുന്നത്?, ഒരു പിടിത്തവുമില്ല!, ബാല്യകാല കോച്ച്
നാലു മല്സരങ്ങളില് നിന്നും മൂന്നും ജയവും ഒരു തോല്വിയുമടക്കം ഒമ്പതു പോയിന്റുമായിട്ടാണ് ഒഡീഷ ഒന്നാംസ്ഥാനക്കാരായത്. ഈ മല്സരത്തിനു മുമ്പ് ഹൈദരാബാദിനു പിറകില് രണ്ടാംസ്ഥാനത്തായിരുന്നു അവര്. എന്നാല് പരാജയത്തോടെ ടോപ്പ് ഫോറില് നിന്നും ബെംഗളൂരു പുറത്തായിരിക്കുകയാണ്. നേരത്തേ നാലാമതായിരുന്ന അവര് ഒഡീഷയോടു തോറ്റതോടെ ആറാംസ്ഥാനത്തേക്കു വീണു.
കളിയുടെ ആദ്യ പകുതിയില് ഒഡീഷയായിരുന്നു കൂടുതല് മികച്ച ടീം. ഇതു ശരിവച്ച് ഒരു ഗോൡനു മുന്നിലെത്തിയ അവര്ക്കു ലീഡുയര്ത്താനുള്ള അവസരങ്ങളും ലഭിച്ചു. എന്നാല് രണ്ടാംപകുതിയിലാണ് ബെംഗളൂരു കൂടുതല് ഉണര്ന്നുകളിച്ചത്. പക്ഷെ ഗോള്മുഖത്ത് അമരീന്ദര് സിങിനു കാര്യമായ വെല്ലുവിളി സൃഷ്ടിക്കാന് അവര്ക്കു സാധിച്ചില്ല. രണ്ടാം ഗോളും നേടി വിജയം നേരത്തേ ഉറപ്പിക്കാന് ഒഡീഷയ്ക്കു പല അവസരങ്ങളും കിട്ടിയെങ്കിലും ഗോളി ഗുര്പ്രീത് സന്ധുവിനെ മറികടക്കാനായില്ല.
33ാം സെറ്റ് പീസില് നിന്നായിരുന്നു നന്ദകുമാറിന്റെ കിടിലന് ഗോള് ഒഡീഷയെ മുന്നിലെത്തിച്ചത്. ഇടതു മൂലയില് നിന്നും ഒഡീഷ്ക്കു കോര്ണര് കിക്ക്. സാഹിലിന്റെ താഴ്ന്ന കിക്ക് ബോക്സിനുള്ളില് വച്ച് ബെംഗളൂരു ഡിഫന്ഡറുടെ കാല്ത്തട്ടി തെറിച്ചു. പുറത്ത് മാര്ക്ക് ചെയ്യപ്പെടാതെ നിന്ന നന്ദകുമാറിന്റെ കാലിലേക്കാണ് ബോള് വന്നത്. പന്ത് പിടിച്ചെടുത്ത താരം തകര്പ്പനൊരു ലോങ്റേഞ്ച് പരീക്ഷിക്കുകയായിരുന്നു. ഗോളി സന്ധുവിനെ നിസ്സഹായനാക്കി ഹബോള് വലയുടെ വലതു മൂലയില് തുളഞ്ഞുകയറി.