ചരിത്രത്തിൽ ആദ്യത്തെ ​ഗോൾരഹിത സമനില, കൊളംബിയയെ തളച്ച് പോർച്ചു​ഗൽ!

2026 ഫിഫ ലോകകപ്പിലെ ഗ്രൂപ്പ് കെ-യിലെ ആവേശകരമായ അവസാന പോരാട്ടത്തിൽ ലാറ്റിനമേരിക്കൻ കരുത്തരായ കൊളംബിയയോട് സമനിലയിൽ പിരിഞ്ഞ് പോർച്ചുഗൽ. ഇരുടീമുകളും മികച്ച മുന്നേറ്റങ്ങൾ നടത്തിയെങ്കിലും രണ്ടാം പകുതിയിലും ഗോൾരഹിത സമനില (0-0) തുടർന്നു. മത്സരത്തിൽ സമനില നേടിയ കൊളംബിയ ഗ്രൂപ്പ് ജേതാക്കളായി അടുത്ത റൗണ്ടിലേക്ക് പ്രവേശിച്ചു. അതേസമയം, ഗ്രൂപ്പിൽ രണ്ടാം സ്ഥാനക്കാരായി പോർച്ചുഗൽ നേരത്തെ തന്നെ റൗണ്ട് ഓഫ് 32 യോഗ്യത ഉറപ്പാക്കിയിട്ടുണ്ട്.

FIFA WC 2026: പഴയ ബ്രസീലല്ല ഇത്, ഇവരെ സൂക്ഷിക്കണം!! നെയ്മറൊന്നും വേണമെന്നില്ല, ഹെന്‍ട്രി പറയുന്നു
തന്റെ ആറാമത്തെ ലോകകപ്പ് കളിക്കുന്ന 41-കാരനായ സൂപ്പർ താരം ക്രിസ്റ്റ്യാനോ റൊണാൾഡോയാണ് ഇന്നും പോർച്ചുഗലിന്റെ മുന്നേറ്റങ്ങൾക്ക് നേതൃത്വം നൽകിയത്. ഈ മത്സരത്തോടെ ലോകകപ്പിൽ ഏറ്റവും കൂടുതൽ മത്സരങ്ങൾ (25 എണ്ണം) കളിക്കുന്ന രണ്ടാമത്തെ താരമെന്ന ലോതർ മത്തേവൂസിന്റെ റെക്കോർഡിനൊപ്പം റൊണാൾഡോ എത്തി. 26 മത്സരങ്ങൾ കളിച്ച ലയണൽ മെസ്സി മാത്രമാണ് ഇനി സിആർ7-ന് മുന്നിലുള്ളത്.

ഗ്രൂപ്പിലെ ഈ പൊസിഷനുകൾ അനുസരിച്ച് മുന്നോട്ട് പോയാൽ റൗണ്ട് ഓഫ് 32-ലെ മത്സരങ്ങൾ പൂർത്തിയാകുമ്പോൾ വരാനിരിക്കുന്ന ക്വാർട്ടർ ഫൈനലിൽ (ജൂലൈ 11) ഫുട്ബോൾ ലോകം കാത്തിരിക്കുന്ന ആ മഹാപോരാട്ടം നടന്നേക്കും.

അർജന്റീനയും പോർച്ചുഗലും തങ്ങളുടെ മത്സരങ്ങൾ ജയിച്ചാൽ മെസ്സിയും റൊണാൾഡോയും ലോകകപ്പ് ക്വാർട്ടറിൽ നേർക്കുനേർ വരാനുള്ള വലിയ സാധ്യതയാണ് മിയാമിയിൽ തുറക്കപ്പെടുന്നത്. രണ്ടാം പകുതിയുടെ ഒടുക്കം കൊളംബിയൻ നിരയിൽ ലൂയിസ് ഡയസും ജെയിംസ് റോഡ്രിഗസും പോർച്ചുഗൽ ഗോൾമുഖത്ത് കടുത്ത ആക്രമണങ്ങൾ അഴിച്ചുവിട്ടെങ്കിലും ലക്ഷ്യം കാണാനായില്ല. എക്സ്ട്രാ ടൈമിൽ ​ഗുസ്താവോ പ്യൂട്ര ലക്ഷ്യം കണ്ടെങ്കിലും ഓഫ് സൈഡാവുകയായിരുന്നു. കൊളംബിയയുടെ ചരിത്രത്തിലെ ആദ്യത്തെ ​ഗോൾരഹിത സമനിലയാണ് ഇന്ന് സംഭവിച്ചത്

ഉസ്ബെകിസ്ഥാനെതിരെ കോം​ഗോയ്ക്ക് ​ഗോൾ മഴ

മറ്റൊരു ഗ്രൂപ്പ് കെ നിർണ്ണായക പോരാട്ടത്തിൽ ഉസ്ബെക്കിസ്ഥാനെ 3-1 ന് തകർത്ത് ഡെമോക്രാറ്റിക് റിപ്പബ്ലിക് ഓഫ് കോംഗോ (DR Congo) നോക്കൗട്ട് സ്റ്റേജിലേക്ക് യോഗ്യത നേടി. ഗ്രൂപ്പിലെ ഏറ്റവും മികച്ച മൂന്നാം സ്ഥാനക്കാരായിട്ടാണ് കോംഗോ റൗണ്ട് ഓഫ് 32-ലേക്ക് ചരിത്ര പ്രവേശനം നടത്തിയത്. ഗ്രൂപ്പിൽ നിന്ന് ഇതിനകം പുറത്തായ ഉസ്ബെക്കിസ്ഥാൻ കനത്ത തോൽവിയോടെയാണ് ടൂർണമെന്റിനോട് വിടപറഞ്ഞത്.

FIFA WC 2026: ബ്രസീല്‍ സന്തോഷിക്കാന്‍ വരട്ടെ!! നോക്കൗട്ടിലെത്താന്‍ വേണ്ടതെന്ത്? അറിയാം
മത്സരത്തിന്റെ തുടക്കത്തിൽ തന്നെ കോംഗോയെ ഞെട്ടിച്ചുകൊണ്ട് ഒൻപതാം മിനിറ്റിൽ എൽദോർ ഷൊമുറോദോവിലൂടെ ഉസ്ബെക്കിസ്ഥാനാണ് ആദ്യ ഗോൾ നേടിയത്. ആദ്യ പകുതിയിൽ ഈ ലീഡ് നിലനിർത്താൻ അവർക്കായെങ്കിലും രണ്ടാം പകുതിയിൽ ഡിആർ കോംഗോ തകർപ്പൻ ആക്രമണങ്ങളുമായി കളം നിറഞ്ഞു.

രണ്ടാം പകുതിയിലെ ഗോൾമഴ

67-ാം മിനിറ്റിൽ ലഭിച്ച പെനാൽറ്റി ലക്ഷ്യത്തിലെത്തിച്ച് സൂപ്പർ താരം യോവാൻ വിസ കോംഗോയ്ക്ക് സമനില സമ്മാനിച്ചു. തുടർന്ന് 77-ാം മിനിറ്റിൽ ഒരു കൗണ്ടർ അറ്റാക്കിൽ നിന്നും ഫിസ്റ്റൺ മായേലെ നേടിയ തകർപ്പൻ ഗോൾ കോംഗോയെ മുന്നിലെത്തിച്ചു (2-1). ഒടുവിൽ ഇഞ്ചുറി ടൈമിന്റെ അവസാന നിമിഷങ്ങളിൽ യോവാൻ വിസ തന്റെ രണ്ടാം ഗോളും നേടി ഉസ്ബെക്കിസ്ഥാന്റെ പെട്ടിയിൽ അവസാന ആണിയുമടിച്ചു. ആക്രമണ ഫുട്ബോളിന്റെ കരുത്തിൽ തകർപ്പൻ തിരിച്ചുവരവ് നടത്തിയ കോംഗോയ്ക്ക് ഇനി നോക്കൗട്ട് പോരാട്ടങ്ങളുടെ ആവേശകാലമാണ്.