അവർക്ക് മെസ്സിയെ പോലെ പോർച്ചുഗലിന് റോണോ! ആ ലോകകപ്പുമായി ഉപമിച്ച് മുൻ ഇതിഹാസം!

ലോകമെമ്പാടുമുള്ള ഫുട്ബോൾ പ്രേമികൾ ആവേശത്തോടെ കാത്തിരിക്കുന്ന 2026 ഫിഫ ലോകകപ്പ് ജൂൺ 11-ന് മെക്സിക്കോ സിറ്റിയിൽ വെച്ച് ആരംഭിക്കാൻ പോവുകയാണ്. മെക്സിക്കോയും ദക്ഷിണാഫ്രിക്കയും തമ്മിലുള്ള ആദ്യ മത്സരത്തോടെയാണ് ഈ കായികമാമാങ്കത്തിന് തുടക്കമാകുന്നത്. ടൂർണമെന്റിന് ദിവസങ്ങൾ മാത്രം ബാക്കിനിൽക്കെ, ഇത്തവണ ലോകകിരീടത്തിൽ മുത്തമിടാൻ സാധ്യതയുള്ള പ്രിയപ്പെട്ട ടീമുകളെ പ്രവചിച്ച് കായികരംഗത്തെ പ്രമുഖർ ഇപ്പോൾ രംഗത്തെത്തുന്നുണ്ട്. 1990-ൽ പശ്ചിമ ജർമ്മനിയെ ലോകകപ്പ് വിജയത്തിലേക്ക് നയിക്കുന്നതിൽ നിർണായക പങ്കുവഹിച്ച ഇതിഹാസ സ്ട്രൈക്കർ യുർഗൻ ക്ലിൻസ്മാൻ പങ്കുവെച്ച പ്രവചനങ്ങളാണ് ഇപ്പോൾ ഫുട്ബോൾ ലോകത്ത് വലിയ രീതിയിൽ ചർച്ചയാകുന്നത്.

FIFA WC 2026: ടിക്കി ടാക്കയില്ല, ഇതു പുതിയ സ്‌പെയിന്‍!! കളി മാറ്റിയ ചെമ്പട കപ്പ് തൂക്കുമോ?
ഇത്തവണ കിരീടം നേടാൻ ഏറ്റവും കൂടുതൽ സാധ്യതയുള്ള തന്റെ പ്രിയപ്പെട്ട ടീമുകളിലൊന്നായി ക്ലിൻസ്മാൻ തിരഞ്ഞെടുത്തിരിക്കുന്നത് പോർച്ചുഗലിനെയാണ്. കഴിഞ്ഞ ഖത്തർ ലോകകപ്പിൽ അർജന്റീന കിരീടം നേടിയതുമായി പോർച്ചുഗൽ ടീമിനുള്ള കൗതുകകരമായ ഒരു സാമ്യതയും അദ്ദേഹം ഇതിനായി ചൂണ്ടിക്കാണിക്കുന്നു.

റൊണാൾഡോയ്ക്ക് വേണ്ടി പോർച്ചുഗൽ പട; മെസ്സിയോട് ഉപമിച്ച് ക്ലിൻസ്മാൻ

പ്രശസ്തമായ 'സ്റ്റിക്ക് ടു ഫുട്ബോൾ' ടോക്ക് ഷോയുടെ സമീപകാല എപ്പിസോഡിലാണ് ക്ലിൻസ്മാൻ തന്റെ നിരീക്ഷണങ്ങൾ തുറന്നുപറഞ്ഞത്. ഖത്തർ ലോകകപ്പിൽ അർജന്റീനയിലെ എല്ലാ കളിക്കാരും തങ്ങളുടെ നായകൻ ലയണൽ മെസ്സിക്ക് വേണ്ടിയാണ് കളിച്ചതെങ്കിൽ, നിലവിലെ പോർച്ചുഗൽ ടീമിൽ എല്ലാവരും ക്രിസ്റ്റ്യാനോ റൊണാൾഡോയ്ക്ക് വേണ്ടിയാണ് കളിക്കുന്നത് എന്ന് ക്ലിൻസ്മാൻ വിലയിരുത്തുന്നു. ഒന്നിനൊന്ന് മികച്ച ലോകോത്തര കളിക്കാരുള്ള ഒരു സംഘവും റോബർട്ടോ മാർട്ടിനസ് എന്ന തന്ത്രശാലിയായ കോച്ചും റൊണാൾഡോയ്ക്ക് പൂർണ്ണ പിന്തുണയുമായി ഒപ്പമുണ്ടെന്നത് പോർച്ചുഗലിന്റെ സാധ്യതകൾ വർദ്ധിപ്പിക്കുന്നു. പോർച്ചുഗലിന് പുറമെ, മികച്ച ഫോമിലുള്ള ബ്രസീലിനും ശക്തമായ ആത്മവിശ്വാസത്തോടെ ഇറങ്ങിയാൽ ഇംഗ്ലണ്ടിനും ഇത്തവണ കിരീടം നേടാൻ സാധ്യതയുണ്ടെന്ന് മുൻ ടോട്ടനം താരം കൂടിയായ ക്ലിൻസ്മാൻ കൂട്ടിച്ചേർത്തു.

ഇംഗ്ലണ്ടിനെ തള്ളി ബാർസലോണ മുൻ താരം റൊമാരിയോ!

അതേസമയം, 1994-ൽ ബ്രസീലിനെ ലോകകപ്പ് ജേതാക്കളാക്കിയ ഇതിഹാസ സ്ട്രൈക്കർ റൊമാരിയോയും ഇത്തവണത്തെ തന്റെ പ്രിയപ്പെട്ട ആറ് ടീമുകളുടെ പട്ടിക പരസ്യമാക്കിയിട്ടുണ്ട്. എന്നാൽ ക്ലിൻസ്മാന്റെ പ്രവചനത്തിന് വിപരീതമായി, ഇംഗ്ലണ്ടിനെ റൊമാരിയോ തന്റെ ഫേവറിറ്റ് ലിസ്റ്റിൽ നിന്നും പൂർണ്ണമായി ഒഴിവാക്കുകയാണുണ്ടായത്. ഇംഗ്ലണ്ട് മികച്ച ഒരു ടീമാണെന്നതിൽ സംശയമില്ലെന്നും ഹാരി കെയ്ൻ, ജൂഡ് ബെല്ലിംഗ്ഹാം, ബുക്കായോ സാക്ക തുടങ്ങിയ മികച്ച സാങ്കേതിക തികവുള്ള കളിക്കാർ അവർക്കുണ്ടെന്നും റൊമാരിയോ സമ്മതിക്കുന്നു. എങ്കിലും ഇംഗ്ലണ്ടിനേക്കാൾ മികച്ച മറ്റ് ടീമുകൾ ടൂർണമെന്റിലുണ്ടെന്നാണ് അദ്ദേഹത്തിന്റെ പക്ഷം.

ഫിഫ സൈറ്റിൽ വമ്പൻ തകരാർ, ലോകകപ്പ് ടിക്കറ്റുകൾ ഫ്രീയായി ബുക്ക് ചെയ്ത് ആരാധകർ!; ഒടുവിൽ സംഭവിച്ചത്!
ഫ്രാൻസ്, സ്പെയിൻ, പോർച്ചുഗൽ, അർജന്റീന, ജർമ്മനി, ബ്രസീൽ എന്നീ ആറ് ടീമുകളെയാണ് റൊമാരിയോ കിരീടസാധ്യത കൽപ്പിക്കുന്നവരുടെ മുൻനിരയിൽ നിർത്തുന്നത്. ഈ പട്ടികയിലെ അഞ്ച് ടീമുകളും ഇതിനുമുൻപ് ഒന്നിലധികം തവണ ലോകകിരീടം നേടിയിട്ടുണ്ടെങ്കിലും പോർച്ചുഗലിന് ഇതുവരെ ലോകകപ്പ് സ്വന്തമാക്കാൻ സാധിച്ചിട്ടില്ല. നിലവിൽ 41 വയസ്സുകാരനായ ക്രിസ്റ്റ്യാനോ റൊണാൾഡോയുടെ കരിയറിലെ അവസാന ലോകകപ്പ് മത്സരങ്ങൾക്കായിരിക്കും 2026-ൽ വേദിയൊരുങ്ങുന്നത്. അതുകൊണ്ട് തന്നെ തന്റെ വിപുലമായ ട്രോഫി കളക്ഷനിലേക്ക് ഈ ഒരൊറ്റ സ്വർണ്ണക്കിരീടം കൂടി ചേർത്തുവെക്കാൻ റൊണാൾഡോയും അദ്ദേഹത്തിന്റെ പോർച്ചുഗൽ പടയും ജീവൻമരണ പോരാട്ടത്തിനാകും കാനഡയിലും അമേരിക്കയിലുമായി ഇറങ്ങുക.