ഒന്ന് കിട്ടിയ ചെല്‍സി മൂന്ന് കൊടുത്തു... വിജയട്രാക്കില്‍ കയറി അനായാസം, ഡോട്മുണ്ടിന് ജയം

ലണ്ടന്‍: ഇംഗ്ലീഷ് പ്രീമിയര്‍ ലീഗ് ഫുട്‌ബോളില്‍ നിലവിലെ ചാംപ്യന്‍മാരായ ചെല്‍സി വീണ്ടും വിജയവഴിയില്‍. കഴിഞ്ഞയാഴ്ചയേറ്റ ഞെട്ടിക്കുന്ന തോല്‍വിക്കു ശേഷം കളത്തിലിറങ്ങിയ ചെല്‍സി പുതുമുഖ ടീം ഹഡേഴ്‌സ്ഫീല്‍ഡിനോടാണ് ഇതിന്റെ അരിശം തീര്‍ത്തത്. എവേ മല്‍സരത്തില്‍ ഒന്നിനെതിരേ മൂന്നു ഗോളുകള്‍ക്ക് ചെല്‍സി എതിരാളികളെ നിലംപരിശാക്കുകയായിരുന്നു.

ടിമോ ബക്കായോക്കോ, വില്ല്യന്‍, പെഡ്രോ എന്നിവരാണ് ബ്ലൂസിന്റെ സ്‌കോറര്‍മാര്‍. ഇഞ്ചുറിടൈമില്‍ ഹഡേഴ്‌സ്ഫീല്‍ഡ് ഗോള്‍ മടക്കിയെങ്കിലും ചെല്‍സി അപ്പോഴേക്കും വിജയമുറപ്പിച്ചിരുന്നു. കഴിഞ്ഞയാഴ്ച വെസ്റ്റ്ഹാമിനോട് 1-0ന്റെ അട്ടിമറിത്തോല്‍വിയേറ്റുവാങ്ങിയ ചെല്‍സി ഇതിന്റെ ക്ഷീണം ഹഡേഴ്‌സ്ഫീല്‍ഡിനെതിരേ തീര്‍ക്കുകയായിരുന്നു.

ലീഗിലെ മറ്റു മല്‍സരങ്ങളില്‍ ബേണ്‍ലി 1-0ന് സ്‌റ്റോക്ക് സിറ്റിയെയും ക്രിസ്റ്റല്‍ പാലസ് 2-1ന് വാട്‌ഫോര്‍ഡിനെയും തോല്‍പ്പിച്ചു. ജയത്തോടെ ലീഗില്‍ രണ്ടാംസ്ഥാനത്തുള്ള മാഞ്ചസ്റ്റര്‍ യുനൈറ്റഡിന് ഒപ്പമെത്താനും ചെല്‍സിക്കു കഴിഞ്ഞു. ഇരുടീമിനും 35 പോയിന്റ് വീതമാണുള്ളത്. എന്നാല്‍ ചെല്‍സിയേക്കാള്‍ ഒരു മല്‍സരം കുറച്ചാണ് മാഞ്ചസ്റ്റര്‍ കളിച്ചത്.

ജര്‍മന്‍ ലീഗ് ഫുട്‌ബോളില്‍ കരുത്തരായ ബൊറൂസ്യ ഡോട്മുണ്ടിന് ജയം. ഡോട്മുണ്ട് 2-0ന് മെയ്ന്‍സിനെ തോല്‍പ്പിക്കുകയായിരുന്നു. രണ്ടു ഗോളും പിറന്നത് രണ്ടാം പകുതിയിലാണ്. മറ്റു മല്‍സരങ്ങളില്‍ ഐന്ത്രാക്ട് ഫ്രാങ്ക്ഫര്‍ട്ട് 2-1ന് ഹാംബര്‍ഗിനെയും ഫ്രീബര്‍ഗ് 1-0ന് ബൊറൂസ്യയെയും തോല്‍പ്പിച്ചു.