അർജന്റീനയ്ക്ക് എട്ടിന്റെ പണി! പരിക്കിന്റെ പിടിയിൽ വീണ് ചാമ്പ്യന്മാരുടെ ഡിഫെൻഡർ! മെസ്സിക്ക് തലവേദന

കിരീടം നിലനിർത്താൻ ലക്ഷ്യമിട്ട് ലയണൽ മെസ്സിയുടെ നേതൃത്വത്തിൽ അർജന്റീന കഠിനമായ പരിശീലനങ്ങളിൽ മുഴുകിയിരിക്കെ, കനത്ത തിരിച്ചടിയായിരിക്കുകയാണ് പുറത്തുവരുന്ന ഒരു പ്രധാന വാർത്ത. 2026 ഫിഫ ലോകകപ്പ് ആവേശത്തിലേക്ക് കടക്കാൻ ദിവസങ്ങൾ മാത്രം ബാക്കിനിൽക്കെ, ടീമിലെ പ്രമുഖ പ്രതിരോധ താരം ലിയോനാർഡോ ബലേർഡി പരിക്കേറ്റ് ലോകകപ്പിൽ നിന്നും പൂർണ്ണമായി പുറത്തായിരിക്കുന്നു. അർജന്റീന ഫുട്ബോൾ അസോസിയേഷൻ തന്നെയാണ് ഔദ്യോഗിക പത്രക്കുറിപ്പിലൂടെ ഈ നിരാശാജനകമായ വാർത്ത സ്ഥിരീകരിച്ചത്.

അവർക്ക് മെസ്സിയെ പോലെ പോർച്ചുഗലിന് റോണോ! ആ ലോകകപ്പുമായി ഉപമിച്ച് മുൻ ഇതിഹാസം!
ബലേർഡിക്ക് നിർഭാഗ്യം; പകരക്കാരൻ വരുന്നു!

ഫ്രഞ്ച് ക്ലബ്ബായ മാഴ്സെയുടെ (Marseille) 27-കാരനായ സെന്റർ ബാക്ക് താരം ലിയോനാർഡോ ബലേർഡിക്ക് തന്റെ കരിയറിലെ ആദ്യത്തെ വലിയ അന്താരാഷ്ട്ര ടൂർണമെന്റ് കളിക്കാനുള്ള സുവർണ്ണാവസരമാണ് പരിക്കിലൂടെ നഷ്ടമായിരിക്കുന്നത്. താരത്തിന്റെ വലതുകാലിലെ പേശികൾക്കേറ്റ പരിക്ക് കടുത്തതാണെന്ന് വ്യക്തമായതോടെയാണ് ടീമിൽ നിന്നും ഒഴിവാക്കിയത്. നിലവിലെ ലോക ചാമ്പ്യന്മാരായ അർജന്റീന, ബലേർഡിക്ക് പകരം ബോൺമൗത്തിന്റെ പ്രതിരോധ താരം മാർക്കോസ് സെനസിയെ ടീമിലേക്ക് വിളിക്കാൻ സാധ്യതയുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്.

ലോകകപ്പ് പോരാട്ടങ്ങൾ തുടങ്ങുന്നതിന് മുൻപ് ഹോണ്ടുറാസ്, ഐസ്‌ലൻഡ് എന്നിവർക്കെതിരെ രണ്ട് വാം-അപ്പ് ഫ്രണ്ട്‌ലി മത്സരങ്ങൾ കളിച്ചാണ് അർജന്റീന തയ്യാറെടുക്കുന്നത്. ഗ്രൂപ്പ് ജെ-യിലാണ് ഇത്തവണ മെസ്സിയും കൂട്ടരും മാറ്റുരയ്ക്കുന്നത്. ജൂൺ 16-ന് അൾജീരിയക്കെതിരെയാണ് അർജന്റീനയുടെ ആദ്യ മത്സരം, തുടർന്ന് ഓസ്ട്രിയ, ജോർദാൻ എന്നീ രാജ്യങ്ങളെയും അവർ നേരിടും.

മെസ്സിയുടെ ഫിറ്റ്നസ്; ആശങ്കയൊഴിഞ്ഞ് ആരാധകർ!

ബലേർഡിയുടെ പുറത്താകൽ അർജന്റീനയ്ക്ക് കടുത്ത ആഘാതമാണെങ്കിലും, ആരാധകർക്ക് വലിയ ആശ്വാസം നൽകുന്ന മറ്റൊരു വാർത്തയും അർജന്റീന ക്യാമ്പിൽ നിന്നും പുറത്തുവരുന്നുണ്ട്. ലോകകപ്പിന് മുൻപുള്ള അവസാന എംഎൽഎസ് (MLS) മത്സരത്തിനിടെ പരിക്കിന്റെ ലക്ഷണങ്ങൾ കാണിച്ച് ക്രീസ് വിട്ട ക്യാപ്റ്റൻ ലയണൽ മെസ്സി ഇപ്പോൾ പൂർണ്ണ ഫിറ്റ്നസ്സിലേക്ക് തിരിച്ചെത്തിക്കഴിഞ്ഞു. ഇന്റർ മയാമിക്ക് വേണ്ടിയുള്ള കളിക്കിടെ ഹാംസ്ട്രിങ്ങിന് ബുദ്ധിമുട്ട് തോന്നിയതിനെ തുടർന്ന് മുൻകരുതൽ എന്ന നിലയ്ക്കാണ് മെസ്സിയെ പിൻവലിച്ചതെന്ന് ക്ലബ്ബ് വ്യക്തമാക്കിയിരുന്നു.

ഫിഫ സൈറ്റിൽ വമ്പൻ തകരാർ, ലോകകപ്പ് ടിക്കറ്റുകൾ ഫ്രീയായി ബുക്ക് ചെയ്ത് ആരാധകർ!; ഒടുവിൽ സംഭവിച്ചത്!
അർജന്റീന ക്യാമ്പിലെത്തിയ ശേഷവും മെസ്സി ടീമിനൊപ്പം തനിയെ പരിശീലനം നടത്തിയത് ആരാധകരിൽ ആശങ്കയുണ്ടാക്കിയിരുന്നു. എന്നാൽ ഹെഡ് കോച്ച് ലയണൽ സ്കലോണി ഇപ്പോൾ എല്ലാ സംശയങ്ങൾക്കും മറുപടി നൽകിയിരിക്കുകയാണ്. മെസ്സി സുഖമായിരിക്കുന്നുവെന്നും, വരാനിരിക്കുന്ന രണ്ട് സൗഹൃദ മത്സരങ്ങളിൽ ഏതാനും മിനിറ്റുകൾ അദ്ദേഹം കളിക്കളത്തിലിറങ്ങുമെന്നും സ്കലോണി മാധ്യമങ്ങളോട് വ്യക്തമാക്കി. ഇതോടെ തന്റെ കരിയറിലെ ആറാമത്തെ ചരിത്രപ്രസിദ്ധമായ ലോകകപ്പ് കളിക്കാൻ മെസ്സി പൂർണ്ണ സജ്ജനായിക്കഴിഞ്ഞു. പോർച്ചുഗലിന്റെ ക്രിസ്റ്റ്യാനോ റൊണാൾഡോയും മെക്സിക്കോയുടെ ഗില്ലെർമോ ഒച്ചോവയുമാണ് ഈ അപൂർവ്വ റെക്കോർഡിനൊപ്പം മെസ്സിക്കൊപ്പമുള്ള മറ്റ് രണ്ട് താരങ്ങൾ. ജൂൺ 17നാണ് അർജന്റീനയുടെ ആദ്യ മത്സരം. കിരീടം നിലനിർത്താൻ ചാമ്പ്യന്മാർ ഇറങ്ങുമ്പോൾ അവരോട് കട്ടയ്ക്ക് പോരാടാൻ മറ്റ് ടീമുകളും തയ്യാറായിക്കഴിഞ്ഞു.