മെസ്സിയില്ലാതെ എത്ര നാള്‍? ഇനിയും കാത്തിരിക്കണോ... അര്‍ജന്റൈന്‍ കോച്ചിന് പറയാനുള്ളത്

സ്‌കലോനി പറയുന്നത്

ശനിയാഴ്ച രാവിലെ ഗ്വാട്ടിമാലയ്‌ക്കെതിരേ നടക്കാനിരിക്കുന്ന സൗഹൃദ മല്‍സരത്തിനു മുന്നോടിയായി നടന്ന വാര്‍ത്താസമ്മേളനത്തിലും മെസ്സിയെക്കുറിച്ച് മാധ്യമപ്രവര്‍ത്തര്‍ അര്‍ജന്റീനയുടെ താല്‍ക്കാലിക കോച്ചായ ലയണല്‍ സ്‌കലോനിയോടു ചോദിച്ചു. നേരത്തേ തന്നെ ഇതേക്കുറിച്ച് സംസാരിച്ചു കഴിഞ്ഞതാണല്ലോ എന്നായിരുന്നു സ്‌കലോനിയുടെ ആദ്യത്തെ മറുപടി.

മെസ്സിയുമായി സംസാരിച്ചിരുന്നു

ദേശീയ ടീമിലെ ഭാവിയുമായി ബന്ധപ്പെട്ട് മെസ്സിയുമായി താന്‍ സംസാരിച്ചിരുന്നതായി സ്‌കലോനി വ്യക്തമാക്കി. ഇനിയെന്താണ് സംഭവിക്കുകയെന്നു നമുക്കു നോക്കാം. അദ്ദേഹം അര്‍ജന്റീന ടീമിലേക്കു തിരിച്ചുവരുമോ ഇല്ലയോ എന്നാണ് ഇനി അറിയാനുള്ളതെന്നും അദ്ദേഹം കൂട്ടിച്ചേര്‍ത്തു.
ലോകകപ്പ് ദുരന്തത്തെ തുടര്‍ന്നു പുറത്താക്കപ്പെട്ട ജോര്‍ജെ സാംപോളിയുടെ പകരക്കാരനായാണ് ജൂനിയര്‍ ടീമിന്റെ കോച്ച് കൂടിയായ സ്‌കലോനിയെ അര്‍ജന്റീന നിയമിച്ചത്.

അതേക്കുറിച്ച് സംസാരിക്കേണ്ട സമയമല്ല

മെസ്സിയുടെ ഭാവിയെക്കുറിച്ച് സംസാരിക്കേണ്ട സമയമല്ല ഇതെന്നു സ്‌കലോനി പറഞ്ഞു അദ്ദേഹം സ്വന്തം ഭാവിയുടെ കാര്യത്തില്‍ എന്തു തീരുമാനിക്കുമെന്ന് നിങ്ങളെപ്പോലെ തന്നെ താനും കാത്തിരിക്കുകയാണ്. ഇപ്പോള്‍ ഈ വിഷയത്തെക്കുറിച്ച് ചര്‍ച്ച ചെയ്യേണ്ട സമയമല്ല. ഗ്വാട്ടിമാലയ്‌ക്കെതിരേ നടക്കാനിരിക്കുന്ന സൗഹൃദ മല്‍സരത്തിലാണ് ശ്രദ്ധ കേന്ദീകരിച്ചിരിക്കുന്നതെന്നും അദ്ദേഹം കൂട്ടിച്ചേര്‍ത്തു.