IPL 2026: ധോണി സ്റ്റൈലിൽ റുതു; മുംബൈയെ പൂട്ടിയ തന്ത്രങ്ങൾക്ക് പത്തിൽ പത്ത്, പ്രശംസിച്ച് സഹീർ ഖാൻ

വാംഖഡെ സ്റ്റേഡിയത്തിൽ മുംബൈ ഇന്ത്യൻസിനെതിരെ ചെന്നൈ സൂപ്പർ കിംഗ്‌സ് നേടിയ 103 റൺസിന്റെ വമ്പൻ വിജയത്തിന് പിന്നിൽ ബാറ്റിംഗ് കരുത്ത് മാത്രമല്ല, റുതുരാജ് ഗെയ്‌ക്‌വാദ് എന്ന നായകന്റെ കൃത്യമായ പ്ലാനിംഗും ഉണ്ടായിരുന്നു. മുംബൈയുടെ ബാറ്റിംഗ് നിരയെ വരിഞ്ഞുമുറുക്കാൻ റുതുരാജ് നടത്തിയ ബൗളിംഗ് മാറ്റങ്ങൾ ടീമിന് വലിയ മേൽക്കൈ നൽകിയെന്ന് സഹീർ ഖാൻ പറഞ്ഞു.

IPL 2026: ബുംറയെ ബഹുമാനിച്ചു, മറ്റുള്ളവരെ പ്രഹരിച്ചു; വാംഖഡെയിലെ സഞ്ജു വിസ്മയത്തിൽ
"ബൗളർമാരെ ഉപയോഗിച്ചത് അതിസമർത്ഥമായി"

റുതുരാജിന്റെ ക്യാപ്റ്റൻസിയെക്കുറിച്ച് സഹീർ ഖാൻ പറഞ്ഞത് ഇങ്ങനെയാണ്: "ഇന്ന് റുതുരാജിന്റെ നായകത്വം അങ്ങേയറ്റം മികച്ചതായിരുന്നു എന്നാണ് എനിക്ക് തോന്നുന്നത്. മുകേഷ് ചൗധരിയെ തുടക്കത്തിൽ തന്നെ തുടർച്ചയായി നാല് ഓവർ എറിയിക്കാൻ കാണിച്ച ആത്മവിശ്വാസം എടുത്തുപറയേണ്ടതാണ്. വാംഖഡെയിലെ പിച്ചിന്റെ സ്വഭാവം മനസ്സിലാക്കിയുള്ള നീക്കമായിരുന്നു അത്."

പിന്നീട് മധ്യ ഓവറുകളിൽ വരുത്തിയ മാറ്റങ്ങളെയും സഹീർ പ്രശംസിച്ചു. "നൂർ അഹമ്മദിനെ വൈകി മാത്രം കൊണ്ടുവരികയും നാല് ഓവറുകൾ തുടർച്ചയായി അദ്ദേഹത്തെക്കൊണ്ട് എറിയിപ്പിക്കുകയും ചെയ്തത് മുംബൈയെ സമ്മർദ്ദത്തിലാക്കി. കൂടാതെ അഖീൽ ഹൊസൈനെ കൃത്യസമയത്ത് ഉപയോഗിച്ചതും വലിയ ഫലം നൽകി. റുതുരാജിനെ സംബന്ധിച്ചിടത്തോളം ഇന്ന് എടുത്ത തീരുമാനങ്ങളെല്ലാം കൃത്യമായി ലക്ഷ്യത്തിലെത്തി," സഹീർ ഖാൻ വ്യക്തമാക്കി.

അഖീൽ ഹൊസൈന്റെ മാന്ത്രികതയും റുതുരാജിന്റെ വിശ്വാസവും

മുംബൈ ബാറ്റിംഗ് നിരയുടെ നട്ടെല്ലൊടിച്ച അഖീൽ ഹൊസൈന്റെ (4 വിക്കറ്റ്) പ്രകടനത്തിന് പിന്നിൽ റുതുരാജ് നൽകിയ പിന്തുണ ചെറുതല്ല. പവർപ്ലേയിൽ റൺസ് വിട്ടുനൽകാതെ സമ്മർദ്ദം സൃഷ്ടിച്ച മുകേഷ് ചൗധരിയും റുതുരാജിന്റെ തന്ത്രങ്ങളിൽ പ്രധാന പങ്കുവഹിച്ചു. സഞ്ജു സാംസണിന്റെ സെഞ്ചുറിക്ക് പിന്നാലെ ബൗളിംഗിലും റുതുരാജ് തന്റെ മികവ് തെളിയിച്ചതോടെ മുംബൈ ഇന്ത്യൻസ് സ്വന്തം മൈതാനത്ത് നിരായുധരാക്കപ്പെട്ടു.

സഞ്ജുവിന്റെ വിസ്മയം

സഞ്ജു സാംസൺ ഇന്നലെ വാംഖഡെ സ്റ്റേഡിയത്തിൽ കാഴ്ചവെച്ചത് ക്ലാസ്സും കരുത്തും ഒത്തുചേർന്ന ഒരു മാസ്റ്റർ ക്ലാസ് ഇന്നിംഗ്‌സായിരുന്നു. തുടക്കത്തിൽ ജസ്പ്രീത് ബുംറയെപ്പോലെയുള്ള ലോകോത്തര ബൗളർമാരെ കൃത്യമായി ബഹുമാനിക്കുകയും ക്രീസിൽ നിലയുറപ്പിക്കാൻ സമയം കണ്ടെത്തുകയും ചെയ്ത സഞ്ജു, പിന്നീട് മുംബൈ ബൗളർമാരെ നിഷ്പ്രഭമാക്കുന്ന പ്രകടനമാണ് പുറത്തെടുത്തത്. കേവലം 54 പന്തിൽ നിന്ന് 101 റൺസ് നേടിയ സഞ്ജുവിന്റെ ഇന്നിംഗ്‌സിൽ 10 ഫോറുകളും 6 സിക്സറുകളും ഉൾപ്പെട്ടിരുന്നു. മൈതാനത്തിന്റെ എല്ലാ കോണുകളിലേക്കും അനായാസം ഷോട്ടുകൾ പായിച്ച അദ്ദേഹം, വാംഖഡെയിലെ കാണികളെ ആവേശത്തിന്റെ കൊടുമുടിയിലെത്തിച്ചു.

IPL 2026: 207 പിന്തുടരുമ്പോൾ പവർപ്ലേയിൽ 30 റൺസോ? മുംബൈയുടെ ബാറ്റിംഗ് തകർച്ചയെ പിച്ചിച്ചീന്തി സെവാഗ്!
വെറുമൊരു വെടിക്കെട്ട് എന്നതിലുപരി, തന്റെ ഇന്നിംഗ്‌സ് എത്രത്തോളം പക്വതയോടെ കെട്ടിപ്പടുക്കാം എന്ന് സഞ്ജു ഇന്നലെ തെളിയിച്ചു. ഓഫ് സ്റ്റംപിന് പുറത്തുവന്ന പന്തുകളെ സ്ക്വയർ ഓഫ് ദി വിക്കറ്റിൽ പ്ലേസ് ചെയ്ത രീതിയും, പന്തിന്റെ വേഗത കണക്കിലെടുത്ത് അദ്ദേഹം നടത്തിയ ടൈമിംഗും സുരേഷ് റെയ്‌നയെപ്പോലെയുള്ള പ്രമുഖ താരങ്ങളുടെ പോലും പ്രശംസ പിടിച്ചുപറ്റി. ഈ സീസണിലെ തന്റെ രണ്ടാമത്തെ സെഞ്ചുറി കുറിച്ചതിലൂടെ, താൻ കരിയറിലെ ഏറ്റവും മികച്ച ഫോമിലാണെന്നും വരാനിരിക്കുന്ന ഇന്ത്യൻ പര്യടനങ്ങൾക്കും താൻ പൂർണ്ണ സജ്ജനാണെന്നുമുള്ള ശക്തമായ സന്ദേശമാണ് സഞ്ജു നൽകിയിരിക്കുന്നത്.