ആദ്യ ടി20യില്‍ ഇന്ത്യയെ തോല്‍പ്പിച്ചത് ജിഎസ്ടി!! സെവാഗിന്റെ ട്വീറ്റ് വൈറല്‍... ഏറ്റെടുത്ത് ആരാധകരും

വിജയലക്ഷ്യം 174

ആദ്യം ബാറ്റ് ചെയ്ത ഓസ്‌ട്രേലിയ 17 ഓവറാക്കി വെട്ടിക്കുറച്ച മല്‍സരത്തില്‍ നാലു വിക്കറ്റിന് 158 റണ്‍സാണ് നേടിയത്. എന്നാല്‍ ഡക്‌വര്‍ത്ത് ലൂയിസ് നിയമപ്രകാരം ഇന്ത്യയുടെ ലക്ഷ്യം പുനര്‍ നിശ്ചയിക്കുകയായിരുന്നു.
174 റണ്‍സാണ് 17 ഓവറില്‍ ഇന്ത്യക്കു നല്‍കിയ വിജയലക്ഷ്യം. എന്നാല്‍ ഏഴു വിക്കറ്റിന് 169 റണ്‍സ് നേടാനേ ഇന്ത്യക്കായുള്ളൂ. കളിയില്‍ ഓസീസിനേക്കാള്‍ 11 റണ്‍സ് കൂടുതല്‍ നേടിയിട്ടും ഇന്ത്യ തോറ്റതിനെയാണ് സെവാഗ് ട്രോളിയത്.

ജിഎസ്ടി തിരിച്ചടിയായി

ഓസ്‌ട്രേലിയയേക്കാള്‍ കൂടുതല്‍ റണ്‍സെടുത്തിട്ടും മല്‍സരത്തില്‍ ഇന്ത്യ പരാജയപ്പെട്ടു. ഓസ്‌ട്രേലിയന്‍ സ്‌കോറിന്‍മേല്‍ ചുമത്തിയ ജിഎസ്ടിയാണ് ഇന്ത്യക്കു തിരിച്ചടിയായത്. എങ്കിലും വളരെ ത്രില്ലിങ് മല്‍സരത്തോടെ തന്നെയാണ് പരമ്പരയ്ക്കു തുടക്കമായിരിക്കുന്നതെന്നായിരുന്നു സെവാഗിന്റെ വൈറലായി മാറിയ ട്വീറ്റ്. തന്റെ ഒഫീഷ്യല്‍ അക്കൗണ്ടിലാണ് അദ്ദേഹം ഇങ്ങനെ ട്വീറ്റ് ചെയ്തിരിക്കുന്നത്.

മോശം ബൗളിങ്, ഫീല്‍ഡിങ്

മോശം ബൗളിങും ഫീല്‍ഡിങുമാണ് മല്‍സരത്തില്‍ ഇന്ത്യന്‍ തോല്‍വിയുടെ പ്രധാനപ്പട്ട കാരണങ്ങള്‍. കളിയില്‍ നിരവധി നിര്‍ണായക ക്യാച്ചുകള്‍ ഇന്ത്യ പാഴാക്കിയിരുന്നു. ഇന്ത്യന്‍ നായകന്‍ വിരാട് കോലിയും ഇക്കാര്യത്തില്‍ പ്രതിക്കൂട്ടിലുണ്ട്. ബൗളിങില്‍ ക്രുനാല്‍ പാണ്ഡ്യയുടെ ദയനീയ പ്രകടനവും ഓസ്‌ട്രേലിയയെ വലിയ സ്‌കോര്‍ പടുത്തുയര്‍ത്താന്‍ സഹായിച്ചു.