കിരീടമില്ലാത്ത രാജാക്കന്മാർ! വമ്പൻ റെക്കോർഡുകൾ തകർത്ത ഐപിഎൽ ചരിത്രത്തിലെ ആ 5 അൺക്യാപ്പ്ഡ് ബാറ്റർമാർ

ഐപിഎൽ 2026 എലിമിനേറ്ററിൽ സൺറൈസേഴ്‌സ് ഹൈദരാബാദിനെതിരെ രാജസ്ഥാൻ റോയൽസിന്റെ 15-കാരനായ ഓപ്പണർ വൈഭവ് സൂര്യവംശി നടത്തിയ മാസ്മരിക പ്രകടനം ക്രിക്കറ്റ് ലോകത്തെ ഒന്നടങ്കം ഞെട്ടിച്ചിരിക്കുകയാണ്. വെറും 29 പന്തുകളിൽ നിന്ന് 5 ഫോറുകളും 12 സിക്സറുകളുമടക്കം 97 റൺസാണ് താരം അടിച്ചുകൂട്ടിയത്. ഈ തകർപ്പൻ ഇന്നിങ്സോടെ ഐപിഎൽ ചരിത്രത്തിലെ ഒരു വലിയ റെക്കോർഡും സൂര്യവംശി സ്വന്തം പേരിലാക്കി. ഒരു ഐപിഎൽ സീസണിൽ ഏറ്റവും കൂടുതൽ റൺസ് നേടുന്ന 5 അൺക്യാപ്പ്ഡ് (Uncapped - അന്താരാഷ്ട്ര മത്സരം കളിക്കാത്ത) ബാറ്റർമാരുടെ പട്ടിക താഴെ നൽകുന്നു:

IPL 2026: ഇപ്പോൾ കഴിച്ചില്ലെങ്കിൽ പിന്നെയെപ്പൊ, അടുത്ത വർഷമോ? ​ഗുജറാത്ത് ടൈറ്റൻസിന് മനോജ് തിവാരിയുടെ ക്ലാസ്!
1. വൈഭവ് സൂര്യവംശി (680 റൺസ്) - രാജസ്ഥാൻ റോയൽസ് (2026)*

സൺറൈസേഴ്‌സിനെതിരെയുള്ള 97 റൺസ് പ്രകടനത്തോടെ യശസ്വി ജയ്‌സ്വാളിന്റെ റെക്കോർഡ് മറികടന്ന് വൈഭവ് സൂര്യവംശി ഈ പട്ടികയിൽ ഒന്നാമതെത്തി. ഈ സീസണിൽ ഇതുവരെ കളിച്ച 15 ഇന്നിങ്സുകളിൽ നിന്നായി താരം 680 റൺസ് സ്വന്തമാക്കി കഴിഞ്ഞു. 45.33 ശരാശരിയിലും 242.85 എന്ന ഭീമാകാരമായ സ്‌ട്രൈക്ക് റേറ്റിലുമാണ് സൂര്യവംശി ബാറ്റ് വീശിയത്. ഇതിൽ ഒരു സെഞ്ച്വറിയും (103 റൺസ്) നാല് അർദ്ധസെഞ്ച്വറികളും ഉൾപ്പെടുന്നു.

2. യശസ്വി ജയ്‌സ്വാൾ (625 റൺസ്) - രാജസ്ഥാൻ റോയൽസ് (2023)

2023 സീസണിൽ രാജസ്ഥാൻ റോയൽസിന് പ്ലേഓഫിൽ കടക്കാൻ സാധിച്ചില്ലെങ്കിലും യശസ്വി ജയ്‌സ്വാൾ എന്ന യുവ ഓപ്പണറുടെ പ്രകടനം ആ സീസണിലെ വലിയ സവിശേഷതയായിരുന്നു. ആ വർഷം കളിച്ച 14 മത്സരങ്ങളിൽ നിന്നായി ജയ്‌സ്വാൾ 625 റൺസ് അടിച്ചുകൂട്ടി. 48.07 ശരാശരിയിലും 163.61 സ്‌ട്രൈക്ക് റേറ്റിലും കളിച്ച താരം മുംബൈ ഇന്ത്യൻസിനെതിരെ 124 റൺസ് നേടി മികച്ച സ്കോറും കുറിച്ചിരുന്നു.

3. ഷോൺ മാർഷ് (616 റൺസ്) - പഞ്ചാബ് കിങ്സ് (2008)

ഐപിഎല്ലിന്റെ ഉദ്ഘാടന സീസണായ 2008-ൽ കിങ്സ് ഇലവൻ പഞ്ചാബിനായി (ഇപ്പോഴത്തെ പഞ്ചാബ് കിങ്സ്) ഓപ്പൺ ചെയ്ത ഓസ്‌ട്രേലിയൻ താരം ഷോൺ മാർഷ് അവിശ്വസനീയ ഫോമിലായിരുന്നു. വെറും 11 മത്സരങ്ങളിൽ നിന്ന് 68.44 ശരാശരിയിൽ 616 റൺസ് അടിച്ചുകൂട്ടി മാർഷ് ആ വർഷത്തെ ഓറഞ്ച് ക്യാപും സ്വന്തമാക്കി. ഒരു സെഞ്ച്വറിയും അഞ്ച് ഫിഫ്റ്റികളും താരം ആ സീസണിൽ നേടിയിരുന്നു.

IPL 2026: കളി ജയിക്കുന്നത് എങ്ങനെയെന്ന് ഇപ്പോഴും അറിയില്ല, സൺറൈസേഴ്സ് പക്വതയില്ലാത്ത ടീം! തുറന്നടിച്ച് അശ്വിൻ
4. റിയാൻ പരാഗ് (573 റൺസ്) - രാജസ്ഥാൻ റോയൽസ് (2024)

2019-ൽ ഐപിഎൽ അരങ്ങേറ്റം കുറിച്ചെങ്കിലും റിയാൻ പരാഗ് എന്ന അസം താരം തന്റെ പൂർണ്ണ ഫോമിലേക്ക് ഉയർന്നത് 2024 സീസണിലാണ്. രാജസ്ഥാൻ റോയൽസ് ക്വാളിഫയർ 2-ൽ എത്തിയ ആ സീസണിൽ മിഡിൽ ഓർഡറിൽ തിളങ്ങിയ പരാഗ് 14 ഇന്നിങ്സുകളിൽ നിന്ന് 573 റൺസ് നേടി. 52.09 ശരാശരിയിൽ ബാറ്റ് ചെയ്ത താരം നാല് അർദ്ധസെഞ്ച്വറികളും സ്വന്തമാക്കിയിരുന്നു.

5. പ്രഭ്സിമ്രാൻ സിങ് (549 റൺസ്) - പഞ്ചാബ് കിങ്സ് (2025)

കഴിഞ്ഞ 2025 ഐപിഎൽ സീസണിൽ പഞ്ചാബ് കിങ്സ് റണ്ണേഴ്സ്-അപ്പായപ്പോൾ ടീമിന്റെ പ്രധാന കരുത്തായി മാറിയത് ഓപ്പണർ പ്രഭ്സിമ്രാൻ സിങ്ങാണ്. റൈറ്റ് ഹാൻഡ് ബാറ്ററായ പ്രഭ്സിമ്രാൻ 17 ഇന്നിങ്സുകളിൽ നിന്നായി 549 റൺസ് അടിച്ചുകൂട്ടി. 32.29 ശരാശരിയിലും 160.52 സ്‌ട്രൈക്ക് റേറ്റിലും ബാറ്റ് വീശിയ താരം നാല് അർദ്ധസെഞ്ച്വറികളും നേടി ടീമിന്റെ കുതിപ്പിൽ നിർണായക പങ്കുവഹിച്ചു.