അവനെ തൊട്ടാൽ കളി മാറും! ഫൈനലിൽ ബാറ്റുകൊണ്ട് പ്രതികാരം വീട്ടാൻ വൈഭവിന് തിലകിന്റെ പച്ചക്കൊടി!

ശ്രീലങ്ക എ ടീമിനെതിരായ മത്സരത്തിലെ നാടകീയമായ തർക്കങ്ങൾക്കും വിലക്കിനും പിന്നാലെ, ഇന്ത്യൻ ക്രിക്കറ്റിലെ 15-കാരൻ അത്ഭുത പ്രതിഭ വൈഭവ് സൂര്യവംശിയെ പൂർണ്ണമായി പിന്തുണച്ച് ഇന്ത്യ എ ക്യാപ്റ്റൻ തിലക് വർമ്മ രംഗത്ത്. നിലവിൽ നടക്കുന്ന ലിസ്റ്റ് എ ത്രിരാഷ്ട്ര പരമ്പരയുടെ ഫൈനലിൽ ഇന്ത്യ എയും ശ്രീലങ്ക എയും വീണ്ടും നേർക്കുനേർ വരാനിരിക്കെയാണ് ക്യാപ്റ്റന്റെ ഈ നിർണ്ണായക പ്രതികരണം.

IND vs AFG: ആദ്യ ബോള്‍ എറിയും മുമ്പ് ഇന്ത്യക്ക് 5 റണ്‍സ്!! ഇതെങ്ങനെ? കാരണമറിയാം
കഴിഞ്ഞ മത്സരത്തിലെ സൂപ്പർ ഓവർ തോൽവിക്ക് പിന്നാലെ വൈഭവും ശ്രീലങ്കൻ താരങ്ങളും തമ്മിൽ മൈതാനത്ത് വെച്ച് കടുത്ത വാക്കുതർക്കവും കൈയാങ്കളിയും ഉണ്ടായിരുന്നു. ഇതിനെത്തുടർന്ന് വൈഭവിന് മാച്ച് ഫീസിന്റെ 50 ശതമാനം പിഴയും ചുമത്തിയിരുന്നു. ഈ വിവാദങ്ങളുടെ പശ്ചാത്തലത്തിൽ, സ്പോർട്സ്റ്റാറിന് നൽകിയ പ്രത്യേക അഭിമുഖത്തിലാണ് തിലക് വർമ്മ ടീമിലെ ഏറ്റവും പ്രായം കുറഞ്ഞ താരത്തിന് പിന്തുണ പ്രഖ്യാപിച്ചത്.

യുവതാരങ്ങളെ വളർത്തിയെടുക്കുന്നതിൽ രോഹിത് ശർമ്മയുടെ ശൈലി താൻ കടമെടുത്തിട്ടുണ്ടെന്ന് തിലക് വ്യക്തമാക്കി: "അണ്ടർ-19 ക്രിക്കറ്റിൽ നിന്നും ഐപിഎല്ലിൽ നിന്നും സീനിയർ ടീമിലേക്കുള്ള ഈ മാറ്റം വൈഭവിന് തീർച്ചയായും വെല്ലുവിളി നിറഞ്ഞതായിരിക്കും. എന്നാൽ അവൻ അസാധ്യ പ്രതിഭയാണ്. അവൻ ഒരിക്കൽ കളംപിടിച്ചാൽ ഒറ്റയ്ക്ക് മത്സരം ജയിപ്പിക്കാൻ ശേഷിയുള്ളവനാണ്. വൈഭവിനെപ്പോലുള്ള യുവതാരങ്ങൾക്ക് ഇപ്പോൾ വേണ്ടത് പൂർണ്ണ സ്വാതന്ത്ര്യവും പിന്തുണയുമാണ്."

"നിന്റെ സ്വാഭാവിക ഗെയിം കളിക്കാനും, അനാവശ്യ സമ്മർദ്ദമില്ലാതെ കളി ആസ്വദിക്കാനുമാണ് ഞാൻ അവനോട് പറഞ്ഞിട്ടുള്ളത്. ഈ പ്രായത്തിൽ കാര്യങ്ങൾ പഠിക്കാനും ഭയമില്ലാതെ കളിക്കാനുമാണ് നോക്കേണ്ടത്. ഒരു ക്യാപ്റ്റൻ എന്ന നിലയിൽ ഞാൻ എപ്പോഴും അവനൊപ്പമുണ്ട്. ഫൈനലിൽ അവൻ തകർപ്പൻ പ്രകടനം പുറത്തെടുക്കുമെന്നാണ് ഞങ്ങൾ പ്രതീക്ഷിക്കുന്നത്," തിലക് വർമ്മ കൂട്ടിച്ചേർത്തു.

IND vs AFG: ഇത്ര ബുദ്ധിയില്ലേ? അവന് എന്തിന് വിശ്രമം!! ഗംഭീറിനെതിരേ തുറന്നടിച്ച് മുന്‍ താരം
ഐപിഎൽ 2026-ലെ രാജാവ്!

​ഗ്രൂപ്പ് ഘട്ടത്തിൽ രാജസ്ഥാൻ റോയൽസിനായി (RR) റൺവേട്ട നടത്തിയ വൈഭവ് സൂര്യവംശി ഐപിഎൽ 2026-ലെ ഓറഞ്ച് ക്യാപ്പും മോസ്റ്റ് വാല്യുബിൾ പ്ലെയർ (MVP) പുരസ്കാരവും സ്വന്തമാക്കിയിരുന്നു. വെറും 15 വയസ്സിൽ ഐപിഎൽ ഭരിച്ച ഈ ഇടംകൈയൻ ബാറ്റർ, വരാനിരിക്കുന്ന ഇന്ത്യയുടെ അയർലൻഡ്, ഇംഗ്ലണ്ട് പര്യടനങ്ങൾക്കുള്ള സീനിയർ ടീമിലും ഏഷ്യൻ ഗെയിംസ് 2026-നുള്ള സ്ക്വാഡിലും ഇടംപിടിച്ചിട്ടുണ്ട്. ശ്രീലങ്കയ്‌ക്കെതിരായ കലാശപ്പോരാട്ടത്തിൽ കനത്ത പ്രതികാരം വീട്ടാൻ തന്നെയാണ് വൈഭവും തിലക് വർമ്മയുടെ നേതൃത്വത്തിലുള്ള ഇന്ത്യ എ ടീമും ലക്ഷ്യമിടുന്നത്.

ഇന്ത്യ, ശ്രീലങ്ക, അഫ്​ഗാനിസ്ഥാൻ ടീമുകളുടെ എ ഡിവിഷൻ മാറ്റുരച്ച ട്രൈ സീരീസിന്റെ ഫൈനലിൽ ഇന്ത്യ എ ഇന്ന് ശ്രീലങ്ക എയെ നേരിടും. വലിയ പ്രതീക്ഷകളോടെയാണ് തിലക് വർമ്മയുടെ നേതൃത്വത്തിൽ ഇറങ്ങുന്ന ഇന്ത്യ എ കളംപിടിക്കാൻ ഒരുങ്ങുന്നത്. മുൻപ് നടന്ന വിവാദങ്ങൾക്കെല്ലാം ബാറ്റുകൊണ്ട് ചുട്ട മറുപടി കൊടുക്കാനായിരിക്കും സൂപ്പർ താരം വൈഭവ് സൂര്യവംശിയും ശ്രമിക്കുക.