T20 World Cup 2022: രോഹിത്തും രാഹുലും വീണ്ടും പരാജയം! തല കുനിയുമ്പോഴും റെക്കോര്‍ഡ് നേടി രോഹിത്

ദക്ഷിണാഫ്രിക്കയ്‌ക്കെതിരെ ആദ്യ ഓവറില്‍ ഇന്ത്യന്‍ ഓപ്പണര്‍മാരായ കെഎല്‍ രാഹുലിനും രോഹിത് ശര്‍മയ്ക്കും റണ്ണൊന്നും നേടാനായില്ലായിരുന്നു. എന്നാല്‍ പിന്നീട് കിടിലന്‍ സിക്‌സറുകള്‍ പറത്തി രോഹിത്തും രാഹുലും പ്രതീക്ഷ നല്‍കിയിലെങ്കിലും അടുത്തടുത്തായി പുറത്താവുകയായിരുന്നു ഇരുവരും. ഇന്നത്തെ മത്സരത്തോടെ ഒരു റെക്കോര്‍ഡ് രോഹിത് ശര്‍മ സ്വന്തം പേരിലാക്കിയിട്ടുണ്ട്.

Also Read:T20 World Cup 2022: എന്താണ് ഹൂഡയുടെ റോള്‍? ബൗളിങ് വീണ്ടും ദുര്‍ബലം! സെലക്ഷനെതിരേ ഗംഭീര്‍

ഇന്ത്യയ്ക്കായി തന്റെ 36-ാമത്തെ ട്വന്റി-20 ലോകകപ്പ് മത്സരത്തിനായാണ് രോഹിത് ശര്‍മ ഇന്നിറങ്ങിയിരിക്കുന്നത്. ഇതിലൂടെ ശ്രീലങ്കയുടെ മുന്‍ താരം തിലകരത്‌നെ ദില്‍ഷനെ പിന്നിലാക്കിയിരിക്കുകയാണ് രോഹിത് ശര്‍മ. 34 മത്സരം കളിച്ച ഷാഹിദ് അഫ്രീദിയും ഡ്വെയ്ന്‍ ബ്രാവോയും ഷൊയ്ബ് അക്തറുമാണ് പിന്നിലുള്ളത്. നിലവില്‍ കളിക്കുന്ന താരങ്ങളില്‍ പിന്നിലുള്ളത് 34 മത്സരം കളിച്ച ഷാക്കിബ് അല്‍ ഹസന്‍ മാത്രമാണ്. 2007 ലെ പ്രഥമ ലോകകപ്പ് മുതല്‍ രോഹിത് ഇന്ത്യന്‍ ടീമിലുള്ളത്. ക്യാപ്റ്റനായി രോഹിത്തിന്റെ ആദ്യത്തെ ട്വന്റി-20 ലോകകപ്പാണിത്.

അതേസമയം രോഹിത് നല്ലൊരു പ്രതീക്ഷ നല്‍കിയ ശേഷം പുറത്താവുകയായിരുന്നു ഇന്നത്. 14 പന്തില്‍ 15 റണ്‍സ് മാത്രമാണ് രോഹിത് ശര്‍മയ്ക്ക് ഇന്ന് നേടാനായത്. ഇതോടെ ദക്ഷിണാഫ്രിക്കയ്‌ക്കെതിരെ 2016 ന് ശേഷമുള്ള തന്റെ മോശം ഫോം തുടരുകയാണ് രോഹിത് ശര്‍മ. 2016 ന് ശേഷം ദക്ഷിണാഫ്രിക്കയ്‌ക്കെതിരെ ട്വന്റി-20 യില്‍ രോഹിത് നേടിയത് സ്‌കോര്‍ 21, 0, 11, 12, 9,0, 43, 0, 15 എന്നിങ്ങനെയാണ്.

രോഹിത്തിനൊപ്പം ഓപ്പണര്‍ കെഎല്‍ രാഹുലും ഇന്ന് പരാജയപ്പെട്ടു. ലോകകപ്പില്‍ ഇതുവരെ തിളങ്ങാന്‍ സാധിച്ചിട്ടില്ല രാഹുലിന്. ലോകകപ്പിന് മുമ്പ് റണ്ണുകള്‍ നേടിയെങ്കിലും രാഹുലിന്റെ മത്സരത്തോടുള്ള സമീപനം വിമര്‍ശനം നേടിയിരുന്നു. പിന്നീട് താരം ആക്രമണോത്സുക ക്രിക്കറ്റ് പുറത്തെടുത്തെങ്കിലും ലോകകപ്പില്‍ കളിച്ച മൂന്ന് മത്സരങ്ങളിലും രാഹുല്‍ പരാജയമാണ്. ഇന്ന് 14 പന്തില്‍ ഒമ്പത് റണ്‍സ് മാത്രമാണ് രാഹുലിന് നേടാന്‍ സാധിച്ചിത്. കഴിഞ്ഞ രണ്ട് മത്സരത്തിലും അര്‍ധ സെഞ്ചുറി നേടിയ വിരാട് കോലി ഇന്ന് 12 റണ്‍സ് മാത്രമാണ് നേടിയത്. രാഹുലിനേയും രോഹിത്തിനേയും കോലിയേയും പുറത്താക്കിയത് ലുങ്കി എന്‍ഗിഡിയാണ്.