ആ പഴയ ഗില്ലല്ല ഇത്, അവൻ കളി ജയിപ്പിക്കാൻ പഠിച്ചു കഴിഞ്ഞു! ​ഇന്ത്യൻ നായകനെ പുകഴ്ത്തി മുൻ താരം

അഫ്ഗാനിസ്ഥാനെതിരെയുള്ള ഒന്നാം ഏകദിനത്തിൽ തകർപ്പൻ ബാറ്റിംഗിലൂടെ ഇന്ത്യയെ വിജയതീരത്തെത്തിച്ച ക്യാപ്റ്റൻ ശുഭ്മൻ ഗില്ലിന്റെ പക്വതയെയും ബാറ്റിംഗ് പരിണാമത്തെയും പ്രശംസ കൊണ്ട് മൂടി മുൻ ഇന്ത്യൻ താരം മനോജ് തിവാരി. ധർമ്മശാലയിൽ ശനിയാഴ്ച നടന്ന മത്സരത്തിൽ 66 പന്തിൽ പുറത്താകാതെ 84 റൺസ് നേടിയാണ് ഗിൽ ഇന്ത്യൻ വിജയത്തിന് അടിത്തറയിട്ടത്. മഴ വില്ലനായതോടെ 25 ഓവറാക്കി ചുരുക്കിയ മത്സരത്തിൽ ഇന്ത്യ വിജയം കൊയ്തു.

IND vs AFG: രോഹിത്തിന്റെ റണ്ണൗട്ട്, തെറ്റ് ഗില്ലിന്റേതോ? ഇതാണ് സത്യം!! വൈറലായി വീഡിയോ
തന്റെ പഴയ കളിക്കളത്തിലെ ശീലങ്ങളിൽ നിന്നും ഗിൽ ഒരുപാട് മാറിയിട്ടുണ്ടെന്ന് തിവാരി ചൂണ്ടിക്കാണിച്ചു. പണ്ടായിരുന്നെങ്കിൽ ലക്ഷ്യത്തിന് തൊട്ടടുത്തെത്തുമ്പോൾ അനാവശ്യമായ 'ഗ്ലോറി ഷോട്ടുകൾ' കളിച്ച് ഗിൽ വിക്കറ്റ് കളയുമായിരുന്നു. എന്നാൽ ഇന്നലെ ധർമ്മശാലയിൽ കണ്ടത് അങ്ങനെയല്ല. രോഹിത് ശർമ്മ നിർഭാഗ്യകരമായി റൺഔട്ടായതിന് ശേഷം വിക്കറ്റ് കാത്തുസൂക്ഷിക്കേണ്ടത് തന്റെ ഉത്തരവാദിത്തമാണെന്ന് ഗിൽ തിരിച്ചറിഞ്ഞു.

"നേരത്തെ ലക്ഷ്യത്തിന് തൊട്ടടുത്തെത്തുമ്പോൾ ആവേശം മൂത്ത് വിക്കറ്റ് വലിച്ചെറിയുന്ന സ്വഭാവം ഗില്ലിനുണ്ടായിരുന്നു. എന്നാൽ ഇപ്പോൾ അവൻ പുറത്താകാതെ നിന്ന് കളി ജയിപ്പിക്കാൻ പഠിച്ചു കഴിഞ്ഞു. ബൗളർമാർക്ക് അവനെ അത്ര പെട്ടെന്ന് വീഴ്ത്താൻ കഴിയില്ല. അവൻ സ്വയം വിചാരിച്ചാൽ മാത്രമേ ഇനി വിക്കറ്റ് നഷ്ടമാകൂ. അവനെ വെറുതെയല്ല 'പ്രിൻസ്' എന്ന് വിളിക്കുന്നത്, അവന്റെ ഇന്നിംഗ്സ് അത്രയും റോയലായിരുന്നു!" മനോജ് തിവാരി ക്രിക്ബസിനോട് പറഞ്ഞു.

ഗുജറാത്ത് ടൈറ്റൻസിന്റെ ക്യാപ്റ്റനായ ശേഷം ഗില്ലിന്റെ കളിയിലെ ഉത്തരവാദിത്തം ഇരട്ടിച്ചതായും തിവാരി വിലയിരുത്തി. ഐപിഎൽ 2026-ൽ ഗുജറാത്തിനായി നടത്തിയ മിന്നും പ്രകടനവും അഫ്ഗാനെതിരെയുള്ള ടെസ്റ്റിലെ സെഞ്ചുറിയും നൽകിയ വൻ ഫോമിലാണ് താരം ഇപ്പോഴുള്ളത്. മത്സരത്തിന്റെ അവസാന ഘട്ടത്തിൽ അനാവശ്യ ഷോട്ടുകൾക്ക് മുതിരാതെ ഒരറ്റത്ത് ഗിൽ നിലയുറപ്പിച്ചപ്പോൾ, മറുവശത്ത് കെ.എൽ രാഹുൽ 19 പന്തിൽ 39 റൺസ് അടിച്ചുകൂട്ടി ഇന്ത്യയ്ക്ക് അനായാസ വിജയം സമ്മാനിക്കുകയായിരുന്നു. ശ്രേയസ് അയ്യർ, ഇഷാൻ കിഷൻ എന്നിവരുടെ കാമിയോ ഇന്നിംഗ്സുകളും ഗില്ലിന്റെ മുകളിലെ സമ്മർദ്ദം കുറയ്ക്കാൻ സഹായിച്ചു.

IND vs AFG: സഞ്ജുവെങ്കില്‍ ഇത്രയും അബദ്ധം കാണിക്കില്ല!! കീപ്പിങില്‍ ഇഷാന് ചീത്തവിളി
ഇന്ത്യ vs അഫ്ഗാനിസ്ഥാൻ ഒന്നാം ഏകദിനം: മത്സരച്ചുരുക്കം

ധർമ്മശാലയിലെ എച്ച്‌പിസിഎ സ്റ്റേഡിയത്തിൽ നടന്ന ഇന്ത്യ-അഫ്ഗാനിസ്ഥാൻ ഒന്നാം ഏകദിന മത്സരം മഴ മൂലം ഇരു ടീമുകൾക്കും 25 ഓവർ വീതമാക്കി ചുരുക്കിയിരുന്നു. ആദ്യം ബാറ്റ് ചെയ്ത അഫ്ഗാനിസ്ഥാൻ ഉയർത്തിയ 195 റൺസ് എന്ന വിജയലക്ഷ്യം പിന്തുടർന്ന ഇന്ത്യയ്ക്ക്, ഓപ്പണർ രോഹിത് ശർമ്മ നിർഭാഗ്യകരമായി റൺഔട്ടായത് തുടക്കത്തിൽ തിരിച്ചടിയായി. എന്നാൽ മധ്യനിരയിൽ ഇഷാൻ കിഷൻ, ശ്രേയസ് അയ്യർ എന്നിവർ നൽകിയ മികച്ച പിന്തുണയോടെ ഇന്ത്യൻ ക്യാമ്പിനെ നായകൻ ​ഗിൽ തകരാതെ കാത്തു.

ഒരറ്റത്ത് ക്ഷമയോടെ നിലയുറപ്പിച്ച ക്യാപ്റ്റൻ ശുഭ്മൻ ഗിൽ 66 പന്തിൽ പുറത്താകാതെ 84 റൺസ് നേടി ഇന്ത്യയുടെ വിജയത്തിന് ശക്തമായ അടിത്തറയിട്ടു. മത്സരത്തിന്റെ അവസാന ഓവറുകളിൽ അനാവശ്യ ഷോട്ടുകൾക്ക് മുതിരാതെ ഗിൽ സ്ട്രൈക്ക് കൈമാറിയപ്പോൾ, വെടിക്കെട്ട് ബാറ്റിങ് പുറത്തെടുത്ത കെ.എൽ രാഹുൽ (19 പന്തിൽ 39*) ഇന്ത്യയെ വിജയതീരത്തെത്തിക്കുകയായിരുന്നു. ഈ തകർപ്പൻ ജയത്തോടെ 3 മത്സരങ്ങളുടെ പരമ്പരയിൽ ഇന്ത്യ 1-0 ന് മുന്നിലെത്തി. പരമ്പരയിലെ രണ്ടാം മത്സരം ജൂൺ 17 ബുധനാഴ്ച ലഖ്‌നൗവിൽ വെച്ച് നടക്കും.