ജൊഗീന്ദര് എറിഞ്ഞ ഇന്നിങ്സിലെ അവസാന ഓവറിനെക്കുറിച്ച് ഇപ്പോഴും നല്ല ഓര്മയുണ്ട്. ജൊഗിയുടെ ആദ്യത്തെ പന്ത് വൈഡായിരുന്നു. അപ്പോള് ലോങ് ഓണിലായിരുന്നു താന് ഫീല്ഡ് ചെയ്തത്. 15ാം ഓവര് മുതല് ഓരോ പന്തെറിയുമ്പോഴും താന് മനസ്സില് പ്രാര്ഥിക്കുകയായിരുന്നു. ഈ മല്സരത്തില് ജയിക്കാന് സാധിക്കണമെന്ന് മാത്രമായിരുന്നു പ്രാര്ഥനയെന്നു ബിബിസിയുടെ ദൂസര എന്ന പരിപാടിയില് ഉത്തപ്പ പറഞ്ഞു.
ജൊഗിയുടെ ആദ്യ പന്ത് വൈഡായപ്പോള് അത്ര നിരാശ തോന്നിയില്ല. അതു സാരമില്ല, സിക്സറൊന്നും ആയില്ലല്ലോയെന്നായിരുന്നു മനസ്സില് ആശ്വസിച്ചത്. എന്നാല് തൊട്ടടുത്ത പന്തില് പാകിസ്താന് സിക്സര് നേടി. എങ്കിലും ആത്മവിശ്വാസം താന് കൈവിട്ടില്ല. കമോണ്, നമുക്കാവുമെന്ന് മനസ്സില് പറഞ്ഞു കൊണ്ടിരുന്നു. ആ സാഹചര്യത്തില് കാര്യങ്ങള് പാകിസ്താന് അനുകൂലമായിരുന്നു. എങ്കിലും ഇന്ത്യക്കു ജയിക്കാന് കഴിയുമെന്നാണ് താന് മനസ്സില് ഉറച്ചു വിശ്വസിച്ചതെന്നുഉത്തപ്പ വെളിപ്പെടുത്തി.
ഇന്നിങ്സിലെ അവസാന പന്ത് നേരിട്ടത് ക്യാപ്റ്റന് മിസ്ബാഹുല് ഹഖായിരുന്നു. സ്കൂപ്പ് ഷോട്ടാണ് അദ്ദേഹം കളിച്ചത്. അത് വളരെ ഉയരത്തില് പൊങ്ങി, എന്നാല് അത് അധികം ദൂരത്തേക്കു പോയില്ലെന്നു താന് ശ്രദ്ധിച്ചു. തുടര്ന്നാണ് ഷോര്ട്ട് ഫൈന് ലെഗില് ആരാണ് ഫീല്ഡറെന്നു ശ്രദ്ധിച്ചത്. അവിടെയുള്ളത് ശ്രീശാന്താണ്.ആ ഒരു നിമിഷം വരെ ടീമിലെ ക്യാച്ചുകള് നഷ്ടപ്പെടുത്തുന്ന താരമെന്നാണ് ശ്രീശാന്ത് അറിയപ്പെട്ടിരുന്നത്. പ്രത്യേകിച്ചും വളരെ അനായാസമായ ക്യാച്ചുകള്. ഈസിയായ ക്യാച്ചുകള് പോലും ശ്രീശാന്ത് കൈവിട്ടത് താന് മുമ്പ് കണ്ടിട്ടുണ്ടെന്നും ഉത്തപ്പ വിശദമാക്കി.
ക്യാച്ചെടുക്കാന് ശ്രീശാന്ത് പന്തിനു താഴേക്ക് ഓടിയെത്തുന്നത് കണ്ടപ്പോള് താന് മനസ്സില് പ്രാര്ഥിക്കുകയായിരുന്നു. പന്ത് കൈപ്പിടിയിലൊതുക്കാന് അവനെ സഹായിക്കണം ദൈവമേയെന്നായിരുന്നു പ്രാര്ഥിച്ചത്. പ്രാര്ഥന പോലെ തന്നെ ശ്രീശാന്ത് ക്യാച്ചെടുക്കുകയും നമ്മള് വിജയിക്കുകയും ചെയ്തു.
എന്നാല് നിങ്ങള് ആ ക്യാച്ചൊന്നു കണ്ടു നോക്കൂ, പന്ത് കൈകളില് വീഴുമ്പോള് അവന് മുകളിലേക്കു തന്നെ നോക്കുകയാണ്. അതുകൊണ്ടു തന്നെ ഇപ്പോഴും താന് വിശ്വസിക്കുന്നത് ലോകകപ്പ് നമ്മള് നേടണമെന്നത് ദൈവകല്പിതമാണെന്നാണ് കരുതുന്നതെന്നും ഉത്തപ്പ കൂട്ടിച്ചേര്ത്തു.