Click it and Unblock the Notifications
ധോണിയെന്നത് ശരിക്കുമൊരു ബ്രാന്ഡ് തന്നെയാണെന്നു മോര്ക്കല് ചൂണ്ടിക്കാണിക്കുന്നു. ഇപ്പോഴും ധോണി പഴയതു പോലെ മിടുക്കനാണ്. ടീമിനെ വിജയകരമായി തന്നെ മുന്നോട്ടു കൊണ്ടുപോവാന് അദ്ദേഹത്തിനാവും. ഐപിഎല്ലിന്റെ ചരിത്രത്തില് ചെന്നൈ സൂപ്പര് കിങ്സ് ഇത്രയും മികച്ച റെക്കോര്ഡുള്ള ഫ്രാഞ്ചൈസിയായി മാറാനുള്ള പ്രധാനപ്പെട്ട കാരണവും ധോണി തന്നെയാണെന്നു മോര്ക്കല് അഭിപ്രായപ്പെട്ടു.
ധോണിയെപ്പോലൊരു ക്യാപ്റ്റനെ ലഭിക്കുകയെന്നത് ഏതു ടീമിന്റെയും ഭാഗ്യമാണ്. കാരണം സ്വന്തം ടീമിലെ കളിക്കാരില് നിന്നും ഏറ്റവും മികച്ച പ്രകടനം എങ്ങനെ പുറത്തു കൊണ്ടു വരാമെന്നു അദ്ദേഹത്തിനു നന്നായി അറിയാം. ഇതു തന്നെയാണ് ക്യാപ്റ്റനെന്ന നിലയില് ധോണിയുടെ വിജയരഹസ്യമെന്നും മോര്ക്കല് പറയുന്നു.
ഇന്ത്യയില് ധോണി എത്ര വലിയ താരമാണെന്ന് എല്ലാവര്ക്കുമറിയാവുന്നതാണ്. ലോക ക്രിക്കറ്റില് ഇതുവരെ കണ്ട ഏറ്റവും മികച്ച ടി20, ഏകദിന താരങ്ങളിലൊരാളാണ് അദ്ദേഹമെന്നും മോര്ക്കല് വിലയിരുത്തി.
ഓരോ സീസണിലും കാര്യമായ മാറ്റങ്ങള് വരുത്താതെ, ഒരേ ഗ്രൂപ്പ് കളിക്കാരെ നിലനിര്ത്തുന്നുവെന്നത് ചെന്നൈ സൂപ്പര് കിങ്സിനെ സ്ഥിരതയാര്ന്ന പ്രകടനം നടത്താന് സഹായിക്കുന്നതായി മോര്ക്കല് ചൂണ്ടിക്കാട്ടി. ദീര്ഘകാലം ഒരേ ടീമിനെ, ധോണിയെന്ന സ്ഥിരം ക്യാപ്റ്റന്റെ കീഴില് കളിപ്പിക്കുന്നത് സിഎസ്കെയ്ക്കു ഏറെ ഗുണം ചെയ്തിട്ടുണ്ട്. സിഎസ്കെ രണ്ടു വര്ഷം സസ്പെന്ഡ് ചെയ്യപ്പെട്ടപ്പോള് ഒഴികെ എല്ലാ സീസണിലും സിഎസ്കെയെ നയിച്ചത് ധോണിയായിരുന്നു. അഅദ്ദേഹത്തിനു കീഴില് കളിച് 10 സീസണുകളില് എട്ടിലും സിഎസ്കെ ഫൈനലില് എത്തിയതായും മോര്ക്കല് കൂട്ടിച്ചേര്ത്തു.
2008ലെ പ്രഥമ ഐപിഎല്ലിലാണ് മോര്ക്കല് സിഎസ്കെയ്ക്കൊപ്പം ചേരുന്നത്. 2013 വരെ സിഎസ്കെയുടെ മഞ്ഞക്കുപ്പായത്തില് അദ്ദേഹമുണ്ടായിരുന്നു. ഇതിനിടെ അഞ്ചു ഫൈനലുകളില് കളിച്ച മോര്ക്കലിന് രണ്ടു തവണ കിരീടമുയര്ത്താനും ഭാഗ്യം ലഭിച്ചു.
2013ല് സിഎസ്കെ വിട്ട ശേഷം റോയല് ചാലഞ്ചേഴ്സ് ബാംഗ്ലൂര്, ഡല്ഹി ക്യാപ്പിറ്റല്സ്, റൈസിങ് പൂനെ ജയന്റ്സ് തുടങ്ങിയ ഫ്രാഞ്ചൈസികള്ക്കു വേണ്ടിയും മോര്ക്കല് കളിച്ചിരുന്നു. കഴിഞ്ഞ വര്ഷം ക്രിക്കറ്റിന്റെ എല്ലാ ഫോര്മാറ്റില് നിന്നും വിരമിച്ച അദ്ദേഹം ഇന്ത്യയില് ഈ മാസം നടന്ന റോഡ് സേഫ്റ്റി ലോക സീരീസ് ടി20 ടൂര്ണമെന്റില് ദക്ഷിണാഫ്രിക്കന് സംഘത്തിലുണ്ടായിരുന്നു. എന്നാല് കൊറോണ വൈറസ് ഭീഷണിയെ തുടര്ന്നു ടൂര്ണമെന്റ് പാതിവഴിയില് വച്ച് റദ്ദാക്കുകയായിരുന്നു.
Continue with Google