ഐപിഎല്‍: അശ്വിന്‍ ഇനി ഡല്‍ഹിക്കൊപ്പം... പഞ്ചാബ് കൈവിട്ടു, പക്ഷെ ബോള്‍ട്ടിനെ കിട്ടിയില്ല

ബോള്‍ട്ടിനെ കിട്ടിയില്ല

1.5 കോടി രൂപയ്‌ക്കൊപ്പം കര്‍ണാടകയില്‍ നിന്നുള്ള സ്പിന്നര്‍ ജഗദീഷ സുജിത്തിനെയുമാണ് അശ്വിനു വേണ്ടി ഡല്‍ഹി പഞ്ചാബിന് കൈമാറിയത്. എന്നാല്‍ ഡല്‍ഹിയുടെ തുറുപ്പുചീട്ടായ ന്യൂസിലാന്‍ഡിന്റെ സ്റ്റാര്‍ പേസര്‍ ട്രെന്റ് ബോള്‍ട്ടിനെ റാഞ്ചാനുള്ള പഞ്ചാബിന്റെ നീക്കം വിജയിച്ചില്ല.
ബോള്‍ട്ടിനെയും സുചിത്തിനെയും ഡല്‍ഹി പഞ്ചാബിനു കൈമാറിയേക്കുമെന്നായിരുന്നു നേരത്തേയുള്ള സൂചനകള്‍. എന്നാല്‍ അവസാന വട്ട ചര്‍ച്ചയില്‍ ബോള്‍ട്ടിനെ വിട്ടുതരാനാവില്ലെന്ന് ഡല്‍ഹി ഉറപ്പിച്ചു പറയുകയായിരുന്നു. അശ്വിനെ ലഭിക്കുന്നതിനൊപ്പം ബോള്‍ട്ടിനെ നിലനിര്‍ത്താനായതും ഡല്‍ഹിക്കാണ് നേട്ടമായിരിക്കുന്നത്.

എല്ലാവര്‍ക്കും സന്തോഷം

ഈ കൈമാറ്റം യാഥാര്‍ഥ്യമായതില്‍ എല്ലാവരും ആഹ്ലാദത്തിലാണെന്നായിരുന്നു പഞ്ചാബിന്റെ സഹ ഉടമയായ നെസ് വാഡിയയുടെ പ്രതികരണം. ഇപ്പോള്‍ എല്ലാവരും സന്തോഷത്തിലാണ്. ഞങ്ങള്‍ ഹാപ്പിയാണ്, അശ്വിനും ഡല്‍ഹിയും ഹാപ്പിയാണ്. മൂന്നു ടീമുകളുമായി തങ്ങള്‍ ചര്‍ച്ചകള്‍ നടത്തിയിരുന്നു. ഇപ്പോഴാണ് അതിനൊരു അവസാനമായിരിക്കുന്നത്. അശ്വിന് എല്ലാ വിധത്തിലിലുള്ള ആശംസകളും നേരുന്നുവെന്നും അദ്ദേഹം കൂട്ടിച്ചേര്‍ത്തു. ലേലത്തിലെ വിലയായിരുന്ന 7.6 കോടി രൂപ കൈമാറ്റത്തോടൊപ്പം അശ്വിനു ലഭിക്കും.

ഔദ്യോഗിക പ്രഖ്യാപനം

നവംബര്‍ 14നാണ് ഐപിഎല്ലിന്റെ കൈമാറ്റ ജാലകം അടയ്ക്കുന്നത്. അതിനു മുമ്പ് അശ്വിനെ ടീമിലെത്തിച്ച കാര്യം ഡല്‍ഹി ഔദ്യോഗികമായി പ്രഖ്യാപിക്കുമെന്നാണ് വിവരം.
കഴിഞ്ഞ രണ്ടു സീസണുകളിലും പഞ്ചാബിന്റെ നായകനായിരുന്നു അശ്വിന്‍. ആദ്യ സീസണിന്റെ ഒന്നാം പകുതിയില്‍ അശ്വിനു കീഴില്‍ മികച്ച പ്രകടനം നടത്തിയ പഞ്ചാബ് പിന്നീട് ഫോം നിലനിര്‍ത്താനാവാതെ പാടുപെടുകയായിരുന്നു. 2018ലെ ഐപിഎല്ലില്‍ എട്ടാംസ്ഥാനത്തും അവസാന സീസണില്‍ ആറാം സ്ഥാനത്തുമാണ് പഞ്ചാബ് ഫിനിഷ് ചെയ്തത്.