IPL 2022: സിഎസ്‌കെയില്‍ ഇനി എത്രനാള്‍ ? വെളിപ്പെടുത്തി എംഎസ് ധോണി

അടുത്ത വര്‍ഷവും സിഎസ്‌കെയുടെ നായകനായി ധോണി എത്താന്‍ സാധ്യത കൂടുതലാണ്. നിലവിലെ സാഹചര്യത്തില്‍ സിഎസ്‌കെയ്ക്ക് ധോണിയല്ലാതെ മറ്റൊരു നായകനല്ല. പരിഗണിക്കാന്‍ സാധിക്കുന്ന ഏക താരം രവീന്ദ്ര ജഡേജയായിരുന്നു. എന്നാല്‍ നായകസ്ഥാനം തനിക്ക് പറ്റുന്ന പളിയല്ലെന്ന് ജഡേജ തന്നെ തുറന്ന് സമ്മതിച്ചിട്ടുള്ളതാണ്. ഈ സാഹചര്യത്തില്‍ സിഎസ്‌കെ പുതിയ നായകനെ കണ്ടെത്തി ടീമിലേക്കെത്തിക്കേണ്ടതായുണ്ട്.

ജഡേജയെ നായകനാക്കിയപ്പോള്‍ പ്രതീക്ഷകളേറെയായിരുന്നെങ്കിലും അദ്ദേഹത്തിന് മികവ് കാട്ടാനായില്ല. ഇതോടെ നായകസ്ഥാനത്ത് നിന്ന് വഴിമാറിക്കൊടുക്കേണ്ടി വന്നു. ജഡേജയുടെ കരിയറിലേക്ക് നോക്കുമ്പോള്‍ ഏറ്റവും ഉചിതമായ തീരുമാനമാണ് അദ്ദേഹം എടുത്തിരിക്കുന്നത്. എന്നാല്‍ അടുത്ത വര്‍ഷം ധോണി കളിക്കാതിരുന്നാല്‍ പകരമാരെന്നത് വലിയ ചോദ്യമാണ്. നിലവിലെ സാധ്യതകള്‍ പ്രകാരം ധോണി തീര്‍ച്ചയായും സിഎസ്‌കെയിലുണ്ടാവും. എന്നാല്‍ സാഹചര്യം മാറി ധോണി കളിനിര്‍ത്താന്‍ തീരുമാനിച്ചാല്‍ സിഎസ്‌കെയ്ക്കത് കടുത്ത തിരിച്ചടിയാവുമെന്നുറപ്പ്.

ജഡേജ നായകസ്ഥാനം പാതിവഴിയില്‍ ഉപേക്ഷിക്കാനുള്ള തീരുമാനത്തെക്കുറിച്ചും ധോണി പ്രതികരിച്ചു. ജഡേജയുടെ പ്രകടനം മോശമായ സാഹചര്യത്തിലാണ് ഇത്തരമൊരു തീരുമാനമെടുത്തതെന്നാണ് ധോണി പറഞ്ഞത്. ജഡേജയുടെ മികച്ച പ്രകടനം സിഎസ്‌കെയ്ക്ക് അത്യാവശ്യമാണ്. എന്നാല്‍ നായകന്റെ സമ്മര്‍ദ്ദം ജഡേജയെ ബാധിക്കുന്നു. ക്യാപ്റ്റന്‍സിയില്‍ ആദ്യ രണ്ട് മത്സരത്തില്‍ സഹായിച്ചു. എന്നാല്‍ സ്പൂളില്‍ കോരി നല്‍കാവുന്ന കാര്യമല്ല അതെന്നും ധോണി പറഞ്ഞു.

സീനിയര്‍ താരങ്ങളെവെച്ച് അത്ഭുതങ്ങള്‍ സൃഷ്ടിക്കുന്ന സിഎസ്‌കെയ്ക്ക് ഇത്തവണ ആ മാജിക് കാട്ടാനായിട്ടില്ല. റോബിന്‍ ഉത്തപ്പ, അമ്പാട്ടി റായിഡു, റുതുരാജ് ഗെയ്ക് വാദ് എന്നിവര്‍ക്ക് സ്ഥിരതയില്ല. മോയിന്‍ അലിക്ക് അവസാന സീസണിലെ വെടിക്കെട്ട് ആവര്‍ത്തിക്കാനുമാവുന്നില്ല. ഈ സാഹചര്യത്തില്‍ സിഎസ്‌കെയുടെ എല്ലാ കണക്കുകൂട്ടലുകളും പിഴച്ചു. അവസാന സീസണിലെ ചാമ്പ്യന്മാരായ സിഎസ്‌കെ ഇത്തവണ പ്ലേ ഓഫില്‍ കടക്കാന്‍ ഇനി അത്ഭുതങ്ങള്‍ സംഭവിക്കണം. എന്തായാലും അടുത്ത സീസണില്‍ അടിമുടി മാറ്റം സിഎസ്‌കെയിലുണ്ടാവുമെന്ന കാര്യം ഉറപ്പാണ്. ധോണി നായകനായി തുടരുമോയെന്നത് കാത്തിരുന്ന് കാണാം.