IPL 2020: മുംബൈയുടെ മിന്നും പ്രകടനം- കാരണമെന്ത്? തുറന്നു പറഞ്ഞ് ക്രുനാല്‍ പാണ്ഡ്യ

ടീമിന്റെ തയ്യാറെടുപ്പ്

ഐപിഎല്ലിനു വേണ്ടി ഈ സീസണില്‍ മുംബൈ നടത്തിയ തയ്യാറെടുപ്പാവാം കളിക്കളത്തില്‍ ഇപ്പോള്‍ പ്രതിഫലിക്കുന്നതെന്നു ക്രുനാല്‍ വ്യക്തമാക്കി. യുഎഇയിലെത്തുന്നതിനു മുമ്പ് ടീമിന് ഒരു മാസത്തെ ക്യാംപ് സംഘടിപ്പിച്ചിരുന്നു. മുഴുവന്‍ താരങ്ങളും ഈ ക്യാംപില്‍ പങ്കെടുക്കുകയും ടൂര്‍ണമെന്റിനായി തയ്യാറെടുപ്പ് നടത്തുകയും ചെയ്തിരുന്നു. മുംബൈയില്‍ ഞങ്ങള്‍ ഒരുമിച്ചായിരുന്നു പരിശീലനം.
കഴിഞ്ഞ മൂന്നു നാലു മാസത്തോളമായി ഒരുമിച്ചായതിനാല്‍ വ്യക്തിപരമായി പരസ്പരം നന്നായി മനസ്സിലാക്കാന്‍ സാധിച്ചു. ഇപ്പോള്‍ നിങ്ങള്‍ കളിക്കളത്തില്‍ കാണുന്നത് ഈ തയ്യാറെടുപ്പിന്റെ ഫലമാണെന്നും ക്രുനാല്‍ വ്യക്തമാക്കി.

രോഹിത്തിന്റെ പിന്തുണ

ക്യാപ്റ്റന്‍ രോഹിത് ശര്‍മ തന്റെ ബൗളര്‍മാര്‍ക്കു നല്‍കുന്ന പിന്തുണയെ ക്രുനാല്‍ പ്രശംസിച്ചു. ഏതൊരു ബൗളറും ഇത്തരമൊരു ക്യാപ്റ്റനെയാണ് ആഗ്രഹിക്കുകയെന്നും അദ്ദേഹം അഭിപ്രായപ്പെട്ടു.
ബൗളറുടെ മികവ് എന്താണോ അത് തിരിച്ചറിഞ്ഞ ശേഷം അതിനെ പിന്തുണയ്ക്കുന്നുവെന്നതാണ് രോഹിത്തിന്റെ ഏറ്റവും വലിയ ഗുണം. കാര്യങ്ങളെ കൂടുതല്‍ സങ്കീര്‍ണമാക്കുന്നത് രോഹിത്തിന് ഇഷ്ടമല്ല. നിങ്ങള്‍ എന്തു തന്ന ചെയ്താലും അതിന് രോഹിത്തിന്റെ പിന്തുണയുണ്ടാവും. ഇതാണ് അദ്ദേഹത്തെ വളരെ സ്‌പെഷ്യലായ ക്യാപ്റ്റനാക്കി മാറ്റുന്നതെന്നും ക്രുനാല്‍ കൂട്ടിച്ചേര്‍ത്തു.

മുംബൈ പഞ്ചാബിനെതിരേ

ഇന്നു രാത്രി കെഎല്‍ രാഹുല്‍ നയിക്കുന്ന കിങ്‌സ് ഇലവന്‍ പഞ്ചാബിനെതിരേയാണ് മുംബൈയുടെ അടുത്ത മല്‍സരം. ജയത്തോടെ ഡല്‍ഹി ക്യാപ്പിറ്റല്‍സില്‍ നിന്നും പോയിന്റ് പട്ടികയിലെ ഒന്നാംസ്ഥാനം തിരിച്ചു പിടിക്കുന്നതിനൊപ്പം പ്ലേഓഫിലേക്കു ഒരു പടി കൂടി അടുക്കുകയെന്ന ലക്ഷ്യത്തോടെയാണ് ഹിറ്റ്മാനും സംഘവും ഇറങ്ങുക.
നേരത്തേ ഈ സീസണിലെ ആദ്യപാദത്തില്‍ നേര്‍ക്കു നേര്‍ വന്നപ്പോള്‍ പഞ്ചാബിനെതിരേ വിജയം മുംബൈയ്ക്കായിരുന്നു. 48 റണ്‍സിനാണ് മുംബൈ ജയിച്ചു കയറിയത്. ഈ വിജയം ആവര്‍ത്തിക്കാന്‍ മുംബൈയ്ക്കാവുമോയെന്നാണ് ഇനി അറിയാനുള്ളത്. പ്ലേഓഫ് പ്രതീക്ഷകള്‍ നിലനിര്‍ത്തണമെങ്കില്‍ പഞ്ചാബിനെതിരേ മുംബൈയ്ക്കു വിജയം അനിവാര്യമാണ്.