ഇന്ത്യയുടെ പോക്ക് ശരിയല്ല!! ബുംറ മാത്രമോ ബൗളര്‍? വിമര്‍ശനവുമായി നെഹ്‌റ

കളിക്കുന്ന എല്ലാ പരമ്പരകളിലും ബുംറ ഇന്ത്യക്കു വേണ്ടി വിക്കറ്റ് കൊയ്ത്ത് നടത്തുമെന്ന് ഒരിക്കലും പ്രതീക്ഷിക്കരുത്. അദ്ദേഹം പരിക്ക് മാറിയാണ് തിരിച്ചെത്തിയതെന്നു ഓര്‍മിക്കണം.
എല്ലായ്‌പ്പോഴും ഒരാള്‍ക്കു ടോപ്പ് ഫോമില്‍ കളിക്കുകയെന്നത് ബുദ്ധിമുട്ടുള്ള കാര്യമാണ്. വിരാട് കോലിക്കു പോലും കടുപ്പമേറിയ പരമ്പരയായിരുന്നു ന്യൂസിലാന്‍ഡിനെതിരയുള്ളതെന്നും നെഹ്‌റ ചൂണ്ടിക്കാട്ടി.

ഇന്ത്യന്‍ ടീം സെലക്ഷനില്‍ ടീം മാനേജ്‌മെന്റ് കൂടുതല്‍ സ്ഥിരത പുലര്‍ത്തേണ്ടതുണ്ടെന്നും നെഹ്‌റ നിര്‍ദേശിച്ചു. പ്ലെയിങ് ഇലവനെ തിരഞ്ഞെടുക്കുന്ന കാര്യത്തില്‍ ടീം മാനേജ്‌മെന്റ് കുറക്കൂടി ശ്രദ്ധ പുലര്‍ത്തണം. ബുംറ, ഷമി എന്നിവരെക്കൂടാതെ ടീമിലെ മറ്റു പേസര്‍മാരും തങ്ങളുടെ റോളുകള്‍ മനസ്സിലാക്കിയിരിക്കണം.

കഴിഞ്ഞ രണ്ടു വര്‍ഷത്തോളമായി ബുംറയും ഷമിയും ചേര്‍ന്നാണ് വിക്കറ്റ് കൊയ്ത്ത് നടത്തിക്കൊണ്ടിരിക്കുന്നത്. ബുംറയ്ക്കു മേല്‍ കടുത്ത സമ്മര്‍ദ്ദമുണ്ട്. ടീം സെലക്ഷനില്‍ ഇപ്പോള്‍ സ്ഥിരത വളരെ കുറവാണെന്നും നെഹ്‌റ കൂട്ടിച്ചേര്‍ത്തു.

ടെസ്റ്റില്‍ നിലവില്‍ ഇന്ത്യയുടെ ഏറ്റവും മികച്ച ബൗളര്‍ മുഹമ്മദ് ഷമിയാണെന്നു നെഹ്‌റ അഭിപ്രായപ്പെട്ടു. പിച്ചിനെയും സാഹചര്യങ്ങളെയും ആശ്രയിക്കുന്നില്ലെന്നതാണ് ഷമിയുടെ ഏറ്റവും വലിയ കരുത്തെന്നും അദ്ദേഹം പറഞ്ഞു.

അന്താരാഷ്ട്ര ക്രിക്കറ്റില്‍ ഉമേഷ് യാദവിനേക്കാള്‍ മികച്ച രീതിയില്‍ തയ്യാറെടുപ്പ് നടത്തുന്നത് നവദീപ് സെയ്‌നിയാണ്. കൂടുതല്‍ നേട്ടങ്ങള്‍ കൊയ്യണമെങ്കില്‍ ലെങ്തില്‍ സെയ്‌നി കുറേക്കൂടി ശ്രദ്ധിക്കണമെന്നും ഷമി ആവശ്യപ്പെട്ടു.