IND vs ENG: അഞ്ചാം ടി20യില്‍ ഇന്ത്യ ഫേവറിറ്റുകള്‍! കാരണം വ്യക്തമാക്കി മൈക്കല്‍ വോന്‍

ഇന്ത്യ രണ്ടു തരത്തിലും ജയിച്ചു

ഇന്നത്തെ കളിയില്‍ ഇന്ത്യ ജയിക്കുമെന്നാണ് എനിക്കു തോന്നുന്നത്. കളിയില്‍ അവര്‍ക്കു മുന്‍തൂക്കമുണ്ട്. കാരണം പരമ്പരയില്‍ രണ്ടു തരത്തിലും വിജയിച്ച ഏക ടീമാണ് ഇന്ത്യ. ഇംഗ്ലാണ്ടാവട്ടെ ഒരു തരത്തില്‍ മാത്രമേ ജയിച്ചിട്ടുള്ളൂ, റണ്‍ചേസിലൂടെയയായിരുന്നു അത്. എന്നാല്‍ ഇന്ത്യ റണ്‍ചേസിലൂടെ മാത്രമല്ല ആദ്യം ബാറ്റ് ചെയ്തും വിജയിക്കാന്‍ കഴിഞ്ഞ ടീമാണ്. ഇതു തന്നെയാണ് ഇന്ത്യയെ ഫേവറിറ്റുകളാക്കുന്നതെന്നും വോന്‍ വിശദമാക്കി.

ഇന്ത്യന്‍ വിജയം ശുഭസൂചന

നാലാം ടി20യില്‍ ഇന്ത്യ നേടിയ വിജയം ക്രിക്കറ്റിനെ സംബന്ധിച്ചു ശുഭസൂചനയാണെന്നു വോന്‍ ചൂണ്ടിക്കാട്ടി. ക്രിക്കറ്റിനെ സംബന്ധിച്ച് മികച്ച ഫലമാണ് ഇന്ത്യയുടെ വിജയം. കാരണം ഇന്ത്യ വളരെ കടുപ്പമേറിയ തരത്തിലാണ് കളി ജയിച്ചത്. കഴിഞ്ഞ കുറച്ചു മല്‍സരങ്ങള്‍ക്കു ശേഷം പ്രധാന ചര്‍ച്ച ഇന്ത്യയില്‍ ടോസ് ജയിച്ചാല്‍ നിങ്ങള്‍ കളിയും ജയിക്കുമെന്നായിരുന്നു.
പക്ഷെ നാലാം ടി20യില്‍ ഇന്ത്യ ആദ്യം ബാറ്റ് ചെയ്ത് മികച്ച ടോട്ടല്‍ പടുത്തുയര്‍ത്തി. അഞ്ചു ബൗളര്‍മാരെ വച്ച് ഈ സ്‌കോര്‍ പ്രതിരോധിച്ച് വിജയിക്കുകയും ചെയ്തു. ഈ മിടുക്ക് തന്നെയാണ് അഞ്ചാം ടി20യില്‍ ഇന്ത്യക്കു മുന്‍തൂക്കം നല്‍കുന്നതെന്നും വോന്‍ കൂട്ടിച്ചേര്‍ത്തു.

രോഹിത്- ഇഷാന്‍ ഓപ്പണിങ്

അഞ്ചാം ടി20യില്‍ കെഎല്‍ രാഹുലിന് പകരം രോഹിത് ശര്‍മയോടൊപ്പം ഇഷാന്‍ കിഷന്‍ ഇന്ത്യക്കു വേണ്ടി ഓപ്പണ്‍ ചെയ്യണമെന്നാണ് തന്റെ അഭിപ്രായമെന്നു വോന്‍ പറഞ്ഞു. ഇഷാന്‍ ഫിറ്റാണെങ്കില്‍ രാഹുലിനെ ഇന്ത്യ ഒഴിവാക്കണം. ഒരു മല്‍സരം മാറ്റി നിര്‍ത്തിയാല്‍ രാഹുലിനേക്കാല്‍ ആത്മവിശ്വാസത്തോടെയും വ്യക്തതയോടെയും ബാറ്റ് ചെയ്തത് ഇഷാനായിരുന്നു. രാഹുലിനെ എന്നന്നേക്കുമായി ഇന്ത്യ ഒഴിവാക്കണമെന്ന് ഞാന്‍ പറയില്ല. പക്ഷെ ഈ ഘട്ടത്തില്‍ ആത്മവിശ്വാസത്തോടെയല്ല അദ്ദേഹം കളിക്കുന്നത്. അതിനാല്‍ ഇഷാനെക്കൊണ്ട് ഓപ്പണ്‍ ചെയ്യിക്കുന്നതാണ് നല്ലതെന്നും വോന്‍ അഭിപ്രായപ്പെട്ടു.