ധോണി എവര്‍ഗ്രീന്‍... പ്രായം കൂടുന്നതിന്റെ സൂചനകളില്ല, പുകഴ്ത്തി ടീമംഗം റെയ്‌ന

ധോണി ഇപ്പോഴും ചെറുപ്പം തന്നെയാണെന്നും പ്രായമാവുന്നതിന്റെ ഒരൂ സൂചനകളും കാണിക്കുന്നില്ലെന്നും റെയ്‌ന അഭിപ്രായപ്പെട്ടു. ചെപ്പോക്കില്‍ നടന്ന സിഎസ്‌കെയുടെ പരിശീലനക്യാംപില്‍ ഉജ്ജ്വലമായാണ് ധോണി ബാറ്റ് വീശിയത്. അദ്ദേഹത്തില്‍ ഇനിയും ക്രിക്കറ്റ് ശേഷിക്കുന്നുണ്ട്.
ഞങ്ങള്‍ പരിശീലന മല്‍സരങ്ങളില്‍ കളിച്ചിരുന്നു. അവയില്‍ ധോണിയുടെ ബാറ്റിങ് മികച്ചതായിരുന്നു. പഴയതു പോലെ അദ്ദേഹം അനായാസം സിക്‌സറുകളും നേടിയിരുന്നുവെന്നും റെയ്‌ന പറഞ്ഞു.

പരിശീലന ക്യാംപില്‍ രാവിലെയും വൈകീട്ടും മൂന്നോവര്‍ വീതം ബാറ്റിങ് പരിശീലനത്തിലേര്‍പ്പെട്ടിരുന്നു. ചെന്നൈയില്‍ ചൂട് വളരെ കൂടുതലായിരുന്നു. എന്നാല്‍ ഇതു വയ്ക്കാതെയാണ് ഞങ്ങള്‍ പരിശീലനത്തിലേര്‍പ്പെട്ടത്.
മണിക്കൂറുകളോളം പരിശീലനം നടത്തിയിട്ടും അതു ധോണിയെ തളര്‍ത്തിയില്ല. അത്രയും മികച്ച ഫിറ്റ്‌നസാണ് അദ്ദേഹത്തിനുള്ളത്. മികച്ച ടൈമിങോടെയാണ് ധോണി നെറ്റ്‌സില്‍ ബാറ്റ് ചെയ്തതെന്നും ഇന്‍സ്റ്റഗ്രാം ലൈവ് സെഷനില്‍ റെയ്‌ന വ്യക്തമാക്കി.
പ്രായമാവുന്നതിന്റെ ഒരു ലക്ഷണങ്ങളും ധോണി പ്രകടിപ്പിച്ചിരുന്നില്ല. വളരെ വ്യത്യസ്തനായാണ് അദ്ദേഹം കാണപ്പെട്ടത്. വ്യത്യസ്തമായി എന്തെങ്കിലും ചെയ്യാനാണ് ധോണി ശ്രമിച്ചത്. ഇനി കളിക്കളത്തിലെത്തിയാല്‍ അതു എല്ലാവര്‍ക്കും നേരിട്ടു കാണാമെന്നും റെയ്‌ന പറഞ്ഞു.

സിഎസ്‌കെയിലെ മറ്റൊരു സഹതാരവും സ്പിന്നറുമായ പിയൂഷ് ചൗളയും നേരത്തേ ധോണിയെ പ്രശംസിച്ചിരുന്നു. വളരെ ദൃഢനിശ്ചയത്തോടെ, ആത്മവിശ്വാസത്തോടെയാണ് ധോണി പരിശീലനത്തില്‍ ഏര്‍പ്പെട്ടതെന്നു ഈ സീസണില്‍ ടീമിനൊപ്പം ചേര്‍ന്ന ചൗള വ്യക്തമാക്കി. നെറ്റ് സെഷനുകളില്‍ അദ്ദേഹം കളിച്ചത് ഒരു യഥാര്‍ഥ മല്‍സരത്തിന്റ അതേ ആവേശത്തോടെയായിരുന്നു. വളരെ മികച്ച ഫോമിലായിരുനു ധോണി.. ബാറ്റിങിലും വിക്കറ്റ് കീപ്പിങിലുമെല്ലാം ഒരുപോലെ മികവുറ്റതായിരുന്നു അദ്ദേഹത്തിന്റെ പ്രകടനമെന്നും ചൗള പറഞ്ഞു.