വരുന്നു ഷറപ്പോവ-സെറീന പോരാട്ടം

സ്റ്റാന്‍ഫോര്‍ഡ്: മുന്‍ ലോകഒന്നാം നമ്പര്‍ താരങ്ങളായ മരിയ ഷറപ്പോവയും സെറീന വില്യംസ് നേര്‍ക്കുനേര്‍ പോരാട്ടത്തിനെത്തുന്നു. സ്റ്റാന്‍ഫോര്‍ഡ് ക്ലാസ്സിക് ടെന്നിസ് ടൂര്‍ണമെന്റിന്റെ ക്വാര്‍ട്ടറിലാണ് ഇരുവരും മാറ്റുരയ്ക്കുന്നത്. ഒരു നീണ്ട ഇടവേളയ്ക്കുശേഷം അന്താരാഷ്ട്രരംഗത്ത് സജീവമായ ഇരുവര്‍ക്കും മല്‍സരം നിര്‍ണായകമാണ്.

ഈ സാഹചര്യത്തില്‍ ഞാന്‍ ആര്‍ക്കുമൊരു എതിരാളിയല്ല. എനിക്കു തിരിച്ചുവരണം. അതുമാത്രമാണ് എന്റെ മുന്നില്‍-റഷ്യന്‍ താരത്തിനെ 6-2, 3-6, 6-2 എന്ന സ്‌കോറിനു കീഴടക്കിയതിനുശേഷം സെറീന പറഞ്ഞു.

ഞങ്ങള്‍ രണ്ടും പേരും പരസ്പരം ബഹുമാനിക്കുന്നവരാണ്. യാതൊരു അഭിപ്രായ വ്യത്യാസവും ഞങ്ങള്‍ തമ്മിലില്ല. കളിക്കളത്തില്‍ മാത്രമാണ് ഞങ്ങള്‍ തമ്മിലുള്ള പോരാട്ടം-ക്വാര്‍ട്ടര്‍ പോരാട്ടത്തെ കുറിച്ച് ഷറപ്പോവയുടെ പ്രതികരണം ഇതായിരുന്നു.

ഇതിനു മുമ്പ് എട്ടു തവണ ഇരുതാരങ്ങളും മുഖാമുഖമെത്തിയിട്ടുണ്ട്. സെറീന വില്യംസ് ആറു പ്രാവശ്യവും ഷറപ്പോവ രണ്ടു തവണയും വിജയിച്ചു. 2004ലെ വിംബിള്‍ഡണ്‍ ഫൈനലില്‍ ഷറപ്പോവ സെറീനയെ തോല്‍പ്പിച്ചിരുന്നു.