കണ്ണീരോടെ രാജാവിന്റെ പടിയിറക്കം!! എക്കാലത്തെയും വലിയ പോരാളിയെന്ന് ഫാന്‍സ്

മലാഗ (സ്‌പെയിന്‍): ലോക ടെന്നീസ് ചരിത്രത്തിലെ എക്കാലത്തെയും വലിയ ഇതിഹാസങ്ങളിലൊരാളായി വാഴ്ത്തപ്പെടുന്ന സ്പാനിഷ് താരം റാഫേല്‍ നദാല്‍ കണ്ണീരോടെ പടിയിറങ്ങി. കരിയറിലെ അവസാന പോരാട്ടത്തില്‍ കളിമണ്‍ കോര്‍ട്ടിലെ രാജാവിന് തല കുനിക്കേണ്ടി വരികയായിരുന്നു. ഇപ്പോള്‍ നടക്കുന്ന ഡേവിസ് കപ്പ് ടൂര്‍ണമെന്റ് കരിയറിലെ അവസാനത്തേതായിരിക്കുമെന്നു നദാല്‍ നേരത്തേ തന്നെ പ്രഖ്യാപിച്ചിരുന്നു.

നെതര്‍ലാന്‍ഡ്‌സുമായുള്ള ക്വാര്‍ട്ടര്‍ ഫൈനലില്‍ സ്‌പെയിനിനു വേണ്ടി സിംഗിള്‍സിലാണ് അദ്ദേഹം അവസാനമായി റാക്കറ്റേന്തിയത്. പക്ഷെ നെതര്‍ലാന്‍ഡ്‌സുമായുള്ള പോരാട്ടത്തില്‍ ബോട്ടിച്ച് വാന്‍ഡെ സാല്‍ഡ്ഷുല്‍പ്പിനോടു നദാല്‍ 4-6, 4-6നു കീഴടങ്ങുകയായിരുന്നു. റാഫ, റാഫയെന്നു മല്‍സരത്തിന്റെ തുടക്കം മുതല്‍ കാണികള്‍ അദ്ദേഹത്തിനായി ആര്‍പ്പുവിളിച്ചെങ്കിലും ഈ പ്രചോദനം വിജയമാക്കി മാറ്റിയെടുക്കാന്‍ കഴിഞ്ഞില്ല.

കഴിഞ്ഞ പാരീസ് ഒളിംപിക്‌സില്‍ സെര്‍ബിയന്‍ സൂപ്പര്‍ താരം നൊവാക് ജോകോവിച്ചിനോടേറ്റ പരാജയത്തിനു ശേഷം നദാല്‍ ആദ്യമായി റാക്കറ്റേന്തിയ മല്‍സരം കൂടിയായിരുന്നു ഇത്. ഡേവിസ് കപ്പിലേറ്റ തോല്‍വിക്കു ശേഷം വളരെയധികം വികാരധീനനായിട്ടാണ് അദ്ദേഹം കാണപ്പെട്ടത്.

ഒരു പൈതൃകം അവശേഷിപ്പിച്ചുവെന്ന മനസമാധാനത്തോടെയാണ് ഞാന്‍ വിടവാങ്ങുന്നത്. അതു വെറും കായികപരമായിട്ടുള്ള മാത്രമല്ല, വ്യക്തിപരമായിട്ടുള്ളതു കൂടിയാണെന്നു തനിക്കു തോന്നുന്നതായും 22 ഗ്രാന്റസ്ലാമുകള്‍ക്കു അവകാശിയായിട്ടുള്ള നദാല്‍ പറഞ്ഞു.

എനിക്കു ലഭിച്ചിട്ടുള്ള സ്‌നേഹത്തെക്കുറിച്ചു ഞാന്‍ മനസിലാക്കുന്നു. കിരീടങ്ങളും നമ്പറുകളുമെല്ലാം അവിടെയുണ്ട്. ആളുകള്‍ക്കു അവയെല്ലാം അറിയുകയും ചെയ്യാം. പക്ഷെ ഒരു മയോര്‍ക്കയെന്ന ചെറിയ ഗ്രാമത്തില്‍ നിന്നുള്ള നല്ലൊരു വ്യക്തിയായി ഓര്‍മിക്കപ്പെടാനാണ് ഞാന്‍ കൂടുതല്‍ ആഗ്രഹിക്കുന്നതെന്നും നദാല്‍ വ്യക്തമാക്കി.

വളരെ ചെറിയ കുട്ടിയായിരിക്കുമ്പോള്‍ തന്നെ ടെന്നീസ് കോച്ച് കൂടിയായ എന്റെ അമ്മാവന്‍ ഗ്രാമത്തിലുണ്ടായിരുന്നത് ഭാഗ്യമായിട്ടു കാണുന്നു. കൂടാതെ ഓരോ നിമിഷവും കുടുംബത്തില്‍ നിന്നും വലിയ പിന്തുണയും എനിക്കു ലഭിച്ചു. നല്ലൊരു വ്യക്തിയായി ഓര്‍മിക്കപ്പെടണമെന്ന ആഗ്രഹം മാത്രമേ തനിക്കുള്ളൂവെന്നു നദാല്‍ കൂട്ടിച്ചേര്‍ത്തു.

വാഴ്ത്തി ആരാധകര്‍

സോഷ്യല്‍ മീഡിയയില്‍ തങ്ങളുടെ ഹീറോയായ റാഫേല്‍ നദാലിനെ വാനോളം പുകഴ്ത്തുകയാണ് ആരാധകര്‍. റാഫേല്‍ നദാല്‍ നിങ്ങളൊരു പോരാളിയാണ്. ടെന്നീസ് ലോകത്തിനു നിങ്ങള്‍ നല്‍കിയിട്ടുള്ള സംഭാവനകള്‍ എക്കാലവും ഓര്‍മിക്കപ്പെടും. കളികമണ്‍ കോര്‍ട്ടില്‍ നിങ്ങളെ വെല്ലാന്‍ ഇനിയൊരു താരം പിറവിയെടുക്കില്ലെന്നും ആരാധകര്‍ കുറിക്കുന്നു.