French Open: 'ക്ലേയില്‍ തെന്നാതെ നദാല്‍', 14ാം സിംഗിള്‍സ് കിരീടം, 22ാം ഗ്രാന്റ്സ്ലാം

സെമിയില്‍ സൂപ്പര്‍ താരം അലക്‌സാണ്ടര്‍ സ്വരേവിനെ മറികടന്നാണ് റാഫേല്‍ നദാല്‍ ഫൈനല്‍ ടിക്കറ്റെടുത്തത്. ആദ്യ സെറ്റ് നദാല്‍ നേടി രണ്ടാം സെറ്റ് ടൈ ബ്രേക്കറിലേക്കെത്തിയപ്പോഴാണ് സ്വരേവിന് പരിക്കേറ്റത്. ഇതോടെ സ്വരേവ് പിന്മാറുകയും നദാലിന് ഫൈനല്‍ ടിക്കറ്റ് ലഭിക്കുകയുമായിരുന്നു. അദ്ദേഹം കളിക്കുന്ന 30ാം ഗ്രാന്റ്സ്ലാം ഫൈനലായിരുന്നു ഇന്നത്തേത്. അതേ സമയം മറ്റൊരു സെമി ഫൈനലില്‍ ക്രൊയേഷ്യയുടെ മാരിന്‍ സിലിച്ചിനെ 3-6, 6-4, 6-2, 6-2 എന്ന സ്‌കോറിനാണ് കാസ്പര്‍ റൂഡ് തോല്‍പ്പിച്ചത്. ഗ്രാന്‍സ്ലാം സിംഗിള്‍സ് ഫൈനലിലെത്തുന്ന ആദ്യ നോര്‍വെക്കാരനെന്ന റെക്കോഡും റൂഡ് സ്വന്തം പേരിലാക്കി.

ഈ സീസണില്‍ നദാല്‍ നേടുന്ന രണ്ടാമത്തെ ഗ്രാന്റ് സ്ലാം കിരീടമാണിത്. പരിക്കും മോശം ഫോമും വേട്ടയാടിയിരുന്ന താരം ഇത്തവണ ഓസ്‌ട്രേലിയന്‍ ഓപ്പണിലും മുത്തമിട്ടു. 2009ന് ശേഷം ആദ്യമായാണ് അദ്ദേഹം ഓസ്‌ട്രേലിയന്‍ ഓപ്പണ്‍ നേടിയത്. ഫ്രഞ്ച് ഓപ്പണില്‍ തുടര്‍ച്ചയായി അഞ്ച് തവണയും നാല് തവണയും അദ്ദേഹം ചാമ്പ്യനായിട്ടുണ്ട്. 2005ലായിരുന്നു ആദ്യ കിരീട നേട്ടം. 2006, 2007, 2008 എന്നീ വര്‍ഷങ്ങളിലും ഫ്രഞ്ച് ഓപ്പണില്‍ അദ്ദേഹം മുത്തമിട്ടു.

പിന്നീട് 2010 മുതല്‍ 2014വരെയും അദ്ദേഹം കിരീടത്തില്‍ മുത്തമിട്ടു. 2015ലും 2016ലും കിരീടം നഷ്ടമായെങ്കിലും 2017 മുതല്‍ 2020വരെ വീണ്ടും തുടര്‍ച്ചയായി കിരീടം നേടി. ഇപ്പോഴിതാ ഇടവേളക്ക് ശേഷം വീണ്ടും കിരീടത്തിലേക്കെത്തിയിരിക്കുകയാണ്. യുഎസ് ഓപ്പണില്‍ നാല് തവണയും വിംബിള്‍ഡണില്‍ രണ്ട് തവണയും അദ്ദേഹം കിരീടം നേടിയിട്ടുണ്ട്.