ഏഷ്യൻ ഗെയിംസ് 2026; 5 ഇന്ത്യൻ ടെന്നീസ് താരങ്ങളെ ഒഴിവാക്കിയതിൽ പ്രതിഷേധം പുകയുന്നു, കാരണം?

ന്യൂഡൽഹി: ഏഷ്യൻ ഗെയിംസ് 2026നുള്ള ഇന്ത്യൻ ടെന്നിസ് ടീമിനെച്ചൊല്ലി വിവാദം ശക്തമാകുന്നു. ഇന്ത്യയുടെ വനിതാ സിംഗിൾസിലെ മുൻനിര താരങ്ങളായ സഹജ യമലപള്ളി, വൈഷ്‌ണവി അദ്ക്കർ ഉൾപ്പെടെ അഞ്ച് താരങ്ങളെ അന്തിമ ടീമിൽ നിന്ന് ഒഴിവാക്കിയതാണ് തർക്കത്തിന് കാരണം. സെപ്റ്റംബർ 19 മുതൽ ഒക്ടോബർ 4 വരെ ജപ്പാനിലെ ഐച്ചി-നഗോയയിലാണ് ഏഷ്യൻ ഗെയിംസ് നടക്കുന്നത്.

ഓൾ ഇന്ത്യ ടെന്നിസ് അസോസിയേഷൻ ആദ്യം 12 അംഗ ടീമിനെയാണ് നിർദേശിച്ചിരുന്നത്. എന്നാൽ അന്തിമമായി ഏഴ് താരങ്ങൾ മാത്രമാണ് ടീമിൽ ഇടം നേടിയത്. സഹജ, വൈഷ്‌ണവി, മാനസ് ധാംനെ, വൈദേഹി ചൗധരി, പ്രാർത്ഥന തോംബരെ എന്നിവരാണ് ഒഴിവാക്കപ്പെട്ടത്. ഓഗസ്‌റ്റ് 22ന് പുറത്തിറക്കിയ അന്തിമ അനുമതി പട്ടികയിൽ 35 ഇനങ്ങളിലായി 492 ഇന്ത്യൻ താരങ്ങൾ ഉൾപ്പെട്ടിരുന്നു.

കായിക മന്ത്രാലയവുമായി അടുത്ത വൃത്തങ്ങൾ മൈഖേലിന് നൽകിയ വിശദീകരണമനുസരിച്ച്, ഏഷ്യൻ ഗെയിംസ് പോലുള്ള മൾട്ടി-സ്പോർട്‌സ് മത്സരങ്ങളിൽ മെഡൽ നേടാനുള്ള സാധ്യതയുള്ള താരങ്ങൾക്കാണ് മുൻഗണന നൽകുന്നത്. സിംഗിൾസിൽ ഏഷ്യയിലെ ആദ്യ ആറ് സ്ഥാനങ്ങളിൽ വരുന്ന താരങ്ങളെയും ഡബിൾസിൽ ആദ്യ എട്ട് സ്ഥാനങ്ങളിലുള്ള താരങ്ങളെയുമാണ് പ്രധാന മാനദണ്ഡമായി പരിഗണിക്കുന്നത്. കഴിഞ്ഞ 12 മാസത്തെ പ്രകടനവും റാങ്കിങ്ങും വിലയിരുത്തലിന്റെ ഭാഗമാണ്.

ഇന്ത്യയുടെ ഒന്നാം നമ്പർ വനിതാ സിംഗിൾസ് താരം സഹജയുടെ ലോക റാങ്ക് ഏകദേശം 344 ആണ്. വൈഷ്‌ണവി ഏകദേശം 390-ാം സ്ഥാനത്തും വൈദേഹി 437-ാം സ്ഥാനത്തുമാണ്. അതേസമയം ഏഷ്യയിലെ മികച്ച വനിതാ താരങ്ങൾ ആഗോള ടോപ്പ് 100ൽ തന്നെ ഉൾപ്പെടുന്നവരാണ്. അതിനാൽ ഇന്ത്യയിലെ ഏറ്റവും ഉയർന്ന റാങ്കുള്ള താരമെന്നത് മാത്രം ഏഷ്യൻ തലത്തിൽ മെഡൽ സാധ്യത തെളിയിക്കുന്നില്ലെന്നാണ് മന്ത്രാലയവുമായി അടുത്ത വൃത്തങ്ങൾ പറയുന്നത്..

പുരുഷ സിംഗിൾസിലെ മാനസ് ധാംനെയുടെ റാങ്കും ഏഷ്യൻ ടോപ്പ് താരങ്ങളുമായി താരതമ്യം ചെയ്യുമ്പോൾ പിന്നിലാണെന്ന് അവർ ചൂണ്ടിക്കാട്ടുന്നു. വനിതാ ഡബിൾസിലും സമാനമായ മാനദണ്ഡമാണ് പ്രയോഗിച്ചതെന്ന് അധികൃതർ പറയുന്നു. വൈദേഹി ചൗധരിയും പ്രാർത്ഥന തോംബരെയും ചേർന്നുള്ള സഖ്യത്തിന് ആവശ്യമായ അന്താരാഷ്ട്ര മത്സരപരിചയമില്ലെന്നും ഇരുവരും അടുത്തിടെ നടന്ന ഡബ്ള്യുടിഎ അല്ലെങ്കിൽ ഐടിഎഫ് മത്സരങ്ങളിൽ സ്ഥിരമായി ഒരു ജോഡിയായി കളിച്ചിട്ടില്ലെന്നും മന്ത്രാലയ വൃത്തങ്ങൾ ചൂണ്ടിക്കാട്ടി.

അതേസമയം, പ്രാർത്ഥനയ്ക്ക് ഏഷ്യൻ ഗെയിംസ് മെഡൽ പരിചയമുണ്ട്. 2014ലെ ഏഷ്യൻ ഗെയിംസിൽ അവർ വെങ്കല മെഡൽ നേടിയിട്ടുണ്ട്. വൈദേഹി രണ്ട് തവണ ദേശീയ ചാമ്പ്യനായിട്ടുമുണ്ട്. മാനസ് ധാംനെ ചലഞ്ചർ തലത്തിൽ ഫൈനലിലെത്തിയ താരവുമാണ്. ടെന്നിസിൽ റാങ്കിങ് മാത്രം അടിസ്ഥാനമാക്കി ടീമിനെ തിരഞ്ഞെടുക്കരുതെന്നാണ് എഐടിഎയുടെ വാദം. സിംഗിൾസ്, പുരുഷ ഡബിൾസ്, വനിതാ ഡബിൾസ്, മിക്‌സഡ് ഡബിൾസ് തുടങ്ങി അഞ്ച് മെഡൽ ഇനങ്ങളുള്ളതിനാൽ ഓരോ ഇനത്തിന്റെയും പ്രത്യേക സാധ്യതകളും സഖ്യങ്ങളും പരിഗണിക്കണം എന്നാണ് സംഘടനയുടെ നിലപാട്.

ജൂലൈ 3ന് ഇന്ത്യൻ ഒളിമ്പിക് അസോസിയേഷൻ സിഇഒ രഘുറാം അയ്യർക്ക് അയച്ച കത്തിൽ ഒഴിവാക്കപ്പെട്ട താരങ്ങളുടെ ഉൾപ്പെടുത്തൽ പുനഃപരിശോധിക്കണമെന്ന് AITA ആവശ്യപ്പെട്ടതായി സംഘടന വ്യക്തമാക്കി. ഒഴിവാക്കപ്പെട്ട താരങ്ങളുടെ പേരുകൾ തങ്ങൾ കൈമാറിയിട്ടില്ലെന്ന റിപ്പോർട്ടുകളും AITA ശക്തമായി നിഷേധിച്ചു.

രോഹൻ ബൊപ്പണ്ണയും വിമർശനവുമായി രംഗത്ത്

മുൻ ലോക ഒന്നാം നമ്പർ ഡബിൾസ് താരവും ഒന്നിലധികം ഗ്രാൻഡ് സ്ലാം ജേതാവുമായ രോഹൻ ബൊപ്പണ്ണ തിരഞ്ഞെടുപ്പ് രീതിയെ വിമർശിച്ചു. താരങ്ങളെ മത്സരിപ്പിക്കുന്നതിന് മുമ്പ് തന്നെ അവരുടെ മെഡൽ സാധ്യത കണക്കുകൂട്ടി അവസരം നിഷേധിക്കുന്നത് ശരിയല്ലെന്നാണ് അദ്ദേഹത്തിന്റെ നിലപാട്.
റാങ്കിങ് സ്വന്തമാക്കിയത് അന്താരാഷ്ട്ര മത്സരങ്ങളിൽ പങ്കെടുത്തും പ്രകടനം നടത്തിയും ആണെന്നും, പ്രധാന വേദിയിൽ സ്വയം തെളിയിക്കാൻ താരങ്ങൾക്ക് അവസരം നൽകണമെന്നും ബൊപ്പണ്ണ അഭിപ്രായപ്പെട്ടു.

എന്നാൽ ഏഷ്യൻ ഗെയിംസിനെ യുവതാരങ്ങൾക്ക് അനുഭവസമ്പത്ത് നേടാനുള്ള വേദിയായി കാണുന്നില്ലെന്നാണ് കായിക മന്ത്രാലയത്തിന്റെ നിലപാട്. മെഡൽ നേടാൻ യാഥാർഥ്യ സാധ്യതയുള്ള താരങ്ങളെയാണ് മൾട്ടി-സ്പോർട്‌സ് മത്സരങ്ങളിലേക്ക് അയക്കേണ്ടതെന്ന് മന്ത്രാലയം വ്യക്തമാക്കുന്നു.

താരങ്ങൾക്ക് അന്താരാഷ്ട്ര പരിചയം നേടാൻ ഐടിഎഫ്, ചലഞ്ചർ തുടങ്ങിയ ടൂർണമെന്റുകളാണ് കൂടുതൽ അനുയോജ്യമെന്നും അവിടെ റാങ്കിങ് മെച്ചപ്പെടുത്തി ഭാവിയിലെ ഏഷ്യൻ ഗെയിംസിനും ഒളിമ്പിക്‌സിനും തയ്യാറാകാമെന്നുമാണ് മന്ത്രാലയത്തിന്റെ വിലയിരുത്തൽ.

അതേസമയം, ഈ തീരുമാനം താരങ്ങളുടെ ഭാവിയെ തള്ളിക്കളയുന്നതല്ലെന്നും യുവതാരങ്ങൾക്ക് മുന്നിൽ ഇനിയും നിരവധി അവസരങ്ങളുണ്ടെന്നും സർക്കാർ വൃത്തങ്ങൾ പറയുന്നു. ഇന്ത്യൻ ടെന്നിസിലെ ഇപ്പോഴത്തെ തർക്കം അഞ്ച് താരങ്ങളുടെ ഒഴിവാക്കലിൽ മാത്രം ഒതുങ്ങുന്നതല്ല. പ്രധാന മത്സരങ്ങളിൽ താരങ്ങൾക്ക് അവസരം നൽകണമോ, അതോ നിലവിലെ മെഡൽ സാധ്യത മാത്രം കണക്കിലെടുത്ത് ടീമിനെ തിരഞ്ഞെടുക്കണമോ എന്ന അടിസ്ഥാന ചോദ്യമാണ് ഉയരുന്നത്.

AITAയും ബൊപ്പണ്ണയും താരങ്ങൾക്ക് കൂടുതൽ അവസരങ്ങൾ നൽകുന്നതിലൂടെ അപ്രതീക്ഷിത മെഡൽ നേട്ടങ്ങൾ സാധ്യമാകുമെന്നാണ് വാദിക്കുന്നത്. മറുവശത്ത്, മന്ത്രാലയം കൃത്യമായ റാങ്കിങ് മാനദണ്ഡവും നിലവിലെ പ്രകടനവും അടിസ്ഥാനമാക്കി ടീമിനെ തിരഞ്ഞെടുക്കണമെന്നാണ് നിലപാടെടുക്കുന്നത്.
അതേസമയം, ഒഴിവാക്കപ്പെട്ട താരങ്ങളുടെ പേരുകൾ AITA യഥാർത്ഥത്തിൽ അന്തിമ പരിഗണനയ്ക്കായി സമർപ്പിച്ചിരുന്നോ എന്ന കാര്യത്തിൽ AITAയും കായിക മന്ത്രാലയവും തമ്മിലും തർക്കം തുടരുകയാണ്. അതിനാൽ തന്നെ തിരഞ്ഞെടുപ്പ് വിവാദം ഇനിയും അവസാനിച്ചിട്ടില്ല.