ഐപിഎല്ലില്‍ ഇന്ത്യന്‍ പേസര്‍മാര്‍ വേണ്ടെന്ന് കോലി... രോഹിത്തിന്റെ പ്രതികരണം ഇങ്ങനെ!!

വിശ്രമം അനുവദിക്കില്ല

2019 മാര്‍ച്ച് 29ന് ആരംഭിക്കുന്ന ഐപിഎല്ലിന്റെ അടുത്ത സീസണ്‍ മെയ് 19നാണ് അവസാനിക്കുക. ഇതു പ്രകാരം ടൂര്‍ണമെന്റ് നടന്നാല്‍ ലോകകപ്പില്‍ ദക്ഷിണാഫ്രിക്കയ്‌ക്കെതിരേ ജൂണ്‍ അഞ്ചിന് നടക്കുന്ന ആദ്യ മല്‍സരത്തിനു മുമ്പ് 15 ദിവസം താരങ്ങള്‍ക്കു വിശ്രമം ലഭിക്കും. അതുകൊണ്ടു തന്നെ ഇന്ത്യയുടെ പ്രധാന പേസര്‍മാരെ ഐപിഎല്ലിന്റെ ഒരു സീസണ്‍ മുഴുവന്‍ കളിപ്പിക്കാതിരിക്കുകയെന്ന ആവശ്യം നടപ്പാക്കാന്‍ പ്രായോഗികമല്ലെന്നു യോഗത്തില്‍ പങ്കെടുത്ത ഒരു മുതിര്‍ന്ന ഒഫീഷ്യല്‍ വ്യക്തമാക്കി.

കോലിയെ തള്ളി രോഹിത്ത്

ക്യാപ്റ്റന്‍ കോലിയുടെ അഭിപ്രായത്തില്‍ നിന്നും തികച്ചും വ്യത്യസ്തമായ അഭിപ്രായമാണ് വൈസ് ക്യാപ്റ്റന്‍ രോഹിത് ശര്‍മയ്ക്കുള്ളത്. യോഗത്തില്‍ രോഹിത്തും പങ്കെടുത്തിരുന്നു. കോലിയുടെ നിര്‍ദേശത്തോട് യോജിക്കുന്നുണ്ടോയെന്ന സിഒഎ മേധാവി വിനാദ് റായിയുടെ ചോദ്യത്തിന് രോഹിത്തിന്റെ മറുപടി ഇങ്ങനെയായിരുന്നു- മുംബൈ ഇന്ത്യന്‍സ് അടുത്ത ഐപിഎല്ലിന്റെ പ്ലേഓഫിലോ, ഫൈനലിലോ എത്തിയാല്‍, ബുംറ ഫിറ്റാണെങ്കില്‍ അദ്ദേഹത്തിനു വിശ്രമം നല്‍കുന്നതിനോടു യോജിപ്പില്ല.

കോലിക്കു വിമര്‍ശനം

ബുദ്ധിശൂന്യമായ ആവശ്യമാണ് കോലിയുടേതെന്നായിരുന്നു യോഗത്തില്‍ പങ്കെടുത്ത മറ്റൊരു ഒഫീഷ്യലിന്റെ പ്രതികരണം. ഐപിഎല്ലില്‍ കളിക്കുന്നതിലൂടെ ഭുവനേശ്വര്‍, ബുംറ എന്നിവര്‍ക്കു മാച്ച് പ്രാക്ടീസ് കൂടിയാണ് ലഭിക്കുന്നത്. രണ്ടു മാസം ഒരു മല്‍സരം പോലും കളിക്കാതെ ഇവര്‍ ലോകകപ്പിനു പോയാല്‍ അതു ഇന്ത്യക്കു തന്നെയാണ് തിരിച്ചടിയാവുകയെന്നും ഒഫീഷ്യല്‍ ചൂണ്ടിക്കാട്ടി.