FIFA World Cup 2010, Football, Spain, Switzerland, ഫിഫ ലോകകപ്പ് 2010, ഫുട്‌ബോള്‍, സ്‌പെയിന്‍, സ്വിറ്റ്‌സര്‍ലണ്ട്,

Gelson Fernandes of Switzerland scores the first goal during the 2010 FIFA World Cup South Africa Group H match between Spain and Switzerland at Durban Stadium on June 16, 2010 in Durban, South Africa.

ഡര്‍ബന്‍: ചുവപ്പുകണ്ട കാളകളെ പോലെയായിരുന്നു സ്‌പെയിന്‍. സ്വിറ്റ്‌സര്‍ലണ്ടിന്റെ ഗോള്‍മുഖത്ത് തുടരെ തുടരെ ആക്രമണങ്ങള്‍ നടത്തി അവര്‍. എന്നാല്‍ ജയത്തിന് ഗോള്‍ തന്നെ വേണം. സ്വിറ്റ്‌സര്‍ലണ്ട് അത് നേടുകയും ചെയ്തു. അതേ ലോകകപ്പ് നേടാന്‍ ഏറ്റവും സാധ്യത കല്‍പ്പിയ്ക്കപ്പെട്ട യൂറോപ്യന്‍ ചാമ്പ്യന്‍മാരായ സ്‌പെയിനിനെ അട്ടമറിച്ച് സ്വസ് പട ഈ ടൂര്‍ണമെന്റിലെ ആദ്യ അട്ടിമറി വിജയം നേടി.

ഗോള്‍രഹിതമായ ആദ്യപകുതിക്കുശേഷം 51ാം മിനിറ്റില്‍ ജെല്‍സണ്‍ ഫെര്‍ണാണ്ടസാണ് ലോക രണ്ടാംനമ്പര്‍ ടീമിനെതിരെ സ്വിസ് പടയുടെ വിജയഗോള്‍ കുറിച്ചത്.

കളം നിറഞ്ഞുകളിച്ചിട്ടും ഗോള്‍ നേടാനാവാതെ പോയതാണ് സ്പാനിഷ് ദുരന്തത്തിന് ഇടയാക്കിയത്. പഴുതുകള്‍ നല്‍കാതെ ഉറച്ചുനിന്ന് പൊരുതിയ പ്രതിരോധനിരയും ഗോള്‍ കീപ്പര്‍ ഡീഗോ ബെനാഗ്ലിയോയുടെ മികവുമാണ് സ്വിസ് ടീമിന് ചരിത്രജയം നേടിക്കൊടുത്തത്. ഇരു ടീമുകളും തമ്മില്‍ നടന്ന 19 കളികളില്‍ സ്വിറ്റ്‌സര്‍ലന്‍ഡിന്റെ ആദ്യ ജയമാണിത്.

കളിയുടെ ഒഴുക്കിന് എതിരെയായിയിരുന്നു ഫെര്‍ണാണ്ടസിന്റെ ഗോള്‍. നീണ്ട ഗോള്‍ കിക്ക് പിടിച്ചെടുത്ത് സ്വിസ് സ്‌െ്രെടക്കര്‍ എറിന്‍ ഡെഡ്രിയോക് ബോക്‌സിലേക്ക് കുതിച്ചപ്പോള്‍, സ്‌പെയിന്റെ ഗോളി ഇകെര്‍ കസിയസ് തടയാനായി ഓടിയെത്തി. ഇതിനിടെ പന്ത് സ്പാനിഷ് താരം ജെറാര്‍ഡ് പിക്വെയുടെ വഴിയിലെത്തിയെങ്കിലും വീണുപോയ പിക്വെക്ക് പന്ത് അടിച്ചകറ്റാനായില്ല. പിന്നാലെ ഓടിയെത്തിയ ഫെര്‍ണാണ്ടസ് പന്തിനെ പോസ്റ്റിലേക്ക് തട്ടിയിടുകയായിരുന്നു.