ബെക്കാം ഗാലക്‌സിയുമായി പുതിയ കരാറില്‍

ലോസ്ആഞ്ചലസ്: ഇംഗ്ലീഷ് പ്ലേമേക്കര്‍ ഡേവിഡ് ബെക്കാം അമേരിക്കന്‍ ക്ലബ്ബായ ലാ ഗാലക്‌സിയുമായുള്ള കരാര്‍ രണ്ടു വര്‍ഷത്തേക്ക് നീട്ടി. റയല്‍ മാഡ്രിഡില്‍ നിന്നും 2007ലാണ് ഡേവിഡ് ബെക്കാം ഗാലക്‌സിയിലെത്തിയത്.

അഞ്ചുവര്‍ഷത്തെ കരാര്‍ കാലാവധി പൂര്‍ത്തിയായതിനാല്‍ ബെക്കാം പാരീസ് സെന്റ് ജര്‍മയിനിലേക്ക് കൂടുമാറുമെന്ന് റിപ്പോര്‍ട്ടുകളുണ്ടായിരുന്നു. പല പ്രമുഖ ക്ലബ്ബുകളില്‍ നിന്നും ഓഫറുകളുണ്ടായിരുന്നു. എന്നാല്‍ അമേരിക്കയില്‍ കളിക്കാനും ഗാലക്‌സിക്കുവേണ്ടി കൂടുതല്‍ കിരീടങ്ങള്‍ സ്വന്തമാക്കാനുമാണ് ഇപ്പോള്‍ ഇഷ്ടപ്പെടുന്നത്- മുന്‍ ഇംഗ്ലീഷ് നായകന്‍ പറഞ്ഞു.

1993 മുതല്‍ 2003വരെ മാഞ്ചസ്റ്റര്‍ യുനൈറ്റഡിനുവേണ്ടിയാണ് ഡേവിഡ് ബെക്കാം കളിച്ചിരുന്നത്. അതിവേഗം ഒരു പ്ലേമേക്കറുടെ റോളിലേക്കുയര്‍ന്ന ഈ മിഡ്ഫീല്‍ഡര്‍ 2003ലാണ് റയല്‍ മാഡ്രിഡിലെത്തിയത്. 2009 മുതല്‍ 2010വരെ ലോണില്‍ ഗാലക്‌സിയില്‍ നിന്നും എസിമിലാനുവേണ്ടി കളിക്കാനിറങ്ങിയിരുന്നു. 1280 ലക്ഷം പൗണ്ടിനാണ് ബെക്കാമിനെ ഗാലക്‌സി വാങ്ങിയത്. പുതിയ കരാര്‍ എത്ര തുകയ്ക്കാണെന്ന് വ്യക്തമാക്കിയിട്ടില്ല.