ഇന്ത്യക്ക് തോല്‍വി, ബൂട്ടിയ വിടവാങ്ങി

ദില്ലി: ജര്‍മന്‍ ലീഗിലെ സൂപ്പര്‍ ടീമായ ബയേണ്‍ മ്യൂണിക്കിനെതിരേയുള്ള മല്‍സരത്തില്‍ ഇന്ത്യന്‍ കുപ്പായമണിഞ്ഞ് മുന്‍ നായകന്‍ ബെയ്ച്ചുങ് ബൂട്ടിയ പടിയിറങ്ങി. മത്സരത്തില്‍ ലോകോത്തര താരങ്ങളുമായെത്തിയ ബയേണ്‍ ഏകപക്ഷീയമായ നാലുഗോളുകള്‍ക്ക് ഇന്ത്യയെ തോല്‍പ്പിച്ചു. പതിനാറുവര്‍ഷത്തിനു ശേഷം ദേശീയഫുട്‌ബോള്‍ കുപ്പായമഴിച്ചുവെയ്ക്കുന്ന ബൂട്ടിയയ്ക്കുള്ള ഫെയര്‍വെല്‍ പാര്‍ട്ടി കൂടിയായിരുന്നു ഇത്.

ദില്ലി സ്റ്റേഡിയത്തില്‍ നടന്ന മല്‍സരം കാണാന്‍ പതിനായിരങ്ങളാണ് ഒഴുകിയെത്തിയത്. കഴിഞ്ഞ ലോകകപ്പിലെ ഏറ്റവും മികച്ച യുവതാരമായ തോമസ് മുള്ളര്‍ ബയേണിനു വേണ്ടി രണ്ടു ഗോളുകള്‍ നേടി. ജര്‍മന്‍ ദേശീയ ടീമിലെ അംഗങ്ങളായ മരിയോ ഗോമസ്, ബാസ്റ്റിയന്‍ എന്നിവരാണ് ഗോള്‍പട്ടിക പൂര്‍ത്തിയാക്കിയത്.

ബയേണ്‍ ക്യാപ്റ്റന്‍ ഫിലിപ് ലാമാണ് ടീമിന്റെ 15ാം നമ്പര്‍ ജഴ്‌സി ബൂട്ടിയക്കു കൈമാറിയത്. ആദ്യപകുതിയില്‍ നിറംമങ്ങിയെങ്കിലും രണ്ടാം പകുതിയില്‍ ഇന്ത്യന്‍ താരങ്ങള്‍ മികച്ച പ്രതിരോധം കാഴ്ചവെച്ചു. മല്‍സരത്തിനു മുമ്പ് ഈ വര്‍ഷത്തെ ഏറ്റവും മികച്ച ഇന്ത്യന്‍ താരമായി തിരഞ്ഞെടുക്കപ്പെട്ട സുനില്‍ ഛെത്രിയെ ആദരിച്ചു.