സന്തോഷ് ട്രോഫി: കേരളം ജയത്തോടെ തുടങ്ങി

ചെന്നൈ: സന്തോഷ് ട്രോഫി ഫുട്‌ബോളില്‍ കേരളം ജയത്തോടെ തുടങ്ങി. തെലുങ്കാനയെ മറുപടിയില്ലാത്ത രണ്ട് ഗോളിനാണ് കേരളം തോല്‍പ്പിച്ചത്. കേരളത്തിനായി കെ ഫിറോസ്, സീസണ്‍ എന്നിവരാണ് ഗോള്‍ നേടിയത്. ആദ്യ പകുതിയിലായിരുന്നു കേരളത്തിന്റെ ഇരു ഗോളുകളും.

തെലുങ്കാനയ്‌ക്കെതിരെ 4-3-3 എന്ന ശൈലിയിലാണ് കേരളം ഇറങ്ങിയത്. ഫിറോസിനെ സെന്‍ട്രല്‍ സ്‌ട്രൈക്കറാക്കിയപ്പോള്‍ സീസണിനെയും ഷൈജുമോനെയും വിങ്ങുകളിലാണ് അണിനിരത്തിയത്. കേരളത്തിന്റെ മുന്നേറ്റം തടയാന്‍ തെലുങ്കാന അഞ്ച് കളിക്കാരെയാണ് പ്രതിരോധത്തില്‍ വിന്യസിച്ചത്. എന്നാല്‍ 11-ാം മിനിറ്റില്‍ ഫിറോസിലൂടെ പ്രതിരോധത്തെ ഭേദിക്കാന്‍ കേരളത്തിനായി.

ഒരു ഗോളിന്റെ ലീഡ് നേടിയിട്ടും കേരളത്തിന്റെ മധ്യനിര ആലസ്യത്തില്‍ തന്നെയായിരുന്നു. ആദ്യ പകുതിയുടെ അവസാനം ഷൈജുമോന്‍ കോടുത്ത പന്ത് മനോഹരമായ ക്രോസിലൂടെ ലിജോ ബോക്‌സിലേക്ക് ഉയര്‍ത്തി നല്‍കിയപ്പോള്‍ സീസണ്‍ ഹെഡ്ഡറിലൂടെ പന്ത് വലയിലാക്കുകയായിരുന്നു. സ്‌കോര്‍ 2-0

മത്സരത്തില്‍ കേരള പ്രതിരോധത്തെ പരീക്ഷിക്കാന്‍ തെലുങ്കാനയ്ക്കായില്ല. എന്നാല്‍ ജയിച്ചിട്ടും ഗോള്‍ ശരാശരിയില്‍ പന്നിലായതോടെ അടുത്ത മത്സരം ജയിച്ചാലേ കേരളത്തിന് ഫൈനല്‍ റൗണ്ടിലെത്താനാകൂ. ശനിയാഴ്ച തമിഴ്‌നാടിനെതിരെയാണ് കേരളത്തിന്റെ അടുത്ത മത്സരം.