CWG 2022: ടേബിള്‍ ടെന്നീസില്‍ ഇന്ത്യ മുന്നോട്ട്, ക്വാര്‍ട്ടര്‍ ഫൈനല്‍ യോഗ്യത

കോമണ്‍വെല്‍ത്ത് ഗെയിംസ് ടേബിള്‍ ടെന്നീസില്‍ ഇന്ത്യന്‍ താരങ്ങള്‍ വിജയത്തോടെ മുന്നേറി. വനിതാ സിംഗിള്‍സില്‍ സൂപ്പര്‍ താരം മാനിക ബത്രയും ശ്രീജ അക്യുലയും ക്വാര്‍ട്ടര്‍ ഫൈനലില്‍ കടന്നു. മിക്‌സഡ് ഡബിള്‍സില്‍ അചന്ദ ശരത് കമല്‍- അക്യുല ശ്രീജ, ജി സത്യന്‍- മാനിക ബാത്ര ജോടികളും ജയവുമായി ക്വാര്‍ട്ടര്‍ ഫൈനലിലെത്തിയിട്ടുണ്ട്. എന്നാല്‍ വനിതാ സിംഗിള്‍സില്‍ റീത്ത ടെന്നിസണ്‍ തോറ്റ് പുറത്തായി.

ഓസ്‌ട്രേലിയയുടെ ജീ മിന്‍ഹ്യുങിനെയാണ് 27 കാരിയായ ബത്ര പ്രീക്വാര്‍ട്ടറില്‍ തുരത്തിയത്. 11-4, 11-8, 11-6, 12-10 എന്ന സ്‌കോറിനായിരുന്നു ഇന്ത്യന്‍ താരത്തിന്റെ വിജയം. ക്വാര്‍ട്ടറില്‍ സിംഗപ്പൂരിന്റെ ജിയാന്‍ സെങാണ് ബത്രയുടെ എതിരാളി. മറ്റൊരു സിംഗിള്‍സില്‍ വെയ്ല്‍സിന്റെ കാര്‍ലോറ്റെ കറേയെയാണ് ശ്രീജ കീഴടക്കിയത്. സ്‌കോര്‍: 8-11, 11-7, 12-14, 9-11, 11-4, 15-13, 12-10. ക്വാര്‍ട്ടറില്‍ കാനഡയുടെ മോ സാങിനെയാണ് ഇന്ത്യന്‍ താരം നേരിടുക. മറ്റൊരു സിംഗിള്‍സില്‍ സിംഗപ്പൂരിന്റെ ഫെങ് ടിയാന്‍വെയോടാണ് ഇന്ത്യന്‍ താരം റീത്ത പരാജയപ്പെട്ടത്.

മിക്‌സഡ് ഡബിള്‍സ് പ്രീക്വാര്‍ട്ടറില്‍ മലേഷ്യയുടെ ലിയോങ് ചീ ഫെങ്- ഹോ യിങ് സഖ്യത്തെയാണ് ശരത് കമല്‍- ശ്രീജ ജോടി തോല്‍പ്പിച്ചത്. സ്‌കോര്‍: 5-11, 11-2, 11-6, 11-5. ആദ്യ ഗെയിം നഷ്ടമായ ശേഷമായിരുന്നു ഇന്ത്യന്‍ സഖ്യം ശക്തമായ തിരിച്ചുവരവ് നടത്തി വിജയം കൊയ്തത്. ഇംഗ്ലണ്ടിന്റെ ലിയാം പിച്ച്‌ഫോര്‍ഡ്- ടിന്‍ ടിന്‍ സഖ്യമാണ് അവസാന എട്ടില്‍ ശരത് കമല്‍- ശ്രീജ ജോടിയുടെ എതിരാളികള്‍.

മറ്റൊരു പ്രീക്വാര്‍ട്ടറില്‍ ജി സത്യന്‍- മാനിക ബാത്ര നൈജീരിയയുടെ ഒലെയ്ഡി ഒമാത്തോയോ- അയോക്കെ ഒജോമു സഖ്യത്തെയും പരാജയപ്പെടുത്തി. സ്‌കോര്‍: 11-7, 11-6, 11-7. മലേഷ്യയുടെ ജാവെന്‍ ചൂങ്- കറെന്‍ ലെയ്ന്‍ എന്നിവരെയാണ് ക്വാര്‍ട്ടറില്‍ ഇന്ത്യന്‍ സഖ്യം നേരിടുക.