PKL 2025: തന്ത്രങ്ങളൊന്നും മാറ്റിയില്ല.. ഞങ്ങളുടെ വിജയരഹസ്യം അത് മാത്രമാണ്; ഗുജറാത്ത് ജയന്റ്‌സ് അസി. കോച്ച്

പ്രോ കബഡി ലീഗിലെ ഒരു സാധാരണ തുടക്കത്തിന് ശേഷം ഗുജറാത്ത് ജയന്റ്‌സ് താളം കണ്ടെത്തിയിരിക്കുകയാണ്. കഴിഞ്ഞ അഞ്ച് മത്സരങ്ങളില്‍ നാലെണ്ണത്തില്‍ ഗുജറാത്ത് വിജയിച്ചു. ബുധനാഴ്ച ത്യാഗരാജ് ഇന്‍ഡോര്‍ സ്റ്റേഡിയത്തില്‍ തമിഴ് തലൈവാസിനെതിരെ 42-35 എന്ന സ്‌കോറിന് വിജയം നേടിയ ടീം, പോയിന്റ് പട്ടികയില്‍ ഏഴാം സ്ഥാനത്തേക്ക് ഉയര്‍ന്നു.

മത്സരത്തിനു ശേഷമുള്ള പത്രസമ്മേളനത്തില്‍ ഗുജറാത്ത് ജയന്റ്‌സ് അസിസ്റ്റന്റ് കോച്ച് വീരേന്ദര്‍ സിംഗ് തന്റെ ടീമിന്റെ പ്രകടനത്തെക്കുറിച്ച് വിശദീകരിച്ചു, 'ഞങ്ങളുടെ പ്രതിരോധക്കാര്‍ അവരുടെ പങ്ക് വഹിച്ചു, ഒരു റൈഡര്‍ എന്ന നിലയില്‍ ഹിമാന്‍ഷു മികച്ച പ്രകടനം കാഴ്ചവച്ചു, ഞങ്ങള്‍ക്ക് പതിവായി പോയിന്റുകള്‍ നേടിക്കൊടുത്തു. മികച്ച ഒരു ലീഡ് ഉണ്ടായിരുന്നു. ചില പോരായ്മകള്‍ കൂടി പരിഹരിക്കേണ്ടതുണ്ട്. എന്നാലും വിജയിക്കുക എന്നതായിരുന്നു പ്രധാനം,' ്അദ്ദേഹം പറഞ്ഞു.

ഈ സീസണില്‍ ടീമിന്റെ തിരിച്ചുവരവിനെക്കുറിച്ചുള്ള ഒരു ഉള്‍ക്കാഴ്ച പങ്കുവെച്ച അസിസ്റ്റന്റ് കോച്ച്, സമീപകാല മത്സരങ്ങളിലെ അവരുടെ മാര്‍ക്വീ കളിക്കാരനായ മുഹമ്മദ്റെസ ഷാഡ്ലൂയിയുടെ പ്രകടനത്തെ പ്രശംസിച്ചു. 'മുന്‍ മത്സരങ്ങളെ അപേക്ഷിച്ച് ഞങ്ങള്‍ ഞങ്ങളുടെ തന്ത്രങ്ങളില്‍ വലിയ മാറ്റമൊന്നും വരുത്തിയിട്ടില്ല. ഞങ്ങളുടെ കളിക്കാര്‍ ഫോമിലേക്ക് മടങ്ങിവരുന്നതാണ് ഞങ്ങള്‍ക്ക് പ്രധാനം,' അദ്ദേഹം പറഞ്ഞു.

'ഷാഡ്ലൂയി മികച്ച പ്രകടനം കാഴ്ചവയ്ക്കുന്നു, അത് ടീമിലെ മറ്റുള്ളവര്‍ക്ക് ആത്മവിശ്വാസവും വിശ്വാസവും നല്‍കുന്നു. ഞങ്ങളുടെ പ്രതിരോധം സ്ഥിരത പുലര്‍ത്തുന്നു, കൂടാതെ റൈഡേഴ്സും വിജയത്തിലേക്കെത്താന്‍ ഞങ്ങളെ സഹായിച്ചു. എല്ലാവരും ഒരുമിച്ച് കളിക്കുകയും ടീമിന് ഫലം നേടുകയും ചെയ്യുന്നു. അതിനാല്‍, ഈ വേഗതയില്‍ വളരാന്‍ ഞങ്ങള്‍ ആഗ്രഹിക്കുന്നു,' അദ്ദേഹം വ്യക്തമാക്കി.

വരാനിരിക്കുന്ന മത്സരങ്ങളില്‍ ഗുജറാത്ത് ജയന്റ്സ് അവരുടെ വിജയ വേഗത തുടരുമെന്ന് പ്രതീക്ഷിക്കുന്നു. എന്നിരുന്നാലും, അവരുടെ അടുത്ത വെല്ലുവിളി മികച്ച ഫോമിലുള്ള തെലുങ്ക് ടൈറ്റന്‍സ് ടീമിനെതിരെയായിരിക്കും. 'തെലുങ്ക് ടൈറ്റന്‍സ് മികച്ച പ്രകടനം കാഴ്ചവയ്ക്കുന്നു. അവര്‍ ഇതിനകം തന്നെ ആദ്യ നാലില്‍ ഇടം നേടിയിട്ടുണ്ട്.

റെയ്ഡിംഗ് ഡിപ്പാര്‍ട്ട്മെന്റില്‍ വിജയ് മാലിക്, ഭരത് ഹൂഡ തുടങ്ങിയ കളിക്കാരും, ശുഭം ഷിന്‍ഡെ, അങ്കിത് ജഗ്ലാന്‍ തുടങ്ങിയ പ്രതിരോധക്കാരും ഉള്‍പ്പെടുന്ന ഒരു ശക്തമായ ടീം അവര്‍ക്കുണ്ട്. അതിനാല്‍ അതിനനുസരിച്ച് ഞങ്ങള്‍ പ്ലാന്‍ ചെയ്യും. കഴിഞ്ഞ തവണ ഞങ്ങള്‍ അവരോട് തോറ്റു, അതിനാല്‍ ഞങ്ങള്‍ പ്രതികാരം ചെയ്യാന്‍ നോക്കും,' വീരേന്ദര്‍ സിംഗ് പറഞ്ഞു/

രണ്ട് ടീമുകള്‍ മാത്രമേ ഇതുവരെ പ്ലേഓഫ് സ്ഥാനം സ്ഥിരീകരിച്ചിട്ടുള്ളൂ. ബാക്കിയുള്ളവര്‍ ഇപ്പോഴും അവരുടെ സ്ഥാനം ഉറപ്പാക്കാനുള്ള പോരാട്ടത്തിലാണ്. അതിനാല്‍, മികച്ച പ്രകടനം കാഴ്ചവയ്ക്കുന്ന ടീം ഒടുവില്‍ പ്ലേഓഫിലേക്ക് കടക്കും എന്നും അദ്ദേഹം ചൂണ്ടിക്കാട്ടി.