CWG 2022: വനിതാ ഹോക്കി സെമിയില്‍ ഇന്ത്യക്ക് തോല്‍വി, ഓസ്‌ട്രേലിയയോട് ഷൂട്ടൗട്ടില്‍ വീണു

ബര്‍മിങ്ഹാം: കോമണ്‍വെല്‍ത്ത് ഗെയിംസ് വനിതാ ഹോക്കിയില്‍ സെമിയില്‍ പരാജയപ്പെട്ട് ഇന്ത്യന്‍ വനിതാ ടീം. കരുത്തരായ ഓസ്‌ട്രേലിയയോട് ഷൂട്ടൗട്ടില്‍ 3-0നാണ് ഇന്ത്യ തോറ്റത്. ലഭിച്ച അവസരങ്ങളെ മുതലാക്കുന്നതില്‍ ഇന്ത്യന്‍ ടീം പരാജയപ്പെട്ടു. ശക്തമായ പോരാട്ടം കണ്ട മത്സരത്തില്‍ മൂന്നാം ക്വാര്‍ട്ടറില്‍ ഓസ്‌ട്രേലിയ ലീഡെടുത്തു. നാലാം ക്വാര്‍ട്ടറിന്റെ അവസാന സമയത്ത് ഗോള്‍ മടക്കി ഇന്ത്യ സമനില പിടിച്ചു.

വന്ദന കാതറിയയാണ് 49ാം മിനുട്ടില്‍ ഇന്ത്യക്കായി വലകുലുക്കിയത്. ഈ കോമണ്‍വെല്‍ത്ത് ഗെയിംസില്‍ ഓസ്‌ട്രേലിയ വഴങ്ങുന്ന ആദ്യത്തെ ഗോളാണിത്. നിശ്ചിത സമയത്ത് 1-1 സമനിലയായതോടെ മത്സരം ഷൂട്ടൗട്ടിലേക്ക്. ആദ്യ മൂന്ന് അവസരവും ഇന്ത്യ പാഴാക്കിയപ്പോള്‍ ഓസ്‌ട്രേലിയ മൂന്ന് തവണയും ലക്ഷ്യം കണ്ട് ഫൈനലില്‍ പ്രവേശിക്കുകയായിരുന്നു. ഇതോടെ വെങ്കല മെഡല്‍ പോരാട്ടത്തില്‍ ഇന്ത്യ ന്യൂസീലന്‍ഡിനെ നേരിടും.

വനിതകളുടെ 200 മീറ്റര്‍ ഹീറ്റ്‌സില്‍ ഇന്ത്യയുടെ ഹിമാ ദാസിന് ഫൈനല്‍ യോഗ്യതയില്ല. 23.42 സമയം കുറിച്ചാണ് താരം ഫിനിഷ് ചെയ്തത്. പുരുഷന്മാരുടെ 4x400 മീറ്റര്‍ റിലേയില്‍ ഇന്ത്യന്‍ ടീം ഫൈനലില്‍ സീറ്റ് നേടിയിട്ടുണ്ട്. സ്‌ക്വാഷില്‍ മിക്‌സഡ ഡബിള്‍സില്‍ ഇന്ത്യയുടെ ദീപികാ പള്ളിക്കല്‍-സൗരവ് ഘോഷാല്‍ സഖ്യം സെമിയില്‍ കടന്നു. ഓസ്‌ട്രേലിയയുടെ റേച്ചല്‍ ഗ്രിന്‍ഹാം-സാക്ക് അലക്‌സാണ്ടര്‍ എന്നിവരെ തോല്‍പ്പിച്ചാണ് ഇരുവരും സെമിയില്‍ കടന്നത്.

ഇന്ത്യയെ സംബന്ധിച്ച് മെഡല്‍ വാരിയ ദിവസമായിരുന്നു വെള്ളിയാഴ്ച. ഗുസ്തിയില്‍ ഇന്ത്യ മൂന്ന് സ്വര്‍ണ്ണവും ഒരു വെള്ളിയും വെങ്കലവും ഇന്ത്യ നേടി. 9 സ്വര്‍ണ്ണവും എട്ട് വെള്ളിയും 9 വെങ്കലവും ഉള്‍പ്പെടെ 26 മെഡലുകളുമായി ഇന്ത്യ നിലവില്‍ അഞ്ചാം സ്ഥാനത്താണ്.