ഇതിഹാസമാവാന്‍ മെസ്സി ഇനിയും കാത്തിരിക്കണം: പെലെ

റിയോ ഡി ജനീറോ: ബാഴ്‌സലോണയുടെ അര്‍ജന്റീനിയന്‍ താരം ലയണല്‍ മെസ്സിയ്ക്ക് ഫുട്‌ബോള്‍ ഇതിഹാസതാരമാവാന്‍ ഇനിയും ഏറെ ദൂരം മുന്നോട്ടുപോവേണ്ടതുണ്ടെന്ന് പെലെ.
അസാധാരണമായ കഴിവ് ഈ അര്‍ജന്റീനിയന്‍ താരത്തിനുണ്ട്. ഞാന്‍ മെസ്സിയുടെ ആരാധകനാണ്. സാങ്കേതികപരമായി ചിന്തിക്കുകയാണെങ്കില്‍ മെസ്സി എനിക്കൊപ്പമാണ്. ഞങ്ങള്‍ രണ്ടു പേര്‍ക്കും ദൈവത്തിന്റെ അസാധാരണമായ ഒരു വരദാനം ലഭിച്ചിട്ടുണ്ട്.

തകര്‍ക്കാനുള്ളതാണ് റെക്കോഡുകള്‍. പക്ഷേ, എന്റെ റെക്കോഡുകള്‍ കൈയെത്താ ദൂരത്താണ്. 1283 ഗോളുകളും മൂന്നു ലോകകപ്പുകളും നേടിയാല്‍ മെസ്സി ഒപ്പമെത്തിയതായി അംഗീകരിക്കാം. തീര്‍ച്ചയായും മെസ്സിക്ക് അസാധ്യമാണ് ഈ റെക്കോഡുകള്‍. അതുകൊണ്ട് പെലെയ്ക്ക് തുല്യം പെലെ മാത്രമാണ്.

പുതിയ നൂറ്റാണ്ടിലെ ഏറ്റവും മികച്ച താരം മെസ്സിയായിരിക്കാം. പക്ഷേ, എക്കാലത്തെയും മികച്ച താരമാവാന്‍ മെസ്സിക്കു സാധിക്കില്ല.