ഫുട്‌ബോള്‍ മാന്ത്രികന്‍ മെസ്സി കൊല്‍ക്കത്തയില്‍

കൊല്‍ക്കത്ത: പ്രിയപ്പെട്ട താരത്തെ കാണാന്‍ നേതാജി സുഭാഷ് ചന്ദ്രബോസ് വിമാനത്താവളത്തിനു മുന്നില്‍ അവര്‍ ഉറങ്ങാതെ കാത്തിരിക്കുകയായിരുന്നു. വെനി സ്വേലയ്‌ക്കെതിരേയുള്ള അന്താരാഷ്ട്രസൗഹൃദമല്‍സരത്തില്‍ പങ്കെടുക്കാന്‍ കൊല്‍ക്കത്തയിലെത്തിയ അര്‍ജന്റീനിയന്‍ ഫുട്‌ബോള്‍ മാന്ത്രികന്‍ ലയണല്‍ മെസ്സിയെ തീര്‍ത്തും അമ്പരപ്പിക്കുന്നതായിരുന്നു ഈ ആരാധന.

സുരക്ഷാപരമായ കാരണങ്ങളാല്‍ മെസ്സി എപ്പോള്‍ ഇന്ത്യയിലെത്തുമെന്ന് സംഘാടകര്‍ പ്രഖ്യാപിച്ചിരുന്നില്ല. പക്ഷേ, സ്പാനിഷ് ലീഗ് മല്‍സരത്തിനുശേഷം ഇന്ത്യയിലെത്താന്‍ സാധ്യതയുള്ള സമയം കണക്കൂകൂട്ടി ആളുകള്‍ ചൊവ്വാഴ്ച വൈകുന്നേരം മുതല്‍ തന്നെ കാത്തിരിപ്പ് തുടങ്ങിയിരുന്നു.ബുധനാഴ്ച അതിരാവിലെയാണ് ലോകഫുട്‌ബോളര്‍ ഇന്ത്യന്‍ മണ്ണില്‍ കാലുകുത്തിയത്.

മെസ്സിയും ബാഴ്‌സലോണയിലെ സഹതാരം ജാവിയര്‍ മസ്‌കെരാനോയും കൂടി വിമാനത്താവളത്തില്‍ നിന്നു നേരെ സ്‌റ്റേഡിയത്തിനടുത്തുള്ള ഹോട്ടലിലേക്ക് പോയതിനാല്‍ ഭൂരിഭാഗം ആരാധകര്‍ക്കും ഒന്നു കാണാന്‍ പോലും സാധിച്ചില്ല.

പക്ഷേ, 2008ല്‍ മറഡോണ കൊല്‍ക്കത്തയിലെത്തിയപ്പോഴുള്ളത്ര ആളുകളൊന്നും മെസ്സിയ്ക്കു വേണ്ടി തടിച്ചുകൂടിയിട്ടില്ല. അന്ന് അരലക്ഷത്തോളം ആരാധകരാണ് ഉറങ്ങാതെ ഫുട്‌ബോള്‍ ഇതിഹാസതാരത്തിനായി കാത്തിരുന്നത്.