ഖത്തര്‍ ഫുട്‌ബോള്‍ ലോകകപ്പിനായുള്ള കൗണ്ട്ഡൗണ്‍ തുടങ്ങി; ഒരുക്കങ്ങള്‍ തകൃതി

എട്ടു സ്റ്റേഡിയങ്ങള്‍

ലോകകപ്പ് സംഘാടകര്‍ എട്ട് കൂറ്റന്‍ സ്റ്റേഡിയങ്ങളാണ് ഫുട്‌ബോള്‍ മാമാങ്കത്തിനായി ഒരുക്കുന്നത്. ഇവയെല്ലാം നിശ്ചയിച്ച കാലയളവില്‍ തന്നെ പൂര്‍ത്തിയാകുമെന്നും പറയുന്നു. ഖലീഫ ഇന്റര്‍ നാഷണല്‍ സ്റ്റേഡിയം ഇതിനകംതന്നെ പൂര്‍ത്തിയായിട്ടുണ്ട്. അറ്റകുറ്റപ്പണികള്‍ക്കുശേഷം കഴിഞ്ഞ മെയില്‍ ഇത് തുറക്കുകയും ചെയ്തു. ഇവിടെ വെച്ചാണ് എമിര്‍സ് കപ്പ് ഫൈനലില്‍ അല്‍ സാദും, അല്‍ റയാനും ഏറ്റുമുട്ടിയത്.

അല്‍ ബയാത്ത് സ്റ്റേഡിയം

അല്‍ ഖോറില്‍ സ്ഥിതിചെയ്യുന്ന അല്‍ ബയാത് സ്‌റ്റേഡിയമാണ് എട്ടു സ്‌റ്റേഡിയങ്ങളിലെ വമ്പന്‍. ഏതാണ്ട് 60,000ത്തോളം കാണികളെ സ്‌റ്റേഡിയത്തില്‍ ഉള്‍ക്കൊള്ളും. ടെന്റുകളുടെ മാതൃകയില്‍ നിര്‍മിക്കുന്ന സ്‌റ്റേഡിയം ലോകകപ്പോടെ ശ്രദ്ധേയമാകുമെന്നാണ് കണക്കുകൂട്ടല്‍. ലോകകപ്പ് ഫൈനല്‍ റൗണ്ട് മത്സരങ്ങള്‍ നടക്കുന്ന ഏറ്റവും ചെറിയ രാജ്യമെന്ന ബഹുമതിയും ഖത്തറിനെ കാത്തിരിക്കുന്നുണ്ട്.

ഏറ്റവും വലിയ ലോകകപ്പ്

രാജ്യങ്ങളില്‍ ചെറുതാണെങ്കിലും ഇന്നേവരെ നടന്നതില്‍ ഏറ്റവും വലിയ ലോകകപ്പ് ആയിരിക്കും ഇതെന്നാണ് സംഘാടക സമിതി സെക്ട്രട്ടറി ജനറല്‍ ഹസ്സന്‍ അല്‍ തവാദി പറയുന്നത്. 1.5 മില്യണ്‍ കാഴ്ചക്കാര്‍ ഖത്തറിലെത്തുമെന്ന് അദ്ദേഹം പ്രതീക്ഷിക്കുന്നു. ഇതുകൂടാതെ കോടിക്കണക്കിന് ആളുകള്‍ ടെലിവിഷനിലൂടെയും കളി കാണും. ലോകകപ്പ് ഖത്തറിന് ലഭിച്ച മികച്ച അവസരമാണെന്നും ഫുട്‌ബോള്‍, ടൂറിസം തുടങ്ങി രാജ്യത്തിന്റെ കഴിവുകള്‍ ലോകത്തിന് കാണിച്ചുകൊടുക്കാന്‍ കഴിയുമെന്നുമാണ് ഫിഫ പ്രസിഡന്റ് ജിയാനി ഇന്‍ഫാന്റീനോയുടെ അഭിപ്രായം.