ബാലണ്‍ ഡിയോര്‍: റോണോയും മെസ്സിയും ടോപ്പ് ത്രീയില്‍ പോലുമില്ല!! വോട്ടിങ് ഇങ്ങനെ... ലിസ്റ്റ് ലീക്കായി

റൊണാള്‍ഡോയും മെസ്സിയുമില്ല

വോട്ടിങിന്റെ പാതിഘട്ടം പൂര്‍ത്തിയായപ്പോള്‍ റിപ്പോര്‍ട്ട് പ്രകാരം കഴിഞ്ഞ തവണത്തെ ജേതാവായ പോര്‍ച്ചുഗീസ് ഇതിഹാസം ക്രിസ്റ്റിയാനോ റൊണാള്‍ഡോയും മുന്‍ ചാംപ്യനായ അര്‍ജന്റൈന്‍ ഇതിഹാസം ലയണല്‍ മെസ്സിയും ടോപ്പ് ത്രീയില്‍പ്പോലും ഇടം പിടിച്ചിട്ടില്ലെന്നാണ് വിവരം.
കഴിഞ്ഞ 10 വര്‍ഷമായി ബാലണ്‍ ഡിയോറില്‍ മെസ്സി- റോണോ ആധിപത്യമാണ് കണ്ടത്. ഇരുവരും അഞ്ചു തവണ വീതം അവാര്‍ഡ് പങ്കുവയ്ക്കുകയായിരുന്നു. എന്നാല്‍ ഇത്തവണ ഇരുവര്‍ക്കും പുരസ്‌കാരം ലഭിക്കില്ലെന്ന് ഉറപ്പായി.

ടോപ്പ് ത്രീയിലുള്ളത്

ബാലണ്‍ ഡിയോര്‍ ഫേവറിറ്റായ ലൂക്കാ മോഡ്രിച്ച് കണക്കുകൂട്ടലുകള്‍ തെറ്റിക്കാതെ ആദ്യ മൂന്നില്‍ സ്ഥാനമുറപ്പിച്ചിട്ടുണ്ട്. ഫ്രഞ്ച് ഡിഫന്‍ഡറും റയല്‍ മാഡ്രിഡ് താരവുമായ റാഫേല്‍ വറാന്‍ രണ്ടാംസ്ഥാനത്തുണ്ടെന്നതാണ് കൗതുകകരമായ കാര്യം. ഫ്രഞ്ച് കൗമാര സെന്‍സേഷന്‍ കിലിയന്‍ എംബാപ്പെയാണ് മൂന്നാംസ്ഥാനത്ത്.
റഷ്യന്‍ ലോകകപ്പിലെ എമേര്‍ജിങ് താരത്തിനുള്ള പുരസ്‌കാരം എംബാപ്പെയ്ക്കായിരുന്നു. ഈ സീസണില്‍ പിഎസ്ജിക്കായി തകര്‍പ്പന്‍ പ്രകടനമാണ് താരം നടത്തിക്കൊണ്ടിരിക്കുന്നത്. വിവിധ ടൂര്‍ണമെന്റുകളിലായി 13 ഗോളുകള്‍ എംബാപ്പെ നേടിക്കഴിഞ്ഞു.

സാധ്യതാ ലിസ്റ്റില്‍ 30 പേര്‍

ബാലണ്‍ ഡിയോര്‍ പുരസ്‌കാരത്തിനുള്ള അംഗ സാധ്യതാ ലിസ്റ്റ് നേരത്തേ പുറത്തുവിട്ടിരുന്നു. ഈ 30 പേരില്‍ നിന്നാണ് ജേതാവിനെ ഡിസംബറില്‍ പ്രഖ്യാപിക്കുന്നത്. റൊണാള്‍ഡോ, മെസ്സി എന്നിവരെക്കൂടാതെ സെര്‍ജിയോ അഗ്വേറേ, ഗരെത് ബേല്‍, കെവിന്‍ ഡിബ്രുയ്ന്‍, ഇവാന്‍ റാക്കിറ്റിച്ച്, റോബര്‍ട്ടോ ഫിര്‍മിനോ, മുഹമ്മദ് സലാ, അന്റോണിയോ ഗ്രീസ്മാന്‍, തിബോട്ട് കോട്വ, ഈഡന്‍ ഹസാര്‍ഡ്, നെയ്മര്‍, പോള്‍ പോഗ്ബ, ലൂയിസ് സുവാരസ്, ഹാരി കെയ്ന്‍ എന്നിവരടക്കം നിലവില്‍ ലോക ഫുട്‌ബോളിലെ മികച്ച കളിക്കാരെല്ലാം സാധ്യതാ ലിസ്റ്റിലുണ്ട്.