മെസ്സിയെ കാത്തിരിക്കുന്നത് രണ്ടുവര്‍ഷത്തെ വിലക്ക്; അടുത്ത കോപ്പയും ലോകകപ്പും കളിക്കാനാകില്ല

മെസ്സിക്ക് വിലക്ക് ഭീഷണി

ഫുട്‌ബോള്‍ ഫെഡറേഷന്‍ നിയമപ്രകാരം മെസ്സി ഗുരുതരമായ അച്ചടക്ക ലംഘനടത്തിയതായാണ് സൂചന. മെസ്സിക്കെതിരായ നടപടി അംഗീകരിക്കപ്പെട്ടാല്‍ അര്‍ജന്റീനയ്ക്ക് കനത്ത തിരിച്ചടിയാകും അത്. ഖത്തര്‍ ലോകകപ്പിനുള്ള യോഗ്യതാ മത്സരങ്ങള്‍ ആരംഭിക്കാനിരിക്കുകയാണ്. മാത്രമല്ല, 2020ല്‍ അര്‍ജന്റീനയും കൊളംബിയയും സംയുക്തമായി ആതിഥേയത്വം വഹിക്കുന്ന കോപ്പ അമേരിക്ക ഫുട്‌ബോളിലും മെസ്സിക്ക് കളിക്കാനാകില്ല.

അര്‍ജന്റീനയ്ക്ക് തിരിച്ചടിയാകും

കഴിഞ്ഞ ലോകകപ്പ് യോഗ്യതാ മത്സരങ്ങളില്‍ മെസ്സിയുടെ അസാന്നിധ്യമുണ്ടായപ്പോഴെല്ലാം അര്‍ജന്റീനയ്ക്ക് തോല്‍വിയും സമനിലയുമായിരുന്നു. അവസാന മത്സരത്തില്‍ മെസ്സിയുടെ മികവിലാണ് ടീം ഒടുവില്‍ റഷ്യയിലേക്ക് ടിക്കറ്റെടുത്തതും. പഴയ പ്രതാപത്തിന്റെ നിഴല്‍മാത്രമായ അര്‍ജന്റീനയ്ക്ക് മെസ്സിയില്ലാതെ ലോകകപ്പ് യോഗ്യത കടക്കാന്‍ ബുദ്ധിമുട്ടാകും.

മെസ്സിയുടെ ആരോപണം

ബ്രസീലിനെതിരായ മത്സരത്തില്‍ അര്‍ജന്റീനയുടെ ഉറച്ച പെനാല്‍റ്റി അപ്പീലുകള്‍ റഫറി തള്ളിയിരുന്നു. മാത്രമല്ല, വാര്‍ റഫറിയും അര്‍ജന്റീനയുടെ അപ്പീല്‍ പരിഗണിച്ചില്ല. ഇതിനെതിരെ അര്‍ജന്റീന ഫുട്‌ബോള്‍ അസോസിയേഷന്‍ പരാതി നല്‍കിയിട്ടുണ്ട്. ബ്രസീലിനായി കോപ്പ കിരീടം നേരത്ത ഉറപ്പിച്ചതാണെന്നും പ്രസിഡന്റിന്റെ സുരക്ഷാ ഉദ്യോഗസ്ഥര്‍ ഫുട്‌ബോള്‍ മത്സരത്തില്‍ ഇടപെട്ടെന്നും അര്‍ജന്റീന ആരോപിക്കുന്നുണ്ട്. ലൂസേഴ്‌സ് ഫൈനലില്‍ മെസ്സിക്കെതിരെ ചുവപ്പ് കാര്‍ഡ് കാട്ടിയതും വിവാദത്തിലാണ്. ഫുട്‌ബോള്‍ കരിയറില്‍ ഇത് രണ്ടാംതവണ മാത്രമാണ് മെസ്സിക്ക് ചുവപ്പുകാര്‍ഡ് ലഭിക്കുന്നത്.