വിജയവഴിയില്‍ തിരിച്ചെത്തി ബാഴ്‌സലോണ; റയലിന് ഞെട്ടിക്കുന്ന തോല്‍വി

മാഡ്രിഡ്: ചാമ്പ്യന്‍സ് ലീഗിലെ തിരിച്ചടിയും ലാ ലീഗയിലെ അപ്രതീക്ഷിത തോല്‍വിക്കും പിന്നാലെ ബാഴ്‌സലോണ വിജയവഴിയില്‍ തിരിച്ചെത്തി. ലീഗിലെ തങ്ങളുടെ 37-ാം മത്സരത്തില്‍ ഗെറ്റാഫയെ ഏപക്ഷീയമായ രണ്ട് ഗോളുകള്‍ക്കാണ് ബാഴ്‌സ തോല്‍പ്പിച്ചത്. വിദാലിനെ(39) കൂടാതെ മൗറോ അംബാറി(89)യുടെ സെല്‍ഫ് ഗോളും ബാഴ്‌സയ്ക്ക് തുണയായി. ലീഗില്‍ നേരത്തെതന്നെ കിരീടം ഉറപ്പിച്ചിരുന്ന ബാഴ്‌സയ്ക്ക് ഇതോടെ 86 പോയന്റായി.

മറ്റൊരു മത്സരത്തില്‍ റയല്‍ മാഡ്രിഡ് റയല്‍ സോസിഡാഡിനോട് അപ്രതീക്ഷിത തോല്‍വി വഴങ്ങി. 3-1 എന്ന സ്‌കോറിനായിരുന്നു സോസിഡാഡിന്റെ വിജയം. 39-ാം മിനിറ്റില്‍ വെല്ലേജോ ചുവപ്പുകാര്‍ഡ്കണ്ട് പുറത്തായതാണ് റയലിന് തിരിച്ചടിയായത്. ലീഗില്‍ രണ്ടാം സ്ഥാനത്തുള്ള അത്‌ലറ്റിക്കോ മാഡ്രിഡ് സെവിയയുമായി ഓരോ ഗോളടിച്ച് സമനിലയില്‍ പിരിഞ്ഞു. സീസണില്‍ മോശം പ്രകടനം നടത്തുന്ന റയല്‍ മൂന്നാം സ്ഥാനത്താണ്.

ഇറ്റാലിയന്‍ സീരി എ യില്‍ ക്രിസ്റ്റ്യാനോ റൊണാള്‍ഡോയുടെ യുവന്റസും തോല്‍വി വഴങ്ങി. റോമയോട് എതിരില്ലാത്ത രണ്ടു ഗോളുകള്‍ക്കാണ് യുവന്റസ് തോറ്റത്. ഫ് ളോറെന്‍സി(79), എഡിന്‍ സെക്കോ(90+2) എന്നിവരാണ് റോമയുടെ സ്‌കോറര്‍മാര്‍. കഴിഞ്ഞ മൂന്ന് മത്സരങ്ങളില്‍ ഒരു തോല്‍വിയും രണ്ടു സമനിലയുമുള്ള യുവന്റസ് നേരത്തെ തന്നെ ചാമ്പ്യന്‍ഷിപ്പ് ഉറപ്പിച്ചിരുന്നു. മറ്റു മത്സരങ്ങളില്‍ നാപ്പോളി(2-1)സ്പാല്‍ എംപോളി(2-1)സാംപ്‌ഡോറിയ ടീമുകള്‍ ജയം കണ്ടെത്തി.