ഇറ്റലിയില്‍ ഇന്റര്‍മിലാന്‍ മുങ്ങുന്നു, എ സി മിലാന്‍ ജയത്തോടെ മൂന്നാം സ്ഥാനത്ത്‌

മിലാന്‍: ഇറ്റാലിയന്‍ സീരി എ ലീഗില്‍ ഇന്റര്‍മിലാന് തോല്‍വി. അതേ സമയം എ സി മിലാന്‍ ഹോം മാച്ച് ജയം സ്വന്തമാക്കി. അറ്റ്‌ലാന്റ, ക്രോട്ടൊന്‍, ലാസിയോ ടീമുകള്‍ക്കും ജയം. റോമ സമനിലയില്‍ കുരുങ്ങി.

സാംഡോറിയയാണ് ഇന്റര്‍മിലാനെ വീഴ്ത്തിയത് (1-0). ഫാബിയോ ക്വാഗ്‌ലിയാരെല്ലയാണ് ഗോള്‍ നേടിയത്. കഴിഞ്ഞ ഏഴ് മത്സരങ്ങളിലും സ്‌കോറിംഗ് മാജിക് നഷ്ടപ്പെട്ട ഫാബിയോ ഇന്ററിനെതിരെ ആ മികവ് തിരിച്ചുപിടിച്ചു. ഇന്റര്‍മിലാന്‍ കഴിഞ്ഞ അഞ്ച് സീരി എ മത്സരത്തില്‍ നാലിലും പരാജയപ്പെട്ടു. ഇതോടെ, ഇന്റര്‍മിലാനില്‍ ഡച്ച് പരിശീലകന്‍ ഫ്രാങ്ക് ഡി ബൂയറിന്റെ നാളുകള്‍ എണ്ണപ്പെട്ടു. സാംഡോറിയന്‍ താരങ്ങളായ എഡ്ഗാര്‍ ബരേറ്റോ, മാര്‍സലോ ബ്രൊസോവിച് എന്നിവരുടെ ഷോട്ടുകള്‍ പോസ്റ്റില്‍ തട്ടിത്തെറിച്ചത് ഇന്ററിന്റെ പരാജയഭാരം കുറച്ചു.

ഇന്ററിന്റെ റോഡ്രിഗോ പലാസിയോ ഇഞ്ചുറി ടൈമില്‍ സമനില നേടേണ്ടതായിരുന്നു. ഷോട്ട് പോസ്റ്റില്‍ തട്ടിമടങ്ങി.

പതിനൊന്ന് മത്സരങ്ങളില്‍ പതിനാല് പോയിന്റുമായി ഇന്റര്‍മിലാന്‍ പതിനൊന്നാം സ്ഥാനത്താണ്. അത്ര തന്നെ പോയിന്റുമായി സാംഡോറിയ പന്ത്രണ്ടാം സ്ഥാനത്ത്. എ സി മിലാന്‍ 22 പോയിന്റുമായി മൂന്നാം സ്ഥാനത്ത്. 27 പോയിന്റുള്ള യുവെന്റസാണ് ഒന്നാം സ്ഥാനത്ത്. സമനിലയിലായ റോമ 23 പോയിന്റുമായി രണ്ടാം സ്ഥാനത്ത്.

ഗോള്‍ നില

അറ്റ്‌ലാന്റ 3-0 ജെനോവ

ക്രോട്ടൊന്‍ 2-0 ചീവോ

എംപോളി 0-0 റോമ

ലാസിയോ 2-1 സസുലോ

മിലാന്‍ 1-0 പെസ്‌കാര

സാംഡോറിയ 1-0 ഇന്റര്‍മിലാന്‍