ഇന്ത്യയുടെ ജൂനിയര്‍ കളിക്കാരുടെ ടീം ഐ ലീഗില്‍ വിജയത്തുടക്കമിട്ടു, ചെന്നൈ തോറ്റമ്പി

ബംബോലിം(ഗോവ): പിള്ളേര് തുടങ്ങി, അതിഗംഭീരമായിട്ട്. ഐ ലീഗില്‍ ഇന്ത്യയുടെ ജൂനിയര്‍ ഫുട്‌ബോള്‍ ടീമായ ഇന്ത്യന്‍ ആരോസ് ആദ്യ മത്സരത്തില്‍ ചെന്നൈ സിറ്റി എഫ് സിയെ തകര്‍ത്തു (3-0).

അണ്ടര്‍ 17 ഫിഫ ലോകകപ്പ് ടീമംഗങ്ങളായ അനികേത് ജാദവും ബോറിസ് സിംഗ് താംഗ്ജമുമാണ് സ്‌കോര്‍ ചെയ്തത്. ഇരട്ട ഗോളുകളുമായി അനികേത് മാന്‍ ഓഫ് ദ മാച്ചായപ്പോള്‍ ഡിഫന്‍ഡര്‍ ബോറിസ് സിംഗും ഗോളടിച്ച് താരമായി.

ഇരുപതാം മിനുട്ടിലാണ് ആദ്യ ഗോള്‍. രണ്ടാം ഗോള്‍ അമ്പത്തെട്ടാം മിനുട്ടിലും. രണ്ടും അനികേതിന്റെ ബൂട്ടില്‍ നിന്ന്. അവസാന മിനുട്ടില്‍ ഡിഫന്‍ഡറായ ബോറിസ് ഗോള്‍പട്ടിക തികച്ചു.

പോര്‍ച്ചുഗീസ് കോച്ച് ലൂയിസ് നോര്‍ട്ടന്‍ ഡി മാറ്റോസിന്റെ കീഴില്‍ അണ്ടര്‍ 17 ലോകകപ്പ് കളിച്ച താരങ്ങളും അണ്ടര്‍ 19 താരങ്ങളുമാണ് ഇന്ത്യന്‍ ആരോസിലുള്ളത്. എ എഫ് സി മത്സരങ്ങള്‍ക്ക് തയ്യാറെടുക്കുന്ന കളിക്കാരും ഇതിലുണ്ട്. ദീര്‍ഘകാലം ഒരുമിച്ചു കളിക്കുന്നതിന്റെ ഒത്തിണക്കം ആരോസ് നിരയില്‍ കാണാം. വിദേശതാരങ്ങളില്ലാതെ ഐ ലീഗ് കളിച്ച ഏക ടീമും ആരോസാണ്.

ഈസ്റ്റ് ബംഗാള്‍, മോഹന്‍ ബഗാന്‍ എന്നീ വമ്പന്‍മാര്‍ക്ക് വരെ ആരോസ് വലിയ ഭീഷണിയായി മാറിയേക്കും.