ഐഎസ്എല്ലിനു വെല്ലുവിളിയാവുമോ ഐ ലീഗ്? പുതിയ സീസണ്‍ വൈകില്ല...

ദില്ലി: ഐഎസ്എല്ലിന്റെ ആവേശപ്പോരാട്ടങ്ങള്‍ ഇന്നാരംഭിക്കാനിരിക്കെ രാജ്യത്തെ ഏറ്റവും പ്രധാനപ്പെട്ട ഫുട്‌ബോള്‍ ലീഗായ ഐ ലീഗിലും വിസില്‍ മുഴങ്ങാന്‍ പോവുന്നു. ഐ ലീഗിന്റെ പുതിയ സീസണിന് ഒക്ടോബര്‍ 26ന് തുടക്കം കുറിച്ചേക്കുമെന്നാണ് റിപ്പോര്‍ട്ടുകള്‍. ടൂര്‍ണമെന്റിന്റെ 12ാം എഡിഷനാണിത്. 11 ടീമുകളായിരിക്കും രാജ്യത്തെ ചാംപ്യന്‍ ക്ലബ്ബാവാനുറച്ച് കളത്തിലിറങ്ങുക.

മിനെര്‍വ പഞ്ചാബാണ് നിലവിലെ ഐ ലീഗ് ചാംപ്യന്‍മാര്‍. കഴിഞ്ഞ സീസണില്‍ വമ്പന്‍ ക്ലബ്ബുകളെ ഞെട്ടിച്ച് മുന്നേറിയ മിനെര്‍വ്വ അപ്രതീക്ഷിതമായാണ് ജേതാക്കളായത്. പുതിയ സീസണില്‍ കശ്മീരില്‍ നിന്നുള്ള റിയല്‍ കശ്മീര്‍ എഫ്‌സിയും മാറ്റുരയ്ക്കും. കഴിഞ്ഞ സീസണിലെ രണ്ടാം ഡിവിഷനില്‍ ചാംപ്യന്‍മാരായതോടെയാണ് പ്രൊമോഷന്‍ ലഭിച്ച് അവര്‍ ഐ ലീഗിലെത്തിയത്.

2019 ജനുവരിയില്‍ ബഹ്‌റയ്‌നില്‍ ഇന്ത്യക്കു ഏഷ്യന്‍ കപ്പില്‍ കളിക്കാനുള്ളതിനാല്‍ ഇതിന് അനുസരിച്ചായിരിക്കും ഐ ലീഗിന്റെ ഫിക്‌സ്ചര്‍ പ്രഖ്യാപിക്കുക. നിലവിലെ അതേ രീതിയില്‍ തന്നെയായിരിക്കും ഐ ലീഗിന്റെ പുതിയ സീസണും നടക്കുകയെന്നാണ് വിവരം. ലീഗില്‍ ഒരു ടീമിന് പ്ലെയിങ് ഇലവനില്‍ പരമാവധി ഉള്‍പ്പെടുത്താവുന്ന വിദേശ താരങ്ങളുടെ എണ്ണം അഞ്ചായിരിക്കും.