കളിക്കിടെ റൊണോള്‍ഡോയെ എങ്ങനെ മാറ്റും? അതൊന്നും ശരിയല്ല; പിന്തുണച്ച കോച്ച്

ഫിഫ ലോകകപ്പ് ഗ്രൂപ്പ് ഘട്ടത്തിലെ ആദ്യ മത്സരത്തില്‍ കോംഗോയോട് സമനില വഴങ്ങിയതിന് പിന്നാലെ പോര്‍ച്ചുഗല്‍ ക്യാമ്പില്‍ ചര്‍ച്ചകള്‍ ചൂടുപിടിക്കുകയാണ്. സൂപ്പര്‍ താരം ക്രിസ്റ്റ്യാനോ റൊണാള്‍ഡോയുടെ പ്രകടനത്തെച്ചൊല്ലിയുള്ള തര്‍ക്കങ്ങളാണ് ഇപ്പോള്‍ കായികലോകത്ത് സജീവമാകുന്നത്. പ്രായം റൊണോയെ തളര്‍ത്തിയെന്നും താരത്തെ ടീമില്‍ നിന്ന് മാറ്റണം എന്നും വരെയുള്ള മുറവിളി ഉയരുന്നുണ്ട്.

ആവേശം വാനോളം, അട്ടിമറികൾ ഒട്ടേറെ! 48 ടീമുകളുടെ വിശ്വപോരാട്ടത്തിൽ ഒന്നാം റൗണ്ട് കഴിഞ്ഞപ്പോൾ കഥ ഇങ്ങനെ

എന്നാല്‍ കഴിഞ്ഞ മത്സരത്തില്‍ കാര്യമായ സ്വാധീനം ചെലുത്താന്‍ കഴിയാതിരുന്ന ക്യാപ്റ്റനെ പിന്തുണച്ച് പരിശീലകന്‍ റോബര്‍ട്ടോ മാര്‍ട്ടീനസ് രംഗത്തെത്തിയതാണ് പുതിയ വിവാദങ്ങള്‍ക്ക് വഴിതുറന്നത്. ഗോള്‍ നേടാന്‍ ടീം കിണഞ്ഞുശ്രമിക്കുന്ന ഘട്ടത്തില്‍ റൊണാള്‍ഡോയെപ്പോലൊരു കളിക്കാരനെ പിന്‍വലിക്കുന്നത് ചിന്തിക്കാന്‍ പോലുമാകില്ലെന്ന് മാര്‍ട്ടീനസ് പറഞ്ഞു.

മത്സരത്തില്‍ റൊണാള്‍ഡോ തികച്ചും ഫോമില്ലാതെയാണ് കാണപ്പെട്ടത്. പകരക്കാരെ ഇറക്കി കളി മാറ്റാന്‍ പരിശീലകന്‍ തയ്യാറാകാത്തതിനെതിരെ വലിയ രീതിയിലുള്ള വിമര്‍ശനമാണ് മത്സരശേഷം ഉയര്‍ന്നത്. എന്നാല്‍, ഇത്തരം ചോദ്യങ്ങളെ മാര്‍ട്ടീനസ് തള്ളിക്കളഞ്ഞു. ലോക ഫുട്‌ബോളിലെ ഏറ്റവും മികച്ച ഗോള്‍വേട്ടക്കാരനെ ഗോളുകള്‍ ആവശ്യമുള്ള സമയത്ത് മൈതാനത്തുനിന്ന് മാറ്റുന്നത് മണ്ടത്തരമാണെന്ന് അദ്ദേഹം പറഞ്ഞു.

ഒരു മോശം ദിവസം ആര്‍ക്കും ഉണ്ടാകാമെന്നും എന്നാല്‍ റൊണാള്‍ഡോയുടെ സാന്നിധ്യം എതിരാളികളില്‍ ഉണ്ടാക്കുന്ന ഭയം ചെറുതല്ലെന്നും അദ്ദേഹം കൂട്ടിച്ചേര്‍ത്തു. കോംഗോയ്‌ക്കെതിരായ മത്സരത്തില്‍ പോര്‍ച്ചുഗലിനായി ജാവോ നെവെസ് ആണ് ആദ്യ ഗോള്‍ നേടിയത്. മത്സരത്തിന്റെ ഒന്നാം പകുതിയുടെ അധിക സമയത്ത് യൊവാന്‍ വിസ്സയിലൂടെ കോംഗോ സമനില പിടിച്ചു. രണ്ടാം പകുതിയില്‍ പോര്‍ച്ചുഗല്‍ ശക്തമായ ആക്രമണങ്ങള്‍ അഴിച്ചുവിട്ടെങ്കിലും ലക്ഷ്യം കണ്ടില്ല.

വൈഭവില്ല, എ ടീമില്‍ നിന്ന് ഇന്ത്യന്‍ ടീമിലേക്ക് 'യോഗ്യത' 5 പേര്‍ക്ക് മാത്രം!! ആരെല്ലാം?

ആദ്യ മത്സരത്തില്‍ മൂന്ന് ഷോട്ടുകളാണ് റൊണാള്‍ഡോ ഉതിര്‍ത്തത്. എന്നാല്‍ ഇവ മൂന്നും ലക്ഷ്യത്തിലേക്ക് എത്തിക്കാന്‍ താരത്തിന് സാധിച്ചില്ല. ഇതോടെ മുന്‍ താരങ്ങളും ഫുട്‌ബോള്‍ നിരീക്ഷകരും റൊണാള്‍ഡോയ്ക്ക് എതിരെ കടുത്ത വിമര്‍ശനങ്ങളുമായി രംഗത്തെത്തുകയായിരുന്നു. ടീമിനേക്കാള്‍ വ്യക്തിഗത റെക്കോര്‍ഡുകളിലാണ് റൊണാള്‍ഡോ ശ്രദ്ധ കേന്ദ്രീകരിക്കുന്നതെന്നായിരുന്നു മുന്‍ താരങ്ങളുടെ പ്രധാന ആരോപണം.

എന്നാല്‍ തന്ത്രപരമായ പാളിച്ചകളേക്കാള്‍ കളിക്കാരുടെ മാനസികാവസ്ഥയാണ് മത്സരഫലത്തെ ബാധിച്ചതെന്ന് മാര്‍ട്ടീനസ് ന്യായീകരിച്ചു. ആദ്യ ഗോള്‍ നേടിയതിന് ശേഷം കളിക്കാരില്‍ ഉണ്ടായ അമിത ആത്മവിശ്വാസം അല്ലെങ്കില്‍ വൈകാരികമായ പ്രതികരണം കളിയിലെ സ്വാഭാവികത നഷ്ടപ്പെടുത്തിയെന്ന് അദ്ദേഹം നിരീക്ഷിച്ചു. അപകടസാധ്യതകള്‍ ഏറ്റെടുക്കാതിരുന്നതും ഫൈനല്‍ തേര്‍ഡിലേക്ക് പന്തെത്തിക്കാന്‍ വൈകിയതുമാണ് ജയം കൈവിട്ടുപോകാന്‍ കാരണമായി അദ്ദേഹം പറയുന്നത്.

World Cup 2027: തുടരെ ഫ്‌ളോപ്പായി ശ്രേയസ്!! പകരം സഞ്ജുവിനെ എടുക്കൂ, ഈ കാരണങ്ങള്‍

ആദ്യ മത്സരത്തിലെ സമനിലയെ വലിയൊരു ദുരന്തമായി കാണേണ്ടതില്ല എന്നും അദ്ദേഹം പറഞ്ഞു. 2022-ല്‍ ഖത്തറില്‍ കിരീടമുയര്‍ത്തിയ അര്‍ജന്റീന തങ്ങളുടെ ആദ്യ മത്സരത്തില്‍ സൗദി അറേബ്യയോട് തോറ്റത് അദ്ദേഹം ഓര്‍മ്മിപ്പിച്ചു. അതുപോലെ 2010-ല്‍ സ്‌പെയിന്‍ തങ്ങളുടെ ആദ്യ മത്സരത്തില്‍ സ്വിറ്റ്‌സര്‍ലന്‍ഡിനോട് തോറ്റതിന് ശേഷമാണ് ലോകചാമ്പ്യന്മാരായത്.

ആദ്യ മത്സരം എപ്പോഴും ലോകകപ്പില്‍ പ്രവചനാതീതമായിരിക്കുമെന്നും ഇത് ടൂര്‍ണമെന്റിന്റെ സ്വാഭാവിക പ്രക്രിയ മാത്രമാണെന്നും അദ്ദേഹം പറഞ്ഞു. ഈ സമനിലയില്‍ നിന്ന് പാഠങ്ങള്‍ ഉള്‍ക്കൊണ്ട് അടുത്ത മത്സരങ്ങളില്‍ ശക്തമായി തിരിച്ചുവരാന്‍ ടീമിന് സാധിക്കുമെന്നാണ് കോച്ചിന്റെ പ്രതീക്ഷ. ഗ്രൂപ്പില്‍ ഉസ്‌ബെക്കിസ്ഥാനും കൊളംബിയയുമാണ് പോര്‍ച്ചുഗലിന്റെ അടുത്ത എതിരാളികള്‍.

ഇനിയുള്ള രണ്ട് മത്സരങ്ങളില്‍ വിജയിച്ച് ഗ്രൂപ്പ് ചാമ്പ്യന്മാരായി നോക്കൗട്ടിലേക്ക് യോഗ്യത നേടുകയെന്നതാണ് പോര്‍ച്ചുഗലിന് മുന്നിലുള്ള വഴി. ഇതിനായി ടീമിലെ കുറവുകള്‍ എത്രയും വേഗം പരിഹരിക്കുമെന്നും അദ്ദേഹം പറഞ്ഞു. അടുത്ത മത്സരങ്ങളില്‍ തന്ത്രപരമായ മാറ്റങ്ങള്‍ ഉണ്ടാകുമെന്ന സൂചനയും അദ്ദേഹം നല്‍കുന്നുണ്ട്.

ആദ്യ മത്സരത്തില്‍ നിരാശപ്പെടുത്തിയെങ്കിലും മുപ്പത്തിയൊമ്പതുകാരനായ ക്രിസ്റ്റ്യാനോ റൊണാള്‍ഡോ ഈ ലോകകപ്പിലും ചില സുവര്‍ണ റെക്കോര്‍ഡുകള്‍ കൈപ്പിടിയിലൊതുക്കാനുള്ള തയ്യാറെടുപ്പിലാണ്. ഫുട്‌ബോള്‍ ചരിത്രത്തില്‍ ആറ് ലോകകപ്പുകളില്‍ കളിക്കുന്ന ആദ്യ താരം എന്ന ലയണല്‍ മെസിയുടെ റെക്കോര്‍ഡിനൊപ്പം റൊണാള്‍ഡോയും ഈ ലോകകപ്പോടെ എത്തിച്ചേര്‍ന്നിട്ടുണ്ട്.

എന്നാല്‍ ആറ് ലോകകപ്പുകളില്‍ ഗോള്‍ നേടി ചരിത്രം കുറിക്കുന്ന ആദ്യ താരം എന്ന അതുല്യനേട്ടമാണ് റൊണാള്‍ഡോ ഇപ്പോള്‍ ലക്ഷ്യമിടുന്നത്. കഴിഞ്ഞ ദിവസം ലയണല്‍ മെസ്സി അഞ്ച് ലോകകപ്പുകളില്‍ ഗോള്‍ നേടുന്ന റൊണാള്‍ഡോയുടെ റെക്കോര്‍ഡിനൊപ്പം എത്തിയിരുന്നു. ഇതിനുപുറമെ, പോര്‍ച്ചുഗലിന്റെ എക്കാലത്തെയും മികച്ച ലോകകപ്പ് സ്‌കോറര്‍ പദവിയിലേക്കും റൊണാള്‍ഡോയ്ക്ക് ഇനി ഒരു ഗോളിന്റെ അകലം മാത്രമാണുള്ളത്.

എട്ട് ലോകകപ്പ് ഗോളുകള്‍ നേടിയ വിഖ്യാത താരം യൂസേബിയോയുടെ റെക്കോര്‍ഡ് തകര്‍ക്കാന്‍ റൊണാള്‍ഡോയ്ക്ക് വലിയ അവസരമുണ്ട്. നോക്കൗട്ട് ഘട്ടത്തില്‍ പോര്‍ച്ചുഗല്‍ പ്രവേശിക്കുകയും അവിടെ റൊണാള്‍ഡോ സ്‌കോര്‍ ചെയ്യുകയും ചെയ്താല്‍ ലോകകപ്പ് നോക്കൗട്ടില്‍ ഗോള്‍ നേടുന്ന ഏറ്റവും പ്രായം കൂടിയ താരം എന്ന നേട്ടവും റൊണാള്‍ഡോയ്ക്ക് സ്വന്തമാകും.