ലണ്ടന്: യൂറോ 2020ലേക്കുള്ള യോഗ്യതാ മത്സരത്തില് ഇംഗ്ലണ്ടും ഫ്രാന്സും വമ്പന് ജയം ആഘോഷിച്ചപ്പോള് പോര്ച്ചുഗല് കുടുങ്ങി. ഫ്രാന്സ് മൊള്ദോവയെ 4-1ന് തോല്പ്പിച്ചപ്പോള് എതിരില്ലാത്ത 5 ഗോളുകള്ക്ക് ചെക്ക് റിപ്പബ്ലിക്കിനെതിരെയായിരുന്നു ഇംഗ്ലണ്ടിന്റെ ജയം. അതേസമയം, ക്രിസ്റ്റ്യാനോ റൊണാള്ഡോ തിരിച്ചുവന്നിട്ടും പോര്ച്ചുഗല് യുക്രൈനുമായി ഗോള്രഹിത സമനിലയില് കുടുങ്ങി.
മെസ്സിയുടെ മടങ്ങിവരവില് അര്ജന്റീനയെ അട്ടിമറിച്ച് വെനസ്വല; ചിലിക്കും തോല്വി
റഹീം സ്റ്റര്ലിങ്ങിന്റെ ഹാട്രിക് ആണ് ഇഗ്ലണ്ടിന് വന് ജയം സമ്മാനിച്ചത്. 24, 62, 68 മിനിറ്റുകളിലായിരുന്നു സിറ്റി താരത്തിന്റെ ഗോളുകള്. 45+2 -ാം മിനിറ്റില് ഹാരി കെയ്നും ഇംഗ്ലണ്ടിനായി സ്കോര് ചെയ്തു. 84-ാം മിനിറ്റില് തോമസ് കലാസിന്റെ സെല്ഫും ഗോളും ഇംഗ്ലണ്ടിന്റെ അക്കൗണ്ടിലെത്തി. മത്സരത്തില് മേല്ക്കൈ നേടിയ ഇംഗ്ലണ്ട് അര്ഹിച്ച ജയമാണ് സ്വന്തമാക്കിയത്.
മറ്റൊരു മത്സരത്തില് ലോക ചാമ്പ്യന്മാരായ ഫ്രാന്സ് പെരുമയ്ക്കൊത്ത പ്രകടനം തന്നെ കാഴ്ചവെച്ചു. അന്റോണിയോ ഗ്രിസ്മാന്(24), റാഫേല് വരാനെ(27), ഒലിവര് ജിറൂഡ്(36), കിലിയന് എംബാപ്പെ(87) എന്നിവരാണ് ഫ്രാന്സിന്റെ സ്കോറര്മാര്. 89-ാം മിനിറ്റില് വ്ലാദിമിര് ആബ്രോസ് മോല്ദോവയുടെ ആശ്വാസഗോള് കണ്ടെത്തി.
ലോകകപ്പിന് ശേഷം ദേശീയ ടീമില്നിന്നും മാറിനില്ക്കുകയായിരുന്ന ക്രിസ്റ്റ്യാനോ റൊണാള്ഡോ തിരിച്ചെത്തിയിട്ടും നിലവിലെ ചാമ്പ്യന്മാരായ പോര്ച്ചുഗലിന് ജയം നേടാനായില്ല. കൂടുതല് അവസരങ്ങള് മെനയാന് കഴിഞ്ഞെങ്കിലും ഫിനിഷിങ്ങിലെ പോരായ്മ ടീമിന് തിരിച്ചടിയായി. മറ്റു മത്സരങ്ങളില് തുര്ക്കി അല്ബേനിയയേയും(2-0), ഐസ്ലന്ഡ് അന്ഡോറയെയും(2-0), ലക്സംബര്ഗ് ലിത്വാനിയയേയും(2-1) തോല്പ്പിച്ചു.