ബെംഗളൂരു: ഐഎസ്എല്ലില് ബെംഗളൂരു എഫ്സി ബ്രേക്കില്ലാതെ കുതിപ്പ് തുടരുന്നു. തുടര്ച്ചയായ അഞ്ചാം ജയമാണ് വെള്ളിയാഴ്ച രാത്രി മുന് ഐ ലീഗ് ചാംപ്യന്മാര് നേടിയത്. മുന് റണ്ണറപ്പായ എഫ്സി ഗോവയെ ബെംഗളൂരു സ്വന്തം മൈതാനത്ത് ഏകപക്ഷീയമായ രണ്ടു ഗോളുകള്ക്കു തകര്ത്തുവിടുകയായിരുന്നു. ഇരുപകുതികളിലുമായി എഡു ഗാര്ഷ്യയും (35ാം മിനിറ്റ്) ഡിമാസ് ഡെല്ഗാഡോയും (82) നേടിയ ഗോളുകളാണ് ബെംഗളൂരുവിന് മികച്ച ജയം സമ്മാനിച്ചത്.
ഈ ജയത്തോടെ ബെംഗളൂരു സെമി ഫൈനല് ബെര്ത്തിന് കൈയെത്തുംദൂരത്തെത്തി. ഗോവയെ തകര്ത്ത ബെംഗളൂരു ലീഗില് ഒന്നാംസ്ഥാനം അരക്കിട്ടുറപ്പിക്കുകയും ചെയ്തു. രണ്ടാംസ്ഥാനക്കാരായ ചെന്നൈയ്ന് എഫ്സിയേക്കാള് എട്ടു പോയിന്റ് മുന്നിലാണ് ബെംഗളൂരു. അതേസമയം, സീസണില് ഒരു ഘട്ടത്തില് പോയിന്റ് പട്ടികയില് ഒന്നാംസ്ഥാനത്തു നിന്ന ഗോവയ്ക്ക് ക്ലൈമാക്സിലേക്ക് അടുക്കുമ്പോള് കാലിടറുകയാണ്. ഗോവ ഇപ്പോള് ടോപ്പ് ഫോറില് പോലുമില്ല. 20 പോയിന്റ് മാത്രമുള്ള ഗോവ കേരള ബ്ലാസ്റ്റേഴ്സിനും പിന്നിലായി ആറാംസ്ഥാനത്താണ്.
ബെംഗളൂരുവിനോട് തോറ്റെങ്കിലും ഗോവയുടെ പ്രകടനം മോശമായിരുന്നില്ല. കൂടുതല് സമയം പന്ത് കൈവശം വച്ചതും പാസിങ് ഗെയിം കളിച്ചതും ഗോവയായിരുന്നു. എന്നാല് ലഭിച്ച ഗോളവരങ്ങള് ലക്ഷ്യത്തിലെത്തിക്കാന് ഗോവയ്ക്കായില്ല. ബെംഗളൂരു ഗോള്കീപ്പര് ഗുര്പ്രീത് സിങിന്റെ ചില തകര്പ്പന് സേവുകളും അവര്ക്കു ഗോള് നിഷേധിച്ചു.