ഇരട്ടച്ചങ്കന്‍ മെസ്സി... ഫൈവ് സ്റ്റാര്‍ ബാഴ്‌സലോണ, പറന്നിറങ്ങി അവസാന എട്ടില്‍

മാഡ്രിഡ്: അര്‍ജന്റൈന്‍ സൂപ്പര്‍ താരം ലയണല്‍ മെസ്സിയുടെ ഇരട്ടഗോളിലേറി ബാഴ്‌സലോണ കോപ്പ ഡെല്‍ റേ (കിങ്‌സ് കപ്പ്) ടൂര്‍ണമെന്റിന്റെ ക്വാര്‍ട്ടര്‍ ഫൈനലിലേക്ക് കുതിച്ചു. രണ്ടാംപാദ പ്രീക്വാര്‍ട്ടറില്‍ സെല്‍റ്റാവിഗോയെ ബാഴ്‌സ ഏകപക്ഷീയമായ അഞ്ചു ഗോളുകള്‍ക്കു മുക്കുകയായിരുന്നു. രണ്ടാംനിര ടീമുമായി ഇറങ്ങിയ ബാഴ്‌സയെ ഒന്നാംപാദത്തില്‍ സെല്‍റ്റ് 1-1ന് സമനിലയില്‍ കുരുക്കിയിരുന്നു. അതുകൊണ്ടു തന്നെ നിര്‍ണായകമായ രണ്ടാംപാദത്തില്‍ ശക്തമായ ഇലവനെയാണ് ബാഴ്‌സ കോച്ച് അണിനിരത്തിയത്. ഇരുപാദങ്ങളിലുമായി 6-1ന്റെ വമ്പന്‍ ജയമാണ് ബാഴ്‌സ ആഘോഷിച്ചത്.

ഹോംഗ്രൗണ്ടായ നൂകാംപില്‍ മല്‍സരം തുടങ്ങി 20 മിനിറ്റിനുള്ളില്‍ തന്നെ ബാഴ്‌സ 2-0ന്റെ മികച്ച ലീഡ് കരസ്ഥമാക്കിയിരുന്നു. മെസ്സിയാണ് രണ്ടു മിനിറ്റിനിടെ രണ്ടു ഗോള്‍ നേടി സെല്‍റ്റയെ നിഷ്പ്രഭരാക്കിയത്. 13, 15 മിനിറ്റുകളിലായിരുന്നു മെസ്സിയുടെ ഗോളുകള്‍. 28ാം മിനിറ്റില്‍ ജോര്‍ഡി ആല്‍ബ ബാഴ്‌സയുടെ സ്‌കോര്‍ 3-0 ആക്കി ഉയര്‍ത്തി. രണ്ടു മിനിറ്റ് കഴിയുമ്പോഴേക്കും വീണ്ടും സെല്‍റ്റയുടെ വല കുലുങ്ങി. ഇത്തവണ ലൂയിസ് സുവാരസിന്റെ വകയായിരുന്നു ഗോള്‍. 4-0ന്റെ ആധികാരിക ലീഡുമായാണ് ബാഴ്‌സ ഒന്നാപകുതിയില്‍ കളംവിട്ടത്. ബാഴ്‌സയുടെ ഗോള്‍ദാഹം തീര്‍ന്നിരുന്നില്ല. ഫൈനല്‍ വിസിലിന് മൂന്നു മിനിറ്റ് ബാക്കിയുള്ളപ്പോള്‍ ഇവാന്‍ റാക്കിറ്റിച്ച് ടീമിന്റെ ഗോള്‍പട്ടിക പൂര്‍ത്തിയാക്കി. ബാഴ്‌സയുടെ മൂന്നു ഗോളുകള്‍ക്കു വഴിയൊരുക്കിയത് ജോര്‍ഡി ആല്‍ബയായിരുന്നു.

ബാഴ്‌സയുടെ വരവോടെ ടൂര്‍ണമെന്റിന്റെ ക്വാര്‍ട്ടര്‍ ഫൈനല്‍ ലൈനപ്പ് പൂര്‍ത്തിയായി. റയല്‍ മാഡ്രിഡ്, അത്‌ലറ്റികോ മാഡ്രിഡ്, വലന്‍സിയ, സെവിയ്യ, എസ്പാന്യോള്‍, ലെഗന്‍സ്, അലാവസ് എന്നീ ടീമുകളാണ് ക്വാര്‍ട്ടറിലേക്ക് ടിക്കറ്റെടുത്ത മറ്റു ക്ലബ്ബുകള്‍.