ലിവര്‍പൂളിലും ചെല്‍സി വീണില്ല, ആഴ്‌സണല്‍ സ്വന്തം പൂളില്‍ വീണതിന്റെ ഷോക്കിലും !!

ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ആഴ്‌സണല്‍ തോറ്റപ്പോള്‍ ലിവര്‍പൂളും ചെല്‍സിയും തമ്മിലുള്ള ക്ലാസിക് പോരാട്ടം സമനിലയായി. ടോട്ടനം ഹോസ്പറും സമനിലയില്‍ കുരുങ്ങി.

ആഴ്‌സണല്‍ ഹോം ഗ്രൗണ്ടില്‍ വാട്‌ഫോഡിനോടാണ് ഞെട്ടിപ്പിക്കുന്ന തോല്‍വിയേറ്റത്. ഒന്നിനെതിരെ രണ്ട് ഗോളുകള്‍ക്ക്. ലിവര്‍പൂളിന്റെ തട്ടകത്തില്‍ ചെല്‍സി ജയം കൈവിടുകയായിരുന്നു. ടോട്ടനം സണ്ടര്‍ലാന്‍ഡിന്റെ മണ്ണില്‍ ഗോള്‍രഹിത സമനിലയുമായി മടങ്ങി.

പോയിന്റ് ടേബിളില്‍ 23 മത്സരങ്ങളില്‍ 56 പോയിന്റുമായി ചെല്‍സി മുന്നിട്ട് നില്‍ക്കുന്നു. രണ്ടാം സ്ഥാനത്തുള്ള ടോട്ടനം ഹോസ്പറിനും മൂന്നാംസ്ഥാനത്തുള്ള ആഴ്‌സണലിനും 47 പോയിന്റ് വീതം. 46 പോയിന്റുമായി ലിവര്‍പൂള്‍ നാലാം സ്ഥാനത്ത്.

ഇരുപത്തിനാലാം മിനുട്ടില്‍ ഡേവിഡ് ലൂയിസാണ് ചെല്‍സിയെ മുന്നിലെത്തിച്ചത്. അമ്പത്തേഴാം മിനുട്ടില്‍ വിനാല്‍ഡം സമനില ഗോളടിച്ചു. ഹോം ഗ്രൗണ്ടില്‍ ആഴ്‌സണലിന്റെ കഥ ആദ്യ പതിമൂന്ന് മിനുട്ടില്‍ തീര്‍ന്നിരുന്നു. പത്താം മിനുട്ടില്‍ കാബോളും പതിമൂന്നാം മിനുട്ടില്‍ ഡീനിയും നേടിയ ഗോളുകളില്‍. അമ്പത്തെട്ടാം മിനുട്ടില്‍ ഇവോബിയിലൂടെ ആഴ്‌സണല്‍ ഗോള്‍ മടക്കിയെങ്കിലും തോല്‍വി ഒഴിവാക്കുവാന്‍ സാധിച്ചില്ല.

ഗോള്‍ നില

ആഴ്‌സണല്‍ 1-2 വാട്‌ഫോഡ്

ബൗണ്‍മൗത് 0-2 ക്രിസ്റ്റല്‍പാലസ്

ബണ്‍ലി 1-0 ലെസ്റ്റര്‍ സിറ്റി

മിഡില്‍സ്ബറോ 1-1 വെസ്റ്റ് ബ്രോം

സണ്ടര്‍ലാന്‍ഡ് 0-0 ടോട്ടനം

സ്വാന്‍സി 2-1 സതംപ്ടണ്‍

ലിവര്‍പൂള്‍ 1-1 ചെല്‍സി