കടുത്ത വേദന സഹിച്ച് സച്ചിന്‍ അന്നു കളിച്ചു! ആരോടും ഒന്നും പറഞ്ഞില്ല- ഉത്തപ്പയുടെ വെളിപ്പെടുത്തല്‍

സച്ചിന്‍ ഒന്നും പറഞ്ഞില്ല

നിങ്ങള്‍ക്കു ഇതു വിശ്വസിക്കാന്‍ സാധിക്കില്ല. കോമണ്‍വെല്‍ത്ത് ബാങ്ക് സീരീസില്‍ കടുത്ത വേദന സഹിച്ചായിരുന്നു പാജി (സച്ചിന്‍) ബാറ്റ് ചെയ്തത്. ശാരീരികമായി അദ്ദേഹം ഓക്കെയായിരുന്നില്ല. മാത്രമല്ല ഒരുപാട് വേദന സഹിച്ചായിരുന്നു സച്ചിന്‍ ബാറ്റ് വീശിയത്.
വേദനയെ തുടര്‍ന്നു ചിലപ്പോള്‍ അദ്ദേഹം പുളയുന്നതു പോലും ഞാന്‍ കണ്ടിരുന്നു. ഞങ്ങള്‍ ഓക്കെ ആണോയെന്നു ചോദിച്ചാല്‍ ഒരു കുഴപ്പവുമില്ലെന്നായിരിക്കും സച്ചിന്റെ മറുപടി. സ്വന്തം താല്‍പര്യങ്ങളേക്കാള്‍ ടീമിന്റെ താല്‍പ്പര്യങ്ങള്‍ക്കാണ് അദ്ദേഹം പ്രാധാന്യം നല്‍കിയിരുന്നതെന്നും ഉത്തപ്പ വിശദമാക്കി.

സച്ചിന്‍ പറഞ്ഞത് സത്യമായി

ഈ പരമ്പരയ്ക്കിടെ സച്ചിനുമായി ഒരുപാട് കാര്യങ്ങള്‍ ഞാന്‍ സംസാരിച്ചിരുന്നു. 32-34 പ്രായമെത്തുമ്പോള്‍ നിനക്ക് ഫിറ്റ്‌നസ് നിലനിര്‍ത്തുകയെന്നത് ബുദ്ധിമുട്ടായിരിക്കുമെന്ന് അദ്ദേഹം പറഞ്ഞിരുന്നു. കാരണം വെല്ലുവിളികള്‍ കൂടിക്കൊണ്ടിരിക്കുകയാണെന്നും പരിക്കുകളേല്‍ക്കാന്‍ സാധ്യത കൂടുതലാണെന്നും സച്ചിന്‍ ചൂണ്ടിക്കാട്ടി. എനിക്ക് അന്നു 21-22 മാത്രമായിരുന്നു പ്രായം.
ഇല്ല പാജി, അങ്ങനെയൊന്നും സംഭവിക്കില്ലെന്നായിരുന്നു സച്ചിന്റെ ഈ മുന്നറിയിപ്പിന് ഞാന്‍ നല്‍കിയ മറുപടി. അപ്പോള്‍ അദ്ദേഹം പറഞ്ഞത് റോബിന്‍, നിനക്ക് 35 വയസ്സായാല്‍ നമുക്ക് ഇക്കാര്യം വീണ്ടും സംസാരിക്കാമെന്നായിരുന്നു. അന്നു നീ എന്നോട് യോജിക്കുമോ, ഇല്ലയോ എന്ന് നോക്കാമെന്നും അദ്ദേഹം പറഞ്ഞു. ഇപ്പോള്‍ എനിക്കു 35 വയസ്സായിരിക്കുന്നു. സച്ചിന്‍ അന്നു പറഞ്ഞത് സത്യമായി വന്നിരിക്കുകയാണെന്നും ഉത്തപ്പ വ്യക്തമാക്കി.

2008ലെ സിബി സീരീസ്

ഇന്ത്യ, ഓസീസ്, ശ്രീലങ്ക എന്നിവരായിരുന്നു 2008ല്‍ ഓസ്‌ട്രേലിയയില്‍ നടന്ന കോമണ്‍വെല്‍ത്ത് ബാങ്ക് ഏകദിന പരമ്പരയില്‍ കളിച്ചത്. കൂടുതല്‍ പോയിന്റ് നേടിയ ഇന്ത്യയും ഓസീസും ഫൈനലിലേക്കു മുന്നേറുകയായിരുന്നു. മൂന്നു ഫൈനലുകളാണുണ്ടായിരുന്നത്. ആദ്യത്തെ രണ്ടു ഫൈനലുകള്‍ ഒരു ടീം ജയിച്ചാല്‍ മൂന്നാമത്തേത് ഉപേക്ഷിക്കും. മൂന്നാമത്തെ ഫൈനലിലേക്കു നീട്ടാതെ ആദ്യത്തെ രണ്ടെണ്ണവും ജയിച്ച് എംഎസസ് ധോണി നയിച്ച ഇന്ത്യ കിരീടം കൈക്കലാക്കുകയായിരുന്നു.
രണ്ടു ഫൈനലുകളിലും തകര്‍പ്പന്‍ പ്രകടനമായിരുന്നു സച്ചിന്‍ കാഴ്ചവച്ചത്. ആദ്യ ഫൈനലില്‍ 117 റണ്‍സുമായി ഇന്ത്യന്‍ വിജയത്തിനു ചുക്കാന്‍ പിടിച്ച അദ്ദേഹം രണ്ടാമത്തെ ഫൈനലില്‍ 91 റണ്‍സോടെയും തിളങ്ങി.