WTC Final: കിരീടം ആര്‍ക്ക്? ഒരു പോരാട്ടം വിധി നിര്‍ണയിക്കും- പ്രവചിച്ച് മൈക്ക് ഹെസ്സന്‍

നിര്‍ണായക പോരാട്ടം

ഇന്ത്യയുടെ മുന്‍നിര ബാറ്റ്‌സ്മാന്‍മാരും ന്യൂസിലാന്‍ഡിന്റെ സ്വിങ് ബൗളര്‍മാരും തമ്മിലുള്ള പോരാട്ടമായിരിക്കും ഫൈനലിന്റെ വിധി നിര്‍ണയിക്കുകയെന്നു ഹെസ്സന്‍ ചൂണ്ടിക്കാട്ടി. സ്വിങ് ചെയ്യുന്ന ബോളുകള്‍ക്കെതിരേ ഇന്ത്യന്‍ മുന്‍നിര ബാറ്റ്‌സ്മാന്‍മാര്‍ എങ്ങനെ പെര്‍ഫോം ചെയ്യുമെന്ന് കാണാന്‍ ഞാന്‍ കാത്തിരിക്കുകയാണ്. സതാംപ്റ്റനില്‍ ബോള്‍ സ്വിങ് ചെയ്യുമെന്നതിനാല്‍ ബാറ്റ്‌സ്മാന്‍മാര്‍ക്കു അതു വെല്ലുവിളിയായി മാറും. ന്യൂസിലാന്‍ഡിന്റെ പേസര്‍മാരെ ഇന്ത്യന്‍ മുന്‍നിര നന്നായി നേരിടുകയാണെങ്കില്‍ ഫലം അവര്‍ക്കു അനുകൂലമായി മാറിയേക്കുമെന്നു ഹെസ്സന്‍ വിലയിരുത്തി.

ക്യാപ്റ്റന്‍സിയുടെ മാറ്റുരയ്ക്കല്‍

വിരാട് കോലി, കെയ്ന്‍ വില്ല്യംസണ്‍ ഇവരില്‍ ആരാണ് കൂടുതല്‍ മികച്ച ക്യാപ്റ്റനെന്നതിന്റെ മാറ്റുരയ്ക്കല്‍ കൂടിയാവും ഫൈനലെന്നു ഹെസ്സന്‍ നിരീക്ഷിച്ചു.
രണ്ടു പേരും മികച്ച ക്യാപ്റ്റന്‍മാരാണ്. മാത്രമല്ല വ്യത്യസ്തമായ ശൈലിയാണ് ഇരുവര്‍ക്കുമുള്ളത്. പതിയെ അറ്റാക്കിങ് മോഡിലേക്കു വന്ന് കൂടുതല്‍ സമയം എതിര്‍ ടീമിനെ സമ്മര്‍ദ്ദത്തിലാക്കാന്‍ ഇഷ്ടപ്പെടുന്ന ക്യാപ്റ്റനാണ് കെയ്ന്‍. എന്നാല്‍ വിരാട് തന്റെ ടീമിനു മുന്‍തൂക്കം നല്‍കാന്‍ പല വഴികളിലൂടെയും നിരന്തരം ശ്രമിക്കുന്ന നായകനാണ്. മല്‍സരത്തിന്റെ ഓരോ ദിവസവും വിക്കറ്റ് മാറിക്കൊണ്ടിരിക്കുന്നതിനാല്‍ അതിന് അനുസരിച്ച് കെയ്‌നും വിരാടും എങ്ങനെയാണ് തന്ത്രങ്ങളിലും മാറ്റം വരുത്തുകയെന്നത് വലിയ താല്‍പ്പര്യത്തോടെയാണ് താന്‍ ഉറ്റുനോക്കുന്നതെന്നും ഹെസ്സന്‍ വിശദമാക്കി.

ഫൈനലിന്റെ തയ്യാറെടുപ്പ്

ഫൈനലില്‍ ഇന്ത്യയെ അപേക്ഷിച്ച് മികച്ച തയ്യാറെടുപ്പ് നടത്തിയത് ന്യൂസിലാന്‍ഡാണെന്നു പല മുന്‍ താരങ്ങളും ചൂണ്ടിക്കാട്ടിയിരുന്നു. ഫൈനലിനു മുമ്പ് ഇംഗ്ലണ്ടുമായി രണ്ടു ടെസ്റ്റ് പരമ്പരകളില്‍ കളിക്കുന്നത് കിവിസീനു മേല്‍ക്കൈ നല്‍കുമെന്നാണ് ഇവരുടെ അഭിപ്രായം.
എന്നാല്‍ ഇന്ത്യയുടെ കാര്യമെടുത്താല്‍ ഫൈനലിനു മുമ്പ് മല്‍സരങ്ങളൊന്നും കളിക്കുന്നില്ല. പരിശീലന സെഷനുകള്‍ മാത്രമാണ് ഇന്ത്യക്കു തയ്യാറെടുപ്പ് നടത്താനുള്ള ഏക മാര്‍ഗം. നിലവില്‍ ഇംഗ്ലണ്ടിലെത്തിയ ഇന്ത്യന്‍ ടീം ക്വാറന്റീനില്‍ കഴിയുകയാണ്. വൈകാതെ താരങ്ങള്‍ പരിശീലനം ആരംഭിക്കും.