എന്തുകൊണ്ട് ഹാര്‍ദിക് 228ാം നമ്പര്‍ ജഴ്‌സിയണിഞ്ഞു? വെറുതെയല്ല, കൃത്യമായ കാരണമുണ്ട്!!

കരിയറിലെ ഏക ഡബിള്‍ സെഞ്ച്വറിയെ ഓര്‍മപ്പെടുത്തിയാണ് ഹാര്‍ദിക് ഈ ജഴ്‌സിയണിഞ്ഞതെന്നാണ് ആരാധകരുടെ മറുപടി. ബറോഡയുടെ അണ്ടര്‍ 16 ടീമിനുവേണ്ടി കളിക്കവെയായിരുന്നു ഹാര്‍ദിക് 228 റണ്‍സുമായി കസറിയത്.
2009 ഡിസംബര്‍ ഒമ്പതിന് നടന്ന അണ്ടര്‍ 16 വിജയ് മര്‍ച്ചെന്റ് ടൂര്‍ണമെന്റില്‍ മുംബൈയ്‌ക്കെതിരേയായിരുന്നു ക്യാപ്റ്റന്‍ കൂടിയായ ഹാര്‍ദിക്കിന്റെ തകര്‍പ്പന്‍ ഇന്നിങ്‌സ്. ടീം വന്‍ തകര്‍ച്ചയെ നേരിടവെയായിരുന്നു അന്നു താരം ഡബിളടിച്ച് ഹീറോയായത്. കരിയറില്‍ ഹാര്‍ദിക്കിന്റെ ഇതുവരെയുള്ള ഏറ്റവുമുയര്‍ന്ന സ്‌കോറും ഏക ഡബിള്‍ സെഞ്ച്വറിയും ഇതു തന്നെയാണ്.

മുംബൈയ്‌ക്കെതിരേ ബറോഡ നാലു വിക്കറ്റിന് 60 റണ്‍സെന്ന നിലയില്‍ പതറവെയാണ് ഹാര്‍ദിക് ക്രീസിലെത്തിയത്. പിന്നീട് നായകന്റെ കളി കെട്ടഴിച്ച അദ്ദേഹം ടീമിന്റെ യഥാര്‍ഥ ഹീറോയായി മാറുകയായിരുന്നു. എട്ടു മണിക്കൂര്‍ ക്രീസില്‍ ചെലവഴിച്ച ഹാര്‍ദിക് 391 പന്തിലായിരുന്നു 228 റണ്‍സ് അടിച്ചെടുത്തത്. ഇതോടെ മുംബൈയുടെ 350 റണ്‍സെന്ന സ്‌കോര്‍ പിന്തുടര്‍ന്നു ജയിക്കാനും ബറോഡയ്ക്കു സാധിച്ചു.
ഈയൊരു പ്രകടനത്തോടെ ഒറ്റ രാത്രി കൊണ്ടു ഹാര്‍ദിക് സൂപ്പര്‍ താര പദവിയിലേക്കുയര്‍ന്നു. തൊട്ടടുത്ത ദിവസം പത്രങ്ങളില്‍ നിറഞ്ഞുനിന്നത് ഹാര്‍ദിക്കായിരുന്നു.

ഹാര്‍ദിക്കിന്റെ കരിയറിലെ യാത്ര തുടങ്ങുന്നത് ഇവിടെ വച്ചായിരുന്നുവെന്ന് പറയാന്‍ സാധിക്കുമെന്ന് കോച്ച് ജിതേന്ദ്ര ഒരു അഭിമുഖത്തില്‍ പറഞ്ഞിരുന്നു. പിന്നീട് ഹാര്‍ദിക് അണ്ടര്‍ 19 ടീമിലെത്തുകയും തുടര്‍ന്ന് മുന്നോട്ടുള്ള യാത്ര തുടരുകയുമായിരുന്നുവെന്നും അദ്ദേഹം ചൂണ്ടിക്കാട്ടി.
മുംബൈയ്‌ക്കെതിരായ അന്നത്തെ കളിയില്‍ ആദ്യ ഇന്നിങ്‌സില്‍ ഹാര്‍ദിക് അഞ്ചു വിക്കറ്റുകളും വീഴ്ത്തിയിരുന്നു. ഓള്‍റൗണ്ടറെന്ന നിലയില്‍ അവന്റെ വളര്‍ച്ചയാരംഭിച്ചത് ഇവിടെ നിന്നായിരുന്നുവെന്നും കോച്ച് ജിതേന്ദ്ര വ്യക്തമാക്കി. 2016 വരെ ഇന്ത്യന്‍ ടീമിനു വേണ്ടി ഹാര്‍ദിക് ധരിച്ചത് 228ാം നമ്പര്‍ ജഴ്‌സിയായിരുന്നു. അതിനു ശേഷമാണ് അദ്ദേഹം 33ാം നമ്പര്‍ ജഴ്‌സി സ്വീകരിച്ചത്.