Click it and Unblock the Notifications
ക്രിക്കറ്റ് പാരമ്പര്യമുള്ള കുടുംബത്തില് നിന്ന് തന്നെയാണ് ബാവയുടെ വരവ്. 11 വയസ് മുതല് ക്രിക്കറ്റില് സജീവമായ രാജ് ബാവയുടെ ക്രിക്കറ്റിലെ മികവ് തിരിച്ചറിഞ്ഞത് പിതാവും പരിശീലകനുമായ സുക്വീന്ദര് സിങ് ബാവയാണ്. ധര്മശാലയില് നടന്ന അന്താരാഷ്ട്ര ക്രിക്കറ്റ് മത്സരം കാണാന് ഒരിക്കല് രാജ് ബാവയേയും സുക്വീന്ദര് സിങ് ഒപ്പം കൂട്ടി. അന്ന് താരങ്ങളുടെ ഫുട് വര്ക്കിലും പേസ് ബൗളര്മാരുടെ വേഗത്തിലും കണ്ണുവെച്ച രാജ് ബാവയെ സുക്വീന്ദര് സിങ് ശ്രദ്ധിച്ചു. അതൊരു മികച്ച പേസ് ഓള്റൗണ്ടറിലേക്കുള്ള രാജ് ബാവയുടെ പരിവര്ത്തനത്തിന്റെ തുടക്കമായിരുന്നു.
' 11-12 വയസുള്ളപ്പോഴാണ് അവന് ക്രിക്കറ്റിനോട് വലിയ താല്പര്യം കാട്ടിയത്. അതിന് മുമ്പ് വരെ അവന് വലിയ താല്പര്യം കാട്ടിയിരുന്നില്ല. ടിവിയില് പഞ്ചാബ് പാട്ടുകളിട്ട് നൃത്തം ചെയ്യുന്നതിനോടായിരുന്നു അവന് താല്പ്പര്യം. എന്നോടൊപ്പം ധര്മശാലയില് നിരവധി മത്സരങ്ങള് അവന് കണ്ടിട്ടുണ്ട്. പിന്നീട് എന്നോടൊപ്പം ടീം മീറ്റുങ്ങുകളില് അവന് പങ്കെടുക്കാന് തുടങ്ങി. പതിയെ ക്രിക്കറ്റിനെ അവന് ഗൗരവത്തോടെ കാണാന് തുടങ്ങി. പഠനത്തില് അവന് മിടുക്കനായിരുന്നു. എന്നാല് ക്രിക്കറ്റിലെ അവന്റെ താല്പ്പര്യത്തോടൊപ്പം നില്ക്കുകയായിരുന്നു' -സുക്വീന്ദര് സിങ് പറഞ്ഞു.
യുവരാജ് സിങ്ങിനെ സുക്വീന്ദര് സിങ് പരിശീലിപ്പിക്കുന്നത് രാജ് ബാവ കണ്ടിട്ടുണ്ട്. അന്ന് മുതല് യുവരാജിന്റെ വലിയ ആരാധകനായും രാജ് ബാവ മാറി. ' എന്റെ പിതാവ് യുവരാജ് സിങ്ങിനെ പരിശീലിപ്പിച്ചിട്ടുണ്ട്. ചെറുപ്പകാലത്ത് ഞാന് ഇത് നോക്കി നിന്നിട്ടുണ്ട്. ബാറ്റിങ്ങില് യുവരാജ് സിങ്ങിനെ അനുകരിക്കാന് ശ്രമിച്ചിട്ടുണ്ട്. അദ്ദേഹത്തിന്റെ ബാറ്റിങ് വീഡിയോകള് നിരന്തരം കാണുമായിരുന്നു. എന്റെ റോള് മോഡലാണ് യുവരാജ്' -രാജ് ബാവ പറഞ്ഞു. യുവരാജിനോടുള്ള ആരാധനകൊണ്ടാണ് യുവരാജ് അണിഞ്ഞിരുന്ന 12ാം നമ്പര് ജഴ്സിയാണ് രാജ് ബാവയും അണിയുന്നത്.
വലം കൈയനായിരുന്ന രാജ് ബാവ യുവരാജിനോടുള്ള ആരാധനകൊണ്ടാണ് ഇടം കൈയനായി മാറിയത്. 'നെറ്റ്സില് എത്തിയപ്പോഴാണ് അവന് ഇടം കൈകൊണ്ട് ബാറ്റ് ചെയ്യുന്നതും ഇടം കൈകൊണ്ട് ത്രോ ചെയ്യാന് ശ്രമിക്കുന്നതുമെല്ലാം കണ്ടത്. ഞാന് അവനെ തിരുത്താന് ശ്രമിച്ചിരുന്നു. എന്നാല് അവന് ഇടം കൈയനാവുന്നതായിരുന്നു താല്പ്പര്യം. അവന് ബൗളിങ് ആരംഭിച്ചപ്പോള് ഞാന് പ്രോത്സാഹിപ്പിച്ചിരുന്നില്ല. ബാറ്റിങ്ങും ബൗളിങ്ങും ഒരു പോലെ ബാലന്സ് ചെയ്ത് കൊണ്ടുപോകാന് അവന് സാധിക്കാതെ വരുമോയെന്ന ആശങ്കയുണ്ടായിരുന്നു'- സുക്വീന്ദര് സിങ് പറഞ്ഞു.
എന്തായാലും ഇന്ത്യന് ക്രിക്കറ്റ് ടീമിന് ഇതിനോടകം വലിയ പ്രതീക്ഷ നല്കുന്ന ഓള്റൗണ്ടറായി രാജ് ബാവ മാറിക്കഴിഞ്ഞു. വേണ്ടത്ര ശ്രദ്ധ നല്കി വളര്ത്തിക്കൊണ്ടുവന്നാല് മത്സരഫലത്തെ ഒറ്റക്ക് മാറ്റിമറിക്കാന് കെല്പ്പുള്ള മികച്ചൊരു പേസ് ഓള്റൗണ്ടറെ ഇന്ത്യക്ക് ലഭിക്കുമെന്നുറപ്പ്. അണ്ടര് 19 ലോകകപ്പ് ഫൈനല് ഒരു തുടക്കം മാത്രം. ഇനിയും ബാവ ഏറെ മുന്നോട്ട് പോകാനുണ്ട്.
Continue with Google